Read Northern Rengma Naga EZEKIEL 4 Bible Online

EZEKIEL 4 - Northern Rengma Naga bible

EZEKIEL 4

¹Anyiza na khi, “Keshü nyiwa, kemecanglon kesü khuya, nu pi ntuwi chi, nu tsü miwi alenlen sa qhai pi Jerusalem nyunutiwa mithon saya.

²Tsaseng wi nkakeya zensu sala kekuthiku, ayyi kechhü, kemnanpenthu nu ketonshaji zhü pi tsü vüya.

³Amighe khu kesü khupi no nu anyunutiwa nshinyi jüwi akhweti kesü ti saya. Anyunutiwa jentanya, anyunutiwa vüyadha, nu vükebenwa tsüna no. Hawa ha Israel mizzatenti ghena azensu kesü saaden.

⁴“Nu tavüwa jenya, nu hi Israel mizzatenti kesazzi pi nmiwi chiden. Ghanan 390 no ciwi benden nu mathu kesami ghena ketizen saaden. Hi no ya ghanan kesü pi amapi kesü sa nu mathu kemeten cen thsüale sadha.

⁶No tsü cenya lethu, ajewa khapeghe nu Judah kesami ghena ghanan jügha ketizen saaden — ghanan kesü pi amapi kesü sala mathu kemeten saaden.

⁷“N-nyon pi Jerusalem vüsen kebenwa tsü ghangkiya. Nkwen shen pi anyunutiwa tsü shun nu atusenjüh-khi pi tsü matanglo.

⁸Hi no bhenden nu vüsen kebenwa tsü npi kecen chu no khapeghe-khajaya nben.

⁹“Awhengsu, achentha, akaha, ahati, ashentha, pahan khuya. Tsüdi saghu nu pi amesa güya. Tsüwa tsüna no ghanan 390 tavüwa jen keben jüwi dsaden.

¹⁰Ghanan kesü wi gram 230 tsüpi no cüden, nu dhitsüwa kecu dsaben.

¹¹No atssü la kezeng-u ketan jjüden, ghanan kesü wi ahyi keni.

¹²No anyi keku keqha pi anni sa, nu amihi miwi amesa gü, nu anyi tsüdila no muya kemehai pen wi ben nu tsü dsaben.”

¹³Apvüwa na khi, “Hana Israel nyithu na hi mathu jügüzighe pi asang diyyithu wi kechi wi mathu na ayenwa na khen [2] ketheng kedsakejjü tsü dsa keten zensu.”

¹⁴Isa nu hi lunengchi, “Nmale, Kemisintsa Apvüwa! Hi hi ketanla hi npi nakhi le. Hi ghanyi wina aghangsathu ma ketanla keshü le, ameseng lela npi dsa le. Hi nmethale khi keten tsse mangla npi dsa na.”

¹⁵Tsalina Anyiza na khi, “Mantsadha! Tsü mithon wi no ya amesü keku sen thsü na, nu no tsü miwi amesa güya mehai.”

¹⁶Ma khineng, “Keshü nyiwa, hi Jerusalem kedsakejjü len khen cüden. Ciwi anyithu na mathu tsse whu nu atssü kede pi dsajjü keshagha wi mathu ccükwenshü nu leben güccü waben.

¹⁷Mathu na amesa nu atssü sen khiaben; mathu na atu nkemi sa, nu mathu kesami ghena nkhang nzülaben.”