Read Northern Rengma Naga EZEKIEL 43 Bible Online

EZEKIEL 43 - Northern Rengma Naga bible

EZEKIEL 43

¹Anyiwa tsüna hi ssinu nishu wi peghe keben khweti-jenkawa wi wha,

² nu hi ciwi Israel Nyiza keten kewegü kizali kesawa tsüna nishu wina gho keten mu. Anyiza hhai na atssükedone hhai ti sachi, nu ayyi wina wegü pi kizali sa.

³Kemanthi hawa hana Anyiza na Jerusalem yasa le kegho wi hi kemu, nu hi Khebar ghaku ghüsa wi kemu tsüti kesa. Ciwi hi ayyi wi qancadu nkhwen wa.

⁴Kewegü kekizawa tsüna nishu khweti-jenka pvüdhi sennu Kekinyijjen non wi dua.

⁵Apvüwa ghamu na hi pieki sennu akhemi kevüdhi ndukuwa wi du, ciwi Kekinyijjenwa tsüna Apvüwa nyankethang pi pongkea hi mu.

⁶Anyiwa tsüna ikete wi nganben, nu Apvüwa na Kekinyijjen wina hi ccüneng keben zaya:

⁷Keshü nyiwa, hi kadipen hewi ben. Hi hewi Israel jawi hang nu anuphanla mathu miwi kekhang senden. Israel nyithu le mathu kadimithu lela acenpvü kepathu kinyi nyelela mathu kadimithu kamangthu pi apen kemetha hawa wi vhü nu inyan kemetha tsü tsü nakhiya nbendha.

⁸Kadimithu na mathu kadijjenthu jenka cükha pen nu ajenka kedonthu sapi hi kekinyijjen jenka cükha pen nu ajenka kendonthu kheghe, isanu ithu jüwi keshondhi kesütan sa. Mathu na nankenontssü kekulithu sapi inyan kemethawa kenyen, tsalina hi ileben ketsu pvünu mathu yasa.

⁹Tsalina mathu acenpvü kepathu kekinyi teshi nu mathu kadimi kamangthu khupheghe nsathu yishü. Mathu na tsüti sa lethu hi anuphanla mathu jawi hang benden.”

¹⁰Apvüwa na khineng, “Keshü nyiwa, Israel nyithu wi Kekinyijjen cüki pi kizalo, nu mathu ya tsü cho tsü meshenya thsülo. Mathu ya mathu kesami kekulithu ghena jügheya thsü.

¹¹Tsaseng wi keujüla mathu na mathu kulikea ghena mathu jügheya lethu, Kekinyijjen kesa cho tsü khi mechan pi mathu kizalo; ma kesa yen, kedu nu keshhu len, ma tsiyen, kezanki-zanla yen tsüdi, ma yen nu kenie yen tsüdi. Mathu ghena hathu tsüdi zhüya, mathu ya khatinu tsüdi zankizanlaya khe mu nu ayen tsüdi nie shhu thsüle kesalina.

¹²Hawa ha Kekinyijjen yenwa; ayikhawa witsü vü keben pen tsüdi ketsatan nu kemetha.”

¹³ Hathu ha sennu Kekinyijjen kekitegü tsü makesü pi kekinyipen kitegüya. Ma ccü wi tsülen ma kedhu sentimeter deni nu kemeza sentimeter deni na vü keculiben, nu ameiwa maben kevü ma kemisi sentimeter ngwe nu manga ben.

¹⁴Kekinyipen ssanwa tsü ma ccü na ki ma shoni kecu kemisi na meter kesü. Tsü meiwa lethu ma katen kevü sentimeter deni, nu kemisi na meter keni. Tsü meiwa la ma katen kevü tsü sentimeter deni.

¹⁵Meiwa ntsawa ha miwi ahhansha kesathu pi mecang keten penwa ha la meter keni misi. Ma ccügwen mejü wi ma ghacüthu tsüna kepathu miwi misiki.

¹⁶Kekinyipen meiwa ntsa ha ma ketikesie na meter tugho meceqe.

¹⁷Anonwa tsü la ma ketikesie na meter tagü meceqe, nu maben kevü na sentimeter ngwe nu manga misi. (Atssülen tsüna sentimeter deni meza.) Kekinyipen wi kekipenthu na nishuwa ben.

¹⁸ Kemisintsa Apvüwa na hi wi khi, “Keshü nyiwa, hi mangwa pi no kiza ben khe ha kinayalo, kekinyipen tsü sacenya lethu no ahhansha kesathu pi tsü miwi mecang nu ahhansha kesathu jjü pi tsüthu keghü nu tsü sakemetha kesha saaben.

¹⁹Levi mizza wi keqhaikedithu, Zadok shicübvüghathu ketan na hi ketenpen wi du hi kekuli saaben. Hi Kemisintsa Apvüwa na ajüh ha khuchiben. No amesü zza süpon kesü pi mathu cü nu kesami ghena ahhansha kesü saaben.

²⁰No tsü jjü pahan khuya nu pi kekinyipen meiwa ntsawa wi ma ccügwen mejü wi ma ghacüthu, nu anonwa ccügwenthu, nu maben kevü tsüdi wi chiben. Hati kesa wi no kekinyipen tsü sakemetha kesha saaben.

²¹No amesü pi kesami ghena ahhansha kesa khukechiwa tsü khuya nu pi Kekinyijjen kevü na ameiwa apen mechanshu kesa kesü wi mecang den.

²²Tsü dhitsüwa wi no aneni süpon nyu ghojünkeya mangla nkemi khuya nu pi kesami ghena ahhansha kesa kinyiben. No amesü süpon pi kesa tsüti tsü jjü khupi kekinyipen tsü sametha ben.

²³Khathansha wi no tsü sacenya khe, amesü zza süpon kesü, nu khaghaneni süpon kesü manyi qho nyu ghojünkeya mangla nkemi khuya

²⁴nu tsü sennu hi wi gholo. Keqhaikediwa na amcü pi tsü keni miwi keghüki nu mecang pi hi kecü kesü saaben.

²⁵Ghanan tagü ghena ghanan kesü wi no aneni kesü, amesü süpon kesü, nu khaghaneni süpon kesü, tsüti pi kesami hhansha sapi hi cüben. Tsüthu tsüdila nyu ghojünkeya mangla nkemi nsathu yishü.

²⁶Ghanan tagü ghena keqhaikedithu na kekinyipen tsü sametha nu sen keten ghena kidenyaben.

²⁷Ghanan tagü tsü cen lethu keqhaikedithu na anyithu na mecang pi kekinyi nu gweghe kemehai ghena kekinyi tsüpi kekinyipen miwi chi shhuben. Tsaseng wi hi nthu tsüdi miwi ilebenkagha saaben. Hi Kemisintsa Apvüwa na khidha.”