Read Northern Rengma Naga EZEKIEL 34 Bible Online

EZEKIEL 34 - Northern Rengma Naga bible

EZEKIEL 34

¹Apvüwa na hi ccüneng.

²Ma khi, “Keshü nyiwa, Israel kekhang kesenthu khimeshü chilo. Mathu wi atusenjüh-khi chi nu hi Kemisintsa Apvüwa na mangwa khiben khe pi mathu kizalo. Nthu na dedi tendha le, nthu Israel kehiethu! Nthu na nthu ketanla nthu noncca den, isala khaghanenithu tsü ghanja nten.

³Nthu na tsenitssü jjü, nu asassen pi kedethsü mphi. nu khaghaneni kemehai ntsathu pathi dsaden. Isala nthu na khiela khaghaneni ghanja nten.

⁴Nthu na khaghaneni nkekhangthu noncca nten, naa kebenthu sapi mehai ncü, ayisü kepvüthu qhan ncü, deja bvü kesathu ssineng ngho, nyelela bhatagha kesathu bha nten. Tsüti kesawa nye nthu na mathu tu wi daggü den.

⁵ Khaghanenithu na mathu kehiewa nmila kesalina bvüzighe nu aghangsathu na tsüthu ghan dsaden.

⁶Tsalina iji khaghanenithu na yyishiphon kemisithu nu yikhathu wi kegoe deja bvüa. Mathu na ayyi mi tsüdi wi bvüzighe, isala thola tsüthu nbha nyelela muya le nsa.

⁷Tsalina khaghaneni kehiethu, hi Apvüwa, nthu wi kiza keben ha kinayalo.

⁸Hi hangben keten Nyiza tsentsa ghena nthu na ijüh kinathu mehai kesa. Iji khaghanenithu na mathu kehiewa nkemi ghena aghangsathu na mathu keka nu mathu ghan dsaden. Iji khaghaneni kehiethu na tsüthu bhayale nkiden. Mathu ketanla mathu ghena khe khaghanenithu noncca nten.

⁹Tsalina ijühkinalo, nthu khaghaneni kehiethu.

¹⁰Hi Kemisintsa Apvüwa, hi nthu ghinyile kesa khishü ben. Hi iji khaghanenithu ssi bvüa nu nthu ya mathu kehiethu nsa neng thsü laden, hi khiela nthu pi mathu n-noncca neng thsüla nthu ketanla nthu noncca thsüden. Hi nthu kwen wina iji khaghanenithu kekashaya nu nthu ya mathu sa ndsa thsü laden.

¹¹“Hi Kemisintsa Apvüwa, hi nthu kiza kebenwa lethu, hi ketanla iji khaghaneni ghang nu noncca yaden.

¹²Khaghaneni kehie kesü na ma khaghaneni bvüzighe kesa noncca nu saghu ssineng gho keten tsüti. Hi mathu na kededi tsathang kejang tsüwa wi mathu na bvüzighe wakesa penthu tsüdi wina mathu ssineng ghoaden.

¹³Hi asang diyyithu wina mathu ssishi pi saghuya nu ssineng gho mathu yyi wi chiaben . Hi mathu ssineng gho Israel yikha akuzathu wi chi nu ccanonkwen kesa wi mathu tsse saaden.

¹⁴Hi mathu yala yazishu Israel yyi wi ayikha ccanieja, ayyiketijü, nu amou kemejjü tsüdi wi atsse ya thsüden.

¹⁵Hi ketanla hi khaghaneni kehiewa saaden, nu hi mathu ghena kemnanpen kesü bha pi cüden. Hi Kemisintsa Apvüwa na khidha.

¹⁶“Hi bhatagha kesathu bhaden, dejabvü kesathu ssineng gho, mesa-mena pvü kebenthu qhan cü, nu naa kebenthu sapi mehai cüden, isala hi kekunon nu zü kebenthu yasaden, kepaghenanye hi kemeshonwa sa keten aneni kehie kesüle.

¹⁷“Tsalina iji khaghanenithu, hi Kemisintsa Apvüwa na nthu kiza kebenwa lethu hi nthu kesüsü jühkaghaten nu kemehai nu nkemehai, khaghaneni nu aneni kepapa ghüdhiaben .

¹⁸Nthu pahan na aghang kemehai ntsa kedsa wi anonkwen meya; nthu na nthu nkedsathu lela cüten den! Nthu na atssü kemetha jjü nu nthu nkejjü tsü pa nkhwen den!

¹⁹Iji khaghaneni kepathu na nthu cüten kethengthu tsü dsa nu nthu na atssü pa nkhwen ketheng tsü jjü thsüden.

²⁰“Tsalina khili hi Kemisintsa Apvüwa na nthu kiza kebenwa lethu hi nthu khaghaneni kezüthu nu khaghaneni nkezüthu jüwi ajühkaghaten den.

²¹Nthu na khaghaneni jawi nkezüthu shon pheghe pi bvü thsüden.

²²Isala iji khaghanenithu kekashaya nu nyu ya mathu nkenen nsa thsü laden. Hi iji khaghanenithu kesüsü jühkaghaten nu kemehai nu nkemehai ghüdhi kepapa saaden.

²³ Hi kadimiwa kesü imagha David ti kesa pi mathu cü nu pi mathu kehiewa sa thsü, nu ma mathu noncca yaden.

²⁴ Hi Apvüwa, hi mathu Nyiza sa waden, nu kadimi kesü maghawa David ti kesa nu mathu kekhang kesenwa saaden. Hi khidha.

²⁵Hi mathu ssinu cenkethenjüh kesü sa nu tsüna mathu khwe yaden. Hi ayyiwa wi aghangsa ghe nkemehaithu tsüdila kushi nu ikhaghanenithu ya yazishu agheja wi hang nu ayinong wi jenya thsüden.

²⁶“Hi sawegü pi mathu cü nu mathu ya iyyishiphon kemethawa vüla hang thsüden. Ciwi hi mathu nsenthu keyishü tsü wi atsankegho mihhi pi mathu cüden.

²⁷Achantonthu na abi bün, allithu wi yangdsaketen muya nu anyi tsüdi ma yyi wi yazishu hang yaden. Hi khathansha wi inyithu pi atssüzü sa ketenthu ssüli wina mathu lisha nu khushi cü khe mathu na hi Apvüwa le kesa chüyaden.

²⁸Anyiza nkechü mizzatentithu na mathu keben shupvü wa nbendha. Mathu na yazishu hang nu thola mathu pateqhe nbendha.

²⁹Hi ayyi kinyan pi mathu cü nu ayyiwa wi kaghama nmila thsüaden .

³⁰Anyi tsüdila hi Israel khweya nu mathu na inyi sadha le kesa chüyaden. Hi Kemisintsa Apvüwa na khidha.

³¹“Nthu iji khaghaneni, hi mathu ghanja ketenthu, nthu na inyithu, nu hi nthu Nyiza.” Kemisintsa Apvüwa na khidha.