Read Northern Rengma Naga EZEKIEL 41 Bible Online

EZEKIEL 41 - Northern Rengma Naga bible

EZEKIEL 41

¹Tsaseng wi anyiwa tsüna hi ssinu keshondhi ma mnonwa Kemetha Pen wi tsü du. Ma ciwi du keben lenwa tsü kitegü, nu ma kedhu na meter kecheng,

²nu kemeza na meter manga. Alen katen ghapili keshon na ma kesha na meter keni nu gishü pahan. Ma keshondhi tsüwa la kitegü, kesie na meter ngwe nu kemeza na meter tagha.

³Tsaseng wi ma ajjen keshondhi tsü nduku ntsawa wi du. Ma alen ciwi du keben tsü kitegü: kedhu na meter kesü, nu kemeza na meter kecheng, ma katen ghapili keshon kesha na meter kecheng nu gishü pahan.

⁴Ma keshon tsü kitegü, ma ketikesie na meter tagha meceqe. Ajjen keshondhi hawa ma mnon wi keshondhiwa tsüna kawa. Tsaseng wi ma hi kiza, “Hawa ha na Kemetha ntsa Benwa tsüle.”

⁵Anyiwa tsüna Kekinyijjen keshon ndukuwa kesha kitegü, tsüna meter kecheng. Kekinyijjen kevü tsüdi wi ajjen keshondhi kizza ma kemeza na meter kenini sapi ma keshon shonki shan theng.

⁶Ajjen na asha kecheng, nu asha kesü wi keshondhi changha na Kekinyijjen sha tangwa wi ameiwa keshon tsüdi akekhuwa miwi ghabaki, isanu ajjen keshondhithu tsü yala ma keshon miwi bennu ma nonwa ndu thsüle kesalina.

⁷Tsalina Kekinyijjen keshondhithu tsüna ameiwa bennu ghang chithu ki ma shoni kecu ma kesha na makesü kesa ti muben. Ajjen keshondhithu khemiwa, Kekinyijjen keshon ameiwa tetsaki la tangwa keki len mezaqo keni sa theng, isanu ajjensha ssanwa wina anonwa pvüdhi sennu tangwa wi kiben.

⁸Ajjen keshondhithu hana akhemiwa na ma kesha meter keni nu gishü pahan, nu ciwi ajenka kesü sasen nu Kekinyijjen na ajjen keshondhi aghawa ajjen keshondhi wi duben; nu alen kesü na acülawa wi duben. Hi ciwi ayyiku kesü ma kemeza na meter keni nu gishü pahan Kekinyijjenwa tsü maben vü keben mu; tsüna ayyi miwi meter kecheng misiki, nu tsüna Kekinyijjen keshon kete wi ajjen keshondhithu gikezhü tsü meceqe. Ayyikuwa nu keqhaikedithu na ben keten jjenthu jüwi Kekinyijjen jonqhe apen kesü ma kemeza meter tagha na ben.

¹²Apen kaghacang katen kawa nidu wi Kekinyijjen kete wi ajjen kesü ma kesie meter jügha nu manga, ma kemeza na meter changha nu manga na ben; ma keshon kesha na meter keni nu gishü pahan tsüdi vü keculiben.

¹³Anyiwa tsüna Kekinyijjen ameiwa kitegüya, nu ma kesie na meter deni. Nu Kekinyijjen sengwa na wa apen kaghacang na kawa Kekinyijjen na nduwa kecu la meter deni.

¹⁴Kekinyijjen khemi pi apen kaghacang ghapili tsü wwala meter deni.

¹⁵Ma Kekinyijjen kesie tsü kitegü sennu niduwa wa kaghang pen ghapili qho pi wwala kitegüya, nu tsü la meter deni. Kekinyijjen wi kedulen keshondhi, Kemetha Pen nu Kemetha ntsa Pen

¹⁶tsüdi ma kedha na ki jjenkubhi kecu achan pi kemeshili shantheng. Jjenkubhi hathu ha khenya mehai

¹⁷Kekinyijjen anonwa wikeshon wina kila ajenkathu mili kecu wi atsiton pi chitheng,

¹⁸tsüthu tsüna palm nu cherubim tsi. Palm tonthu pi cherubim keshathilila ajjen keshondhiwa tsü vütheng. Cherubim kesü na ammi kenini

¹⁹pahanwa anyi mmi na palm kesüwa peghe, kepawa ssensitemi mmi na achanton kesü wi peghe ben. Tsüti pi ajjen-keshon tsüdi vütheng,

²⁰tsüna ajjen kedha na ki ajenkathu shoni kecu.

²¹Kemetha Penwa jenka donbvü tsüdila ketikesie meceqe. Kemetha ntsa Pen wi kedulen wi pala kesü ghang pi

²²achan pi kekinyipen kesa ti muben. Tsüna meter kesü nu gishü pahan misi nu ma kemeza na meter kesü. Ma ccügwendonbvü, ma ghanbvü nu ma wikeshonthu tsüdi achan pi kesa. Anyiwa na hi kiza, “Miz hawa ha Apvüwa ketenpen tuwi ngan ketenwa tsüle.”

²³Kemetha Pen wi kedulen kenten wi ajenka kesü nu Kemetha ntsa Pen wi kedulen kenten wila kesü na ben.

²⁴Ajenka keni tsüna ma mnon wi sha keculi ben.

²⁵Ajjen wikeshonthu miwi zhü ketheng ti, Kemetha Pen jenkathu miwi la palm tonthu nu cherubim tsithu tontheng. Ajjen keshondhi wi kedulen jenka na ameiwa tangwa wi achan pikemeju kesü na ben.

²⁶Ajjen keshondhi hawa miwi ghapili jjenkubhithu na ben, nu ma wikeshonthu tsüna achan pi ma tsi satheng.