Read Northern Rengma Naga EZEKIEL 44 Bible Online

EZEKIEL 44 - Northern Rengma Naga bible

EZEKIEL 44

¹Anyi tsüwa na hi ssinu Kekinyijjen kevü nishuwa akhweti-jenka meiwa wi shhu, akhweti-jenkawa tsüna khen thengla,

²nu Apvüwa na hi wi khi, “Akhweti-jenka hawa ha khen thengden, nu khiela sha nben. Anyi thola tsü sen thsü nten, kepaghenanye hi Apvüwa Israel Nyizawa ciwi na du. Tsü khen thengden.

³Isala kekhang sen keben kaditsawa na ciwi du hi ketenpen wi kemetha tsse dsaya mehai. Ma du nu anonwa katen wi kedulen jjen keshondhiwa wina akhweti-jenkawa wina bvüaben.”

⁴Tsaseng wi anyiwa na hi ssinu akhweti-jenka aghawa wina Kekinyijjen tuwa wi wa. Hi ghangchi nan Apvüwa Kekinyijjen tsüna ma keten kewegü kekiza tsüpi pong benla. Hi hi ketanla immi pvü ncüggü sen ayyi wi nkhwen dua,

⁵isa nan Apvüwa na hi wi khi, “Keshü nyiwa, no kemu nu kiza tsüdi ghena kekaketsü sayalo. Hi Kekinyijjen ghena ayen nu kenie yen tsüdi pi no kiza le saben. Anyi thothu na Kekinyijjen wi dushhuya kemehai sa thsü nu thothu na nye khe chü kaketsü saya.

⁶“Matang keten Israel nyithu tsü kizala, Kemisintsa Apvüwa, hi mathu na nankenontssü kekuli sa kegho tsü ghangcha ntendha le kizalo.

⁷Mathu na ayhu nkahan asang, ijüh kina nketenthu ya asa kethu nu ajjü pi kekinyi sapi hi cü keben jüwi Kekinyijjen wi kedu thsü ghena hi Kekinyijjen sapi nmetha thsü ladha. Tsalina inyithu na nankenontssü kekuli tsüdi kesa wina hi cenkethenjüh bheghedha.

⁸Mathu na hi Kekinyijjen wi kemetha keccüna kekulithu ghang meyala asangthu ya tsü kaghangwa sa thsüa.

⁹“Kemisintsa Apvüwa na khishiben, asang ayhu nkahan ijüh kina nketenthu kesüla hi Kekinyijjen wi dukeya nmi; asang Israel nyithu jawi hang ketenthu kesütanla dukeya nmi.”

¹⁰Apvüwa na hi wi khi, “Hi Levi nyithu na Israel nyithu wwa sennu hi teshi nu atsikezhüthu kinyi wa keathu kemeten pi cüben.

¹¹Mathu na akhweti-jenkathu hie nu Kekinyijjen wi kekuli sa nu hi kekuli saya mehai. Mathu na anyithu na mecang pi kekinyi ahhansha kesathu ghena asahangthu khukechi tsü pathiya mehai, nu mathu na anyithu kekuli sa nu kuli keben-u.

¹²Isala mathu na Israel nyithu ghena atsikezhüthu kekinyi kekuli kesa, nu hati kesa wina anyithu ssi wa sami thsü kesalina, hi Kemisintsa Apvüwa na kemeten pi mathu ncüthu yishü le kesa hi kekishen kedhu ntsa saben.

¹³Mathu na keqhaikedi ti hi kekuli sa nyelela katsüha lela ituwi kemetha kete wi wa nben, nyelela Kemetha ntsa Pen wi du nben. Hawa ha mathu na nankenontssü kekulithu kesa ghena kemetenwa tsü.

¹⁴Hi Kekinyijjen wi kekuli-jügha sa nchithu keyishü pi mathu cüben.”

¹⁵Kemisintsawa Apvüwa na khi, “Levi gei wi keqhaikedithu, Zadok shicübvüghathu na Israel nyithu kepa na hi wina khapeghe bvü lela mathu leben tsentsa sa nu Kekinyijjen wi hi kekuli sagho. Tsalina mathu na hi kekuli sa nu hi ketenpen wi gho, asa kethu nu ajjü pi ahhansha sapi hi cüben.

¹⁶Mathu ketan hi Kekinyijjen wi du, imiz wi kekuli sa, nu Kekinyijjen wi kekinyi kekuli saaben.

¹⁷ Mathu na Kekinyijjen kevüdhi ndukuwa wi khweti-jenka kedