Read Northern Rengma Naga EZEKIEL 39 Bible Online

EZEKIEL 39 - Northern Rengma Naga bible

EZEKIEL 39

¹Kemisintsa Apvüwa na khi, “Keshü nyiwa, Meshak nu Tubal manyi mizzatentithu miwi kekhang kesen kediwa Cog khimeshü chi nu hi ma ghinyi le kizalo.

²Ma Israel yikhathu miwi npi kekugho chu hi ma ssinu alen kepawa wina vüneng den, nu aghawa len kesie wina ma ssighoaden.

³Tsaseng wi hi ma kwen tavüwa alamugho nu ma kwen ajewa alakusü tsü kekhasha den.

⁴Gog nu ma süpahithu nu ma sheikepithu na Israel yikhathu miwi qancadu shü thsüaden, nu hi mathu kamangthu pi awathu nu aghangsathu tsse sa thsüaden .

⁵Mathu ya agheja wi ghameme shü thsüaden, hi Kemisintsa Apvüwa na khidha.

⁶Hi Megog yyi wi nu atssükedone katen wi anyithu na kivvükepe nmila hang kebenthu tsüdi wila anni chiaben nu anyi tsüdila hi Apvüwa le kesa chüyaben.

⁷Hi Israel inyithu ya inyan kemethawa tsü chüya thsü metsiden, nu hi inyan kenyen neng thsü ntendha. Tsaseng wi mizzatentithu na hi Apvüwa, Israel Nyiza Kemethawa le kesa chüyaden.”

⁸Kemisintsa Apvüwa na khi, “Hi atsathang ssan ketheng tsüna gho metsiden.

⁹Israel nyunutithu wi hang kebenthu na amei wi shhu aghitsanqai teshi kesathu tsü saghu pi kecan chan saaden. Mathu na atsonhi, alamugho, alakusü, apie nu achanghonthu pi anni sa nu mathu na amapi tagha tsü senden.

¹⁰Mathu na agheja wi kecan chan wa nyelela ayinong wi achan npala mehai, kepaghenanye mathu aghitsanqai keyishathu tsüpi kecan ghena ben. Mathu na nyu mathu ji peghe nu shupvü bvü kesathu ji peghe nu shuyaden. Kemisintsa Apvüwa na khidha.”

¹¹Apvüwa na khi, “Khathansha wi ha maben sakhi khe hi Israel wi Keshü Tssükedone na nishuwa kijünyi kewathu yyiketijü wi ashüjjen pen kesü pi Gog cüden. Gog nu ma süpahithu tsüdi pi ciwi vhüden, nu ayyiketijü tsüwa pi ‘Gog süpahizi yyiketijü’ isa ciden.

¹²Israel nyithu na akamangthu tsüdi pi vhü nu ayyi tsüwa sametha nengle kesa ghena asha kesü yaben.

¹³Ayyi tsüwa wi meshu kesüsü tsüdi tsüthu pi vhüa le kesa ghena kiqaliben, nu mathu khangkeya tsathang wi hawa ha ghena nyuwakü yaden. Hi Kemisintsa Apvüwa, hi khidha.

¹⁴Asha tagü tsü kecen seng wi anyithu kessi pi ayyiwa tsüdi wi wala akamangthu amei wi kebenthu bha pi vhü nu ayyiwa tsü sametha le saaben.

¹⁵Mathu na diyyiwa wi cüshu kewa wi matsü tsüdi anyi kesü gü la muthu tsü kete wi kemechan sapi theng cü nu ashüjjen kechüthu na gho tsüpi Gog süpahizi yyiketijü wi vhü thsüden.

¹⁶(Tsü kete wi süpahi nyan keci anyuti kesü na benden.) Tsalina ayyiwa tsü sametha neng piaden.”

¹⁷Kemisintsa Apvüwa na hi wi khi, “Keshü nyiwa, apen tsüdi wi aghangsa nu awathu cichi nu hi mathu ghena ahhansha kesa kiden kebenwa ha dsa thsülo. Tsüna Israel yikha miwi kemishu keti kesü sa. Ciwi mathu na asa dsa nu ajjü jjüden.

¹⁸Mathu na süpahithu kamang dsa nu ayyi wi kekhang kesenthu jjü jjüden, tsüthu tsüdila pi khaghaneni süpon, khaghaneni zza, aneni nu amesü süpon kekunonthu ti pathiaben .

¹⁹Hi anyi hathu pi ahhansha kesa ti pathi kesa wi awathu nu aghangsathu na dsa chiya kemehai chu ma kethu dsa nu adina nkesa chu ajjü jjüden.

²⁰Imiz miwi mathu na goruthu nu tsüthu kessithu, süpahithu nu aghikesa nyithu tsüdi sa dsaya kemehai chu dsaben. Hi Kemisintsa Apvüwa na khidha.”

²¹Apvüwa na khi, “Hi mizzatentithu ya inyankethang muya thsüden, nu hi khati hi kekhang sennu südhekeya tsü sacenya khe hi kemeshon wina le kesa pi mathu ccüca den.

²²Israel nyithu na tsü nten na hi Apvüwa mathu Nyiza le kesa chüyaden.

²³Nu mizzatentithu na Israel nyithu na sami pi hi shunkea kesamithu ghena kushinyi sa bvü le kesa tsü chüyaden. Hi mathu wina kheneng bvü nu mathu ghinyithu ya mathu pasha nu aghi wi mathu pathi thsüle.

²⁴Hi mathu nkemetha nu gheshighena ghena kepvü qo tsüpi mathu cüle, nu hi mathu wina kheneng bvüa.”

²⁵Kemisintsa Apvüwa na khi, “Isala khilitsü hi Jakob shicü Israel nyithu tizen ntsa chi nu mathu ya mehai kayi nengya thsüaden . Hi inyan kemethawa khweyaden.

²⁶Khathansha wi mathu na kemessi nmila mathu yyi wi hangya nu thola mathu pateqhe nsala benya khe mathu na hi matsa kesa ghena anyan kekinyen mukeya tsü maliaben.

²⁷Hi metha le kesa pi mizzatentithu kejon ccüca le kesalina hi diyyithu, mathu ghinyithu kahang pen tsüdi wi inyithu ssineng ghoaben .

²⁸Tsaseng wi inyithu na hi Apvüwa mathu Nyiza le kesa chüyaben. Mathu na ha chüyaben, kepaghenanye hi mathu kesun pi atssüzü sa wa thsüa, nu khili mathu kesüla nteshila saghu ssigho mathu yyi wi chi cüdha.

²⁹Hi ighamu meyisha pi Israel nyithu miwi chicü nu khiela mathu miwi na kheneng bvü nbendha. Hi Kemisintsa Apvüwa na khidha.”