Read Northern Rengma Naga EZEKIEL 37 Bible Online

EZEKIEL 37 - Northern Rengma Naga bible

EZEKIEL 37

¹Hi Apvüwa kekhang kidhenya, nu ma ghamu na hi ssi wa ayyiketijü kesü wi agüthu na pong keben pen wi tsü chia.

²Ma hi ssinu ayyiketijü tsüdi vü, nu hi ciwi agü ji ntsa keben mu, nu tsüthu tsüna qha ntsa sadha.

³Ma hi keü, “Keshü nyiwa, agüthu hana hangnengya mehai kwe?” Hi luneng, “Kemisintsa Apvüwa, no ketan tsü lunengya mehai!”

⁴Ma khi, “Agüthu wi atusenjüh khi chilo. Agü keqha hathu ya Apvüwa jüh kinalo kiza.

⁵Mathu wi hi Kemisintsa Apvüwa na khi benle kizalo. Hi kahang hhatha kissa pi nthu non wi chi nu nthu ya hangnengya thsüaden .

⁶Hi ahhatha nu azü pi nthu cü nu ayhu pi nthu meju cüden. Hi kahang hhatha kissa pi nthu non wi chi nu nthu pi hangnengya thsüaden . Tsaseng wi nthu na hi Apvüwa le kesa chüyaben.”

⁷Tsalina hi kekiza ti hi atusenjüh khi. Hi ajüh khitu keben wi ahhai kesü ‘ghe’ isa kechi za, nu agüthu na kezhügholiya shan.

⁸Hi tsü ghang keben wi ahhatha, azü nu tsaseng wi ayhu na gho agüthu mejuya. Isala akamangthu wi ahhatha kekissa mangla nmi.

⁹Anyiza na hi wi khi, “Keshü nyiwa, ameghü wi atusenjüh khi chilo. Ameghüwa wi Kemisintsa Apvüwa na ma ya apen tsüdi wina gho nu ahhatha kissa pi keshü kamangthu miwi chi, nu mathu pi hangnengya thsülo khi benle kizalo.”

¹⁰Tsalina hi kekiza ti hi atusenjüh khi. Ahhatha kekissa tsüna akamangthu wi duya, nu tsüthu na hangya nu shagha. Ciwi mathu na süpahizi kesü saya kemehai na ben.

¹¹Anyiza na hi kiza, “Keshü nyiwa, Israel nyithu na agüthu tsüti kesa. Mathu na kaghang nu atuwi kemeshen mangla nmila keqhadha le khiben.

¹²Tsalina inyi Israel wi atusenjüh khi nu mathu wi hi Kemisintsa Apvüwa, mathu shüjjen lishüa le benle kizalo. Hi mathu pieshiya nu ssigho Israel yyi wi chiaben .

¹³Hi inyithu pi vhü ketheng shüjjenthu lishi nu mathu ssi keshhugho wi mathu na hi Apvüwa le kesa chüyaben.

¹⁴Hi ahhatha kekissa pi mathu wi chi, nu mathu pi hangnengya thsü nu mathu ya mathu yyi wi hangya thsüaden . Tsaseng wi mathu na hi Apvüwa le kesa chüyaden. Hi ha sale khishidha nu hi saaden. Hi Apvüwa, hi khidha.”

¹⁵Apvüwa na hi kiza neng.

¹⁶Ma khi, “Keshü nyiwa, achan khhatssü kesü khuya nu tsü miwi ajüh hathu pi zhüyalo. ‘Judah Kadiyyiwa.’ Tsaseng wi akhhatssü kepa wi kesü khuya nu ajüh hathu pi tsü miwi zhüyalo. ‘Israel Kadiyyiwa.’

¹⁷Nu nkwen pi akhhatssü keni pang ghanghuya nu manyi ghang pi akhhatssü kesütan ti saya thsüle kesalina.

¹⁸Khathansha wi n-nyithu na tsü jjügi mangwa nu keü lethu,

¹⁹mathu wi hi Kemisintsa Apvüwa, hi akhhatssü pi Israel mithon sa kebenwa tsü khuya nu pi Judah mithon sa kebenwa tsü gweghe yaden. Keni tsüna akhhatssü kesütan saya nu pi ikwen wi senya tenle kizalo.

²⁰“Nkwen wi akhhatssü keni qho ghantenya nu anyithu ya tsü muya thsülo.

²¹Nu mathu wi hi Kemisintsa Apvüwa, inyithu na bvü wala ben wale kesa mizzatentithu wi inyithu tsüdi saghuya nu ssineng gho nu mathu yyi wi chi neng ben.

²²Hi mathu pi Israel yikhathu yyiwa wi mizzatenti kesü sa thsüaden . Mathu miwi kekhang kesen kadimi kesü benden, nu mathu gishü pi mizzatenti keni nyelela pvükhhi pi kadiyyi keni sa neng nbendha.

²³Mathu na atsikezhüthu pi mathu nakhi nyelela kesami pi mathu yasa nbendha. Hi mathu na sami nu hi matsa ketheng kekulithu wina mathu lisha cüaden . Hi mathu sametha, mathu na inyithu sa nu hi mathu Nyiza saaden.

²⁴ Kadimi kesü imaghawa David ti kesa na mathu kadimi saaden. Mathu tsüdi kekhang kesen kesü kekhu wi saghu nu leben tsentsa sa iyenthu nieden.

²⁵Mathu na hi ayyi pi imaghawa Jakob kecü, mathu bamyithu na hang kegho pen wi tsü hangden. Mathu na ciwi anuphan hangden, nu mathu tsanga nu tsüthu shicübvüghathu la tsüti saaden. Kadimi kesü maghawa David ti kesa anuphanla mathu miwi kekhang sen benden.

²⁶Hi mathu ssinu cenkethenjüh kesü sa nu tsüna anuphanla mathu khweya thsüaden . Hi mathu pieki nu mathu nyi sapi shapfüya thsüaden, nu hi Kekinyijjen kesü pi mathu yyi wi chi, ciwi anuphanla benden.

²⁷ Hi ciwi mathu ssinu hangden, hi mathu Nyiza nu mathu na inyithu saaden.

²⁸Khathansha wi hi Kekinyijjen pi anuphanla mathu jawi ben thsüle pi chi khe mizzatentithu na hi Apvüwa, Israel kessi pi inyithu sayale kesa chüyaben.”