Read Northern Rengma Naga EZEKIEL 38 Bible Online

EZEKIEL 38 - Northern Rengma Naga bible

EZEKIEL 38

¹Apvüwa na hi ccüneng.

²Ma khi, “Keshü nyiwa, Magog yyi wi Meshak nu Tubal manyi mizzatenti miwi kekhang kesenwa Gog khimeshü chilo. Ma then

³nu ma miwi hi Kemisintsa Apvüwa, hi ma ghinyi le kizalo.

⁴Hi ma pakevüli chi, amighe dhasü pi ma hakheng wi chi nu ma nu ma süpahithu tsüdi vüshi yaden. Ma süpahizi pi ma goruthu nu goru kessithu nu tsikezhüthsü kepvü ji ntsa nu tsüdila atsonhi nu njünnu kesüsü pvüden.

⁵Persia, Sudan, nu Libia hathu nyithu na mathu gweghe den, nu tsüdi atsonhithu nu amighe liwen pvüden.

⁶Aghawa Gomer nu Beth Togarma yyithu wi aghikesa nyithu na ma ssiden nu tsüti mizzatentithu kepathu la anyi kejon.

⁷Ma ya kidenya nu ma ahza khukechi wina ma süpahithu tsüdi kidenyalo kiza.

⁸Amapi kejon seng wi hi ma ya mizzatentithu kejon wina inyithu ssineng gho chi nu aghi nmessila hang kebenwa diyyi tsü nkaya thsüaden . Ma Israel yikhathu tsü matsü kesie teshia, isala khilitsü anyi tsüdi lebencca hang keben tsü nkagho den.

⁹Ma nu ma süpahithu nu mizzatenti kejon na gweghe nu caghamo kesü ti ssikaghashen nu akulukeshü kesü ti ayyiwa shübhon yaden.”

¹⁰Hawa ha Kemisintsa Apvüwa na pi Gog wi khiben: Khathansha wi tsü tsüwa na gho khe no acho nkemehai meshen shaghaben.

¹¹Diyyi na kekiqa nkemi kesü ma nyithu na akhweti nkesa nyutithu ma kekhwe nkemi wi ceen nu yazishu hang kebenwa tsü nka wale no südheyaben.

¹²No anyunuti kuti jüwi yasa kesathu wi hang ketenthu tsanqai yasa nu shupvü bvüaben. Tsüna mizzatentithu wina ssigho saghu theng, mathu na khili asahangthu ben, nu ayyiwa lonpighe wi hangben.

¹³Sheba nu Dedan wi anyithu nu Spain nyunuti wi asententi kesathu na no keü ben, “No nsüpahithu saghu nu peghe nu shupvü bvüa le kesa ghena ssikaghashen kwe? No rükatssü, suna nu asahangthu khuya nu atsanqai pakeya tsüdi pvü bvüa le kiden kwe?”

¹⁴Tsalina Kemisintsa Apvüwa na ma khi keben jüh pi Gog kizalo hi kesunchi; “Khili inyi Israel na yazishu hang keben wi nthu alentsen chiden,

¹⁵tsüna aghawa kelensie wi npen wina mizzatentithu kejon wina süpahizi kekhang kejon ssinu goruthu miwi na ghoden.

¹⁶No caghamo kesü na ayyi pfü kegho ti inyi Israel ssikaghashen dugho ben. Khathansha wi matsüwa na gho khe mizzatentithu ya hi thowa khe chü thsü, nu hi no ssinu kekuli wina hi kemetha pi cüle kesa ghena hi no kesun pi iyyi nka thsüben.

¹⁷Hi kheni imaghathu, Israel wi atusenjüh-kechüthu miwi ben nu asakhen tsathang wi hi anyi pahan kesun chi nu Israel ssikaghashen thsü tenle khi ketheng tsüna no le.” Kemisintsa Apvüwa na khidha.

¹⁸Kemisintsa Apvüwa na khi, “Gog na Israel nka kegho tsathang wi hi ilebenminu ntsa saaden.

¹⁹Hi ilebentsu ntsa nu khishi kebenwa lethu, tsü tsathang wi Israel yyi wi ameghükuju ntsa saaden.

²⁰Anga nu awa tsüdi, aghangsa keti nu kizza tsüdi, nu ayyi miwi anyi tsüdi hi kemessi ghena kedeggüben. Ayikhathu na bvüca, alonshithu na kicencha, nu akhwetithu tsüdila bvücaben.

²¹Hi kededi tsüdi pi Gog pateqheden. Hi Kemisintsa Apvüwa na khidha. Ma nyithu na mathu njünnu pi kesüsü kesüdhiliden.

²²Hi kesakinaa nu ajjü kekiji pi mathu meten cüden. Hi atsan keshathi nu aghayi pi anni nu annilon saghu pi ma nu ma süpahithu, nu ma wiwa kesa mizzatentithu kejon miwi keshusha chiden.

²³Hati kesa wina hi di ntsa nu metha le kesa pi mizzatentithu tsüdi ccücaden. Tsaseng wi ccüna mathu na hi Apvüwa le kesa chüyaben.”