Read Northern Rengma Naga EZEKIEL 40 Bible Online

EZEKIEL 40 - Northern Rengma Naga bible

EZEKIEL 40

¹Tsüwa tsüna ithu ssinu kushinyi sa kewa ngwe nu manga mapi nu Jerusalem nkakeya taghamejü mapi, amapi ketheüwa wi tagha ghanan. Tsü ghanan wi Apvüwa keten kekhang na imiwi kegho chüya nu ma hi ssinu bvüa.

² Kemanthi kesü witsü Anyiza na hi ssinu Israel yyi wi wa nu hi pi ayikha kemisi kesü wi chia. Hi itu wi ajjenthu akhang kesü tsüna anyunuti kesü ti mu.

³ Ma hi ssinu tetsaki wha nu hi anyi kesü na wegü pi lezza ti kesa mu. Ma linen pi kitegüji kesa nu amighe pi kitegüji kesa tsüti sennu akhweti len kesü kete wi nganben.

⁴Ma hi wi khi, Ghangchilo, Keshü nyiwa: Hi pi no ccüca keben ha kiden-kesha nu kina nu mehaitsü ghangyalo, kepaghenanye ha ghena no ssinu hewi ghoben. No no kemu tsüdi pi Israel nyithu kizaaben.”

⁵ Hi kemu tsüna Kekinyijjenwa, nu tsü ghapeng vütheng. Anyiwa tsüna amighe pi kitegüji kesa tsü khuya nu pi ajjen-keshon kesie meter kecheng kitegüya. Tsüna meter kecheng misi, nu ma kesha na meter kecheng.

⁶Tsaseng wi ma akhweti-jenka nishuwa kepeghe wiwa wa. Ma acükhathu megheki nu tangwa na kedulen tsü kitegüya; ma kedhu meter kecheng.

⁷Tsüna kawa alen kesü na ben, nu tsü ghapili wi aghikehiepen kecheng cheng na ben. Keshondhi mabenla meceqe, ghapili qho meter kecheng cheng, nu tsüthu jü keshondhi kesha tsüna meter keni nu gishü pahan. Aghikehiepenthu na kawa alen kesü kesie meter kecheng sasen keshondhi wi kedulen tsüna Kekinyijjen wiwa peghe ben.

⁸Ma keshondhi tsüwa tsü kitegü nu tsüna meter mejü dhu benla. Tsüna akhweti-jenka len kenten Kekinyijjen ketsaki ntsawa tsü saben, nu kawa kenten wi ajjen keshonthu tsüna kesha meter kesü.

⁹

¹⁰(Alen ghapili aghikehiepenthu tsüna tsüdila ketikesie meceqe, nu keshonthu la tsüdi kesha na meceqe.)

¹¹Tsaseng wi anyiwa tsüna akhweti-jenka len wi kedulenwa tsü kemeza kitegüya. Tsüdi saghu meter tugho nu gishü pahan, khweti-jenkathu jü kemeza na meter manga.

¹²Aghikehiepen kesüsü tuwi keshon sentimeter deni nu kesha na sentimeter deni. (Keshondhithu tsüna meter kecheng ketikesie meceqe.)

¹³Tsaseng wi keshondhi kesü sengwa keshon na wa alen khhaka keshon sengwa keshon kecu kitegü; tsüna meter taghakeni nu gishü pahan.

¹⁴Keshondhi kenten ntsawa tsüna sasen nu akhemi kevüdhi kesü wina shhuben. Ma keshondhi tsüwa tsü kitegü nan kemeza na meter tagha sa benla.

¹⁵Ajjen-keshon ameiwa akhweti wi kedulen na wa kawa keshondhi sakhenwa kecu na meter ngwe nu manga.

¹⁶Ajjen-keshon ameiwa keshon tsüdila, nu keshondhi jü wi anonwa la maku kizzakiki bhi shan theng. Alen jentan keben ajjen-keshon miwi tsü palm tonthu ton pi chitheng.

¹⁷Anyiwa tsüna hi ssinu khweti-jenka len wina akhemiwa keshondhi wi du. Ciwi ajjen keshondhi ccühha sapi ameiwa keshon tsü shonki theng, nu ajjen tsüthu tuwi alon pi dha ketheng apen kesü na ben,

¹⁸nu tsüna tsüti sasen nu akhemi keshondhi tsü vüben. Akhemi keshondhi meiwa tsüna anonwa keshondhi miwi meniki.

