Read Northern Rengma Naga EZEKIEL 33 Bible Online

EZEKIEL 33 - Northern Rengma Naga bible

EZEKIEL 33

¹Apvüwa na hi ccüneng.

²Ma khi, “Keshü nyiwa, hi aghi ssigho ayyi kesü wi chithu khati saaben khe pi n-nyithu kizalo. Diyyi tsüwa nyithu na ma nyithu kesü kessi pi aghikehiewa sa thsüben.

³Ma aghi na tetsaki gho keten mu chithu ma kiden yalo kesa kekitsan hhai sapi ayyi tsüdi cüaben.

⁴Keujüla anyi pahan na tsü zaya lela mangla kiden meyala nu aghi na gho ma pathi lethu ma keshü tsüpi ma meshensa den.

⁵Ma keshü tsüna ma kesazzi, kepaghenanye ma kekitsanwa tsü nmeshen chila; keujüla ma meshenchi lethu ma bvüya kesa.

⁶Isala keujüla aghikehiewa na aghi gho keten mu lela kemessi hhai nsa chila, nu aghi na gho kesami nyithu pathi lethu hi tsüthu keshü ghena akhhi pi aghikehiewa tsü pvü thsüaden .

⁷Tsalina keshü nyiwa, hi Israel mizzatentiwa ghena no pi aghikehie kesü sa thsüben. No hi pi no kecü kekitsanthu tsüpi mathu nkizathu yishü.

⁸Keujüla hi anyi nkemehai kesü na shü tendha le pi thangchi, isala no ma ya kekuli nkemehai wina khapeghe nu ma hangsha yalo kitsan nchila, isanu ma kesami nyi kesü sa nu shü lethu, hi ma keshü khhi pi no pvü thsüaben.

⁹Keujüla no anyi nkemehai kesü kitsan chi lela ma kesami nteshila kesami nyi kesü sa nu shü lela no kahangwa tsü hangsha yaben.

¹⁰Apvüwa na hi ccüneng. Ma khi, “Keshü nyiwa, Israel nyithu na mangwa khiben khe pi mathu kiza neng chilo. ‘Ithu na ithu kesamithu nu kesazzi sa kethengthu tsüpi ithu khhi sadha. Ithu yasa bendha, Ithu na khati hangya mehai nu?’

¹¹Hi Kemisintsa Apvüwa hangben keten Nyiza tsentsawa ghena kesami nyi kesü keshü ghang pi hi nen ntenle kesa kizalo. Hi ma kesami nsala nu hangkeyawa hi nenle. Israel, no kekuli nkemehai sa kebenwa tsü teshilo . Mangkesa na no shü mvu ben nu?

¹²“Tsalina, Keshü nyiwa, pi Israel nyithu kizalo, khathansha wi anyi kemehai nyi kesü na kesami sa wa khe ma sa ketheng kekuli kemehai tsüna ma hangshaya nben. Keujüla anyi kesü na sami wa lethu ma kahangwa tsü benya nben.

¹³Hi kahang khishü pi anyi kemehai kesü kizaya mehai, isala ma wa kesa tsüwi ma kekuli kemehai tsü mehaidhale meshen nu sami wa lethu hi ma kekuli kemehai sa ketheng kesütanla meshen nben. Ma ma kesamithu ghena shüden.

¹⁴Hi anyi nkemehai kesü shü tendha le kitsan chiya mehai, isala keujüla ma kesami nsala nu kemeshon kemehai sa wa—

¹⁵tsütsonca kesü lethu, keujüla ma nyu ma ji kenna mithon ya ketheng tsüpi cü neng, nyelela ma mangwa ghanfüya khe pi cü neng — keujüla ma kesami nsala nu kahang khuchi keten yenthu niewa lethu, ma shü nben, isala hang yaben.

¹⁶Hi ma kesami sa kethengthu tsü teshi cü, nu ma hang yaben kepaghenanye ma mangwa na meshon nu mehai khe saya kesa ghena.

¹⁷“Nu n-nyithu hi sa keten tsüna nmeshon le”! Nyele, nkemeshonwa tsüna mathu kahang yenwa tsüle!

¹⁸Khathansha wi ketsatan nyi kesü na kemehai teshi nu nkemehai sa bvü khe ma tsü ghena shüben.

¹⁹Khathansha wi nkemehai nyi kesü na kesami nsala nu mangwa mehai nu meshon khe sa wa lethu ma kahang hangsha yadha.

²⁰Isala Israel, no hi sa keten tsüna nmeshon le khiden. Hi no kekuli kenie wi njühkaghaten den.”

²¹ Ithu na kushinyi sa kewa mapi taghakeni asha taghawa ghanan taghamanga wi Jerusalem wina bvükeya anyi kesü na gho nu anyunutiwa na qancadha le hi kiza.

²²Ma gho keten tu minulen wi hi Apvüwa keten kekhang keti chüya. Anyi tsüwa na tsü ghanenwa gho cukeya wi Apvüwa na jüh kekhi kekhang pi hi cü neng.

²³Apvüwa na hi ccüneng.

²⁴Ma khi, “Keshü nyiwa, Israel yyi nyunutithu kededi wi hang kebenthu na hati khiben. ‘Abraham na meshu kesütan, isala ayyi ha maben pi ma cüle. Isala ithu tsü anyi kejon na ben tsalina ayyi hawa ha ithu ji sadhale!’

²⁵“Mathu wi Kemisintsa Apvüwa na khi keben hapi kizalo, nthu na ajjü na asa wi keben tsü dsaben. Nthu na atsikezhüthu kinyiden. Nthu na anyi kepathi kekuli saden. Isalethu mangwa na nthu sapi ayyiwa ha nthu jile meshen thsü ten nu?

²⁶Nthu na nthu njünnu maghaki. Nthu kekulithu na nan-kennontssü. Tsüdila keqheza kekuli saden. Isalethu mangwa na nthu sapi ayyi hawa ha na nthu jile meshen thsü ten nu?

²⁷“Mathu wi hi Kemisintsa Apvüwa, hi hangben keten Nyiza tsentsawa kesalina kededi nyunutithu wi hang kebenthu pathia benle kesa khipi mathu kitsan chilo. Diyyiwa wi hang kebenthu aghangsa na mathu ghan dsaben. Ayikha wi nu ayyiku wi kuthi kebenthu sanaa nu shüaben.

²⁸Hi diyyiwa pi keyasa yyi keyisha kesü saaden, nu mathu na ammisa ntsa keten kekhang tsüpi ma sakhen sa thsüaden . Israel yikhathu tsü yishatha sa nu thola ciwi pvüdhi nwa laben.

²⁹Hi khathansha wi anyithu kesami ghena kemeten pi cü nu diyyiwa pi keyasa kesü sa khe mathu na hi Apvüwa le kesa chüyaden.”

³⁰Apvüwa na khi, “Keshü nyiwa, n-nyithu na anyunutiwa khwetithu nyelela mathu jenkathu wi kemetuli yathu ncüki khiben. Mathu na khokho wi khiben, ‘Ithu na wa nu khili Apvüwa jüh mangwa na ghoben khe keü nan na.’

³¹Tsalina inyithu na azitenti saghuya nu no mangwa khi khe kinale saben, isala mathu na no mathu salo kekiza tsü sa nten. Mathu pang ketan pi lebenkechi jüh khiden, isala mathu na apvükemene len wi tsü benden.

³²Mathu tu wi no mangla nye, isala kenenli khwisa, nu harp khou pi nyu ssiya ketenwa ti kesa kesü le. Mathu na njüh tsüdi kinaten, isala tsüthu kesüla nie nten.

³³Isala khathansha wi njühthu tsüdi atsentsa sagho — nu tsüthu na atsentsa sagho den — tsaseng wi ccüna mathu na atusenjüh-kechü kesü mathu jawi ghole kesa chüyaben.”