Read Northern Rengma Naga EZEKIEL 36 Bible Online

EZEKIEL 36 - Northern Rengma Naga bible

EZEKIEL 36

¹Apvüwa na khi, “Keshü nyiwa, Israel yikhathu wi mathu ya hi ketsijüh kinalo kizalo.

²Kemisintsa Apvüwa na mathu ghena pi kethengwa ha: Israel nyithu na kapvü nu khi, ‘Kheni yyishiphon thu tsüna ithu ji sadhale!’

³“Atusenjüh-khi nu Kemisintsa Apvüwa, hi khi keben hapi thang chilo. Khathansha wi mizzatenti ha keni jenphon mizzatentithu na Israel yikhathu nkaya nu pegheya khe anyi tsüdila Israel nankeqheden.

⁴Tsalina khili hi Kemisintsa Apvüwa, hi nthu yikhathu, yyishiphon thu, akuzathu, nu ayyiketijüthu yasa pi teshikea penthu, nu nyu na nthu keben shupvü bvü, mizzatenti vü kebenthu tsüdi nthu nankeqhekea, teshikea nyunutithu, ha kinalo.

⁵“Kemisintsa Apvüwa, ileben keminu kisa pvü nu ha khipi kevü mizzatentithu nu tsü miwi Edom shunben. Mathu na anonkeghe sa nu nkhichi sala iyyi nu ciwi amouthu yaya.

⁶“Tsalina Israel yyi wi atusenjüh khilo; ayikhathu, yyishiphon thu, akuzathu, nu ayyiketijüthu wi hi Kemisintsa Apvüwa na mizzatentithu na mathu kimenni nu nkhichila keten ghena inyonsa nu ileben minula khi keben hapi mathu kizalo.

⁷Hi Kemisintsa Apvüwa na ha keni jenphon mizzatentithu kimenni cü tenle kesa aghepvü ntsa sa nu khishiben.

⁸Isala Israel yikhathu witsü achantonthu mawa shigü neng nu abi bün pi nthu cütenle, inyi Israel. Nthu na wan ajjen wi ghoa tendha.

⁹Hi nthu wiwa ben, nu hi nthu yyi ya kuti ca neng nu amacü chiya thsü metsiden.

¹⁰Hi nthu nyi ya hang kayiya thsüaden . Hi nthu ya anyunuti wi hang nu ciwi pala yasakeathu tsüdila sapfüya thsüaden .

¹¹Hi anyithu nu amesüsithu ya hang kayi nu mezasaya thsüaden . Nthu nyi na hatu miwi jikayi yaden, nu nthu tsangathu kejon benya den, Hi nthu na hang kegho tsüti ciwi hangya thsüden, nu hi nthu ya hatu miwi la hang kayi thsüaden . Tsaseng wi nthu na hi Apvüwa le kesa chüyaden.

¹²Inyi Israel, hi nthu ssineng gho ayyi hawa wi hang thsüaden . Tsüna nthu yyi sa, nu nthu tsangathu ya khiela khhwen neng thsü nbendha.”

¹³Hi Kemisintsa Apvüwa na khiben. Nyu na ayyi hawa wi ha anyi ghan kedsa yyi le khi keten tsüna ntsakhiwa, nu mathu kekhi na tsüna ma mizzatentiwa wi ma tsangathu ghanfü tenle khiden.

¹⁴Isala khili nten na tsüna anyi ghan kedsa, nthu tsangathu keghanfüwa tsü sa neng nbendha. Hi Kemisintsa Apvüwa, hi khidha.

¹⁵Ayyi hawa na mizzatentithu na ma nankeqhe keten nsadha nyelela anyithu na ma nkhichi keten nmu nengdha. Ayyi hawa na ma tsangathu ghanfü neng nbendha, hi Kemisintsa Apvüwa, hi khidha.

¹⁶Apvüwa na hi ccüneng.

¹⁷Ma khi, “Keshü nyiwa, Israel nyithu na mathu yyi wi hang keten tsü wi mathu na mathu yen nu kekulithu pi tsü nakhia. Hi mathu cüki meshen pi nza kesü asha kaghapeng nzayen kesa tsü wi nmethala kesa tsüti sadha le.

¹⁸Mathu na ayyi hawa wi anyi kepathi kekuli sa, nu atsikezhüthu pi tsü nakhi kesa ghena hi mathu ya ileben keminu kekhang tsüdi chüya thsüle.

¹⁹Hi mathu kahang nu mathu kekuli yenthu ghena mathu meshensa nu mathu jügü zighe pi asang mizzatentithu wi chia.

²⁰Mathu na khiewa wa khe inyan kemethawa tsü kekinyen sengho, kepaghenanye anyithu na hati khi, ‘Hathu ha Apvüwa nyithu le, isala mathu na ma yyi tsü teshiaben .’

²¹Tsüwa ghena hi inyan kemethawa meshenya, kepaghenanye Israel nyithu na khiewa wa khe kejüghekeya sengho imiwi chi.

²²“Tsalina khili, Kemisintsa Apvüwa, hi Israel nyithu ghena ketsijüh khi keben hapi mathu cülo. Hi kuli wale kebenwa tsüna nthu Israel nyithu ghena nye, isala inyan kemethawa, nthu na kewa pen diyyi tsüdi wila kekinyen sakeawa tsü ghena le!

²³Hi inyan kemethawa keti nthu na mathu jawi na kekinyen sakeawa tsüpi mathu ccüca kechi wi mathu na hi Apvüwa le kesa chüyaben. Hi Kemisintsa Apvüwa, hi khidha. Hi metha le kesa nthu sapi mizzatentithu ccücaden.

²⁴Hi mizzatenti nu diyyi tsüdi wina nthu khushi nu ssineng gho nthu yyi wi chiaben .

²⁵Hi atssü kemetha pi nthu miwi keghü chi nu atsikezhüthu nakhi kesa kekuli tsüdi wina nthu satemetha cüden.

²⁶ Hi aleben ketheü nu kemeshen ketheü pi nthu cüden. Hi nthu leben kedhu lonwa tsü khupi nu ajühkeya leben pi nthu cüaden .

²⁷Hi aghamu pi nthu miwi chi nu nthu ya iyenthu nie nu hi pi nthu kecü ajühkhukechithu tsüdi saya thsüaden .

²⁸Tsaseng wi nthu na hi ayyi pi nthu bamyithu kecü witsü hang waaden. Nthu na inyithu sa, nu hi nthu Nyiza sa waaden.

²⁹Hi pala nthu nakhi ketheng tsüdi wina nthu hangsha yaden. Hi nthu ya asu kejon benya thsü nu nthu wi azeng nben neng thsü laden.

³⁰Hi nthu kedsau tonthu nu nthu llithu ya abi kejon bünya thsü nu azeng nsa neng thsüla mizzatentithu jawi nthu kejüghe meya thsüdha.

³¹Nthu na nthu yencüki nkemehai nu sazzi kethengthu tsü meshen nengya nu nthu ketanla nthu kesamithu nu kesazzi sa kethengthu ghena nthu nonhi waaben.

³²Israel, hi tsüti kulile keben ha nghena nyele kesa no ya chü thsü mvu benle. Hi no ya no kuli keben tsü ghena anyan kekinyen nu kejüghekeya tsü chüya thsüle ben. Hi Kemisintsa Apvüwa, hi khidha.”

³³“Kemisintsa Apvüwa na khi, hi no pi n-nyunutiwa wi hang neng thsüaden, nu no ya yasakeathu tsü sanengya thsüaden .

³⁴Nthu lli wi alentsen wa ketenthu tsüdila tsüna aghang shigübhon nu agheja sakea mudha, isala hi nthu ya tsü ca nengya thsüaden .

³⁵Anyi tsüdila ayyi hawa ha kuti tsüwi agheja sakea na khatinu Eden sanku ti saneng nu anyunuti yasakeathu shupvü bvü nu yasa pi teshi keathu tsüna khilitsü anyithu hang neng nu akhweti sayadhanu, isa khiden.

³⁶Tsaseng wi ha kevü wi mizzatentithu hangkeyathu na hi Apvüwa, hi anyunutithu yasa ketheng sapfü, nsenlakea yyithu wi achan tonthu sheng neng chile kesa chüyaden. Hi Apvüwa, hi ha satenle kesa khishi kechi tsü sacen den.”

³⁷Kemisintsa Apvüwa na khi, “Hi kuti Israel nyithu ya hi wi kekiqa khie thsü, nu mathu ya khaghaneni khang tsüti mezasaya thsüden.

³⁸Anyunuti khili keyasa wi kebenthu na kheni kuti tsü wi anyithu na Jerusalem kepong sa nu khaghanenithu na kepong sa nu akho tsüwi ahhansha kesa ghena khuchikeya ti sayaden. Tsaseng wi mathu na hi Apvüwa le kesa chüyaben.”