¹⁹Akhweti-jenka len misi kayi kesa kesü na akhemi keshondhi anonwa wi dhuben. Anyi tsüna khweti-jenka len kesie jü tsü kitegü nan meter deni benla.

²⁰Anyiwa tsüna akhweti-jenka len aghawa akhemi keshondhi ameiwa wi du kebenwa tsü kitegüya.

²¹Alen ghapili wi ajjen keshondhi kecheng cheng tsüthu jüwi keshonthu nu ajjen keshondhi ketiwa ha tsüdi nishuwa akhweti-jenka lenwa tsüti ma ketikesie meceqe. Akhweti-jenka kedulen ketikesie tsüdi na meter ngwe nu manga, nu ma kemeza na meter taghakeni nu gishü pahan.

²²Kedulen jenka keshondhi, jjenkubhithu, nu palm tonthu tsiketon tsüdila nishuwa akhweti-jenka wi sapi ketheng tsü makesü. Hewi acükha tagü sasen nu akhweti-jenka wi kiben, nu ajjen keshondhi ketiwa tsüna ma katen wi nu tsüna akhemi keshondhi tsü jentan ben.

²³Akhweti-jenka aghawa kejentan wi nishuwa ti akhemi keshondhi non wi kedu khweti-jenka kesü ben. Anyiwa tsüna akhweti-jenka len ha keni jü kesie kitegüya nu tsüna meter deni.

²⁴Tsaseng wi anyiwa tsüna hi ssinu acülawa wa, nu ciwi ishinyi na akhweti-jenka kepa wi kesü mu. Ma tsü nonwa nu kedulen jjen keshondhi tsü kitegüya, nu tsüthu la kepathu makesü.

²⁵Akhweti-jenka hawa ha keshondhi la kepathu ti jjenkubhithu na ben. Akhweti-jenka hawa kesie na meter ngwe nu manga, nu ma kemeza na meter taghakeni nu gishü pahan.

²⁶Acükha tagü sasen nu ciwi kiben, nu ciwi jjenkeshonthu ketiwa la ma kenten wi akhemi keshondhiwa tsü jentan ben. Kedulen kejentan wi ndukuwa ma keshondhi miwi palm tonthu ti ton theng.

²⁷Hewi la akhweti-jenka len kesü na akhemi kevüdhi na acülawa akhweti-jenka keni jü tsü kitegüya, tsüna meter deni.

²⁸Anyiwa tsüna hi ssisen akhweti-jenka acülawa na akhemi kevüdhi ndukuwa wi du. Nu ma akhweti-jenka lenwa tsü kitegüya, nu tsüwa tsü la akhemi kevüdhi ameiwa wi akhweti-jenka len tsü meceqe.

²⁹Ciwi aghikehiepenthu, keshondhi ketiwa nu ndukuwa keshondhithu ketikesie na akhweti-jenka kepathu meceqe. Akhweti-jenka hawa ha la keshonthu wi jjenkubhithu na ben. Ma kesie na meter ngwe nu manga nu ma kemeza na meter taghakeni nu gishü pahan.

³⁰

³¹Ajjen-keshondhi ketiwa tsüna akhemi keshondhi kepawa jentan ben, nu alen chuli ma keshon miwi palm tonthu tsiton pi chitheng. Acükha tazen sasen nu akhweti-jenka hawa wi duben.

³²Anyiwa na hi ssinu nishu khweti-jenkawa wina akhemi kevüdhi ndukuwa wi du. Ma akhweti-jenka kedulen tsü kitegü, nu tsü ketikesie na kepathu makesü.

³³Ciwi aghikehiepenthu, jjen keshondhi ketiwa nu ndukuwa keshondhithu tsüna akhweti-jenka len kepathu meceqe kitegüya. Ciwi jjenkubhi na tsüdila vüben, nu jjen keshondhi ketiwa wi la ben. Ma kesie na meter ngwe nu manga, nu ma kemeza na meter taghakeni nu gishü pahan.

³⁴Nu jjen keshondhi ketiwa ha akhemi keshondhi ameiwa jentan ben. Kedulen chuli ma keshon miwi palm tonthu tsiton theng. Acükha tazen sasen nu akhweti-jenka hawa wi kiben.

³⁵Tsaseng wi anyiwa tsüna hi ssinu aghawa khweti-jenka len wi du. Ma tsü kitegü nu tsü ketikesie na kepathu meceqe.

³⁶Tsüthu ti tsü la aghikehiepenthu, ndukuwa keshon tsi kesa, jjen keshondhi ketiwa kesü, nu jjenkubhi pi kevüli theng. Ma kesie na meter ngwe nu manga, nu ma kemeza na meter taghakeni nu gishü pahan.

³⁷Kedulen jjen keshondhi ketiwa tsüna akhemi kevüdhi ameiwa jentan ben. Alen chuli ma keshon miwi palm tonthu tsiton pi chitheng. Acükha tazen sasen nu akhweti-jenka hawa wi kiben.

³⁸Akhemi kevüdhi ameiwa wi ajjen kesü sapi akhweti-jenka len ndukuwa aghawa tsü meshiki theng. Tsüwa tsüna sha sennu keshondhi ketiwa akhemi kevüdhi jentan kebenwa wi tsü duben, nu ciwi mathu na aghangsathu mabenben pi ahhansha sapi mecang ketenthu tsü bhuden.

³⁹Jjen keshondhi ketiwa hawi miz mejü na ben, ghapili qho kenini ben. Mizthu ha miwi asahangthu ahhansha kesa, maben pi kemecang ghena le, kesami hhansha kesa le nyelela kedhineng kekinyi ghena lela pi pathiden.

⁴⁰Ajjen keshondhi hana ameiwa miz tsütiti kesa mejü, aghawa khweti-jenka wi kedulen ghapili wi kesüsü na ben.

⁴¹Asahangthu pi ahhansha kesa pi pathi keten miz saghula tazen na ben: mejü na keshondhi non wi nu mejü na akhemi kevüdhi wi ben.

⁴²Ajjen sapi meshi ketheng non wi alon pi kesa miz na ben, nu tsüthu miwi asahang mabenben mecang pi kekinyi ghena kiden-kesha den. Tsüthu kemisi na sentimeter deni, nu tsüthu kedha na sentimeter achentagü nu manga ketikesie meceqe. Asahangthu pi ahhansha kesa ghena pathi keten tsanqaithu tsüdila pi mizthu miwi chiden.

⁴³Mizthu katen kevü kekhwe na milimeter achentagü nu manga na ben. Ahhansha sale kesa asa tsüdila pi miz hathu miwi keleden.

⁴⁴Tsaseng wi ma hi ssigho akhemi kevüdhi ndukuwa wi chi, ciwi ajjen keshondhi sha ketheng keni na ben; kesü na akhweti-jenka aghawa kete wi ben nu acülawa peghe ben, nu kepawa na khweti-jenka acülawa kete wi ben nu aghawa peghe ben.

⁴⁵Anyi tsüwa na ajjen keshondhi acülawa peghe kebenwa tsüna Kekinyijjen wi kuli keten keqhaikedithu ghena le hi kiza,

⁴⁶nu ajjen-keshondhi aghawa peghe kebenwa tsüna mecang pi kekinyipen wi kekuli kesa keqhaikedithu ghena le khi. Keqhaikedithu tsüdila Zadok shicübvüghathu; tsüthu tsüna Levi mizza jawi na wala Apvüwa ketenpen wi kekuli salo kesathu ketan.

⁴⁷Anyiwa tsüna akhemi kevüdhi ndukuwa tsü kitegüya, tsüna meter deni ketikesie meceqe. Kekinyijjenwa tsüna niduwa nu tsü tuwi mecang pi kekinyipen kesü na ben.

⁴⁸Tsaseng wi ma hi ssinu Kekinyijjen wi kedulen jjen keshondhi wi du. Ma kedulen tsü kitegü, ma kedhu na meter keni nu gishü pahan, nu ma kemeza na meter tagü nu ma keshon kesha ghapili meter kesü nu gishü pahan.

⁴⁹Acükha sasen nu kedulen jjen keshondhi wi du kebenwa tsüna ma kemeza meter tagha nu ma kedhu meter tugho. Ciwi ma keton keni na kedulen ghapili kesüsü wi ben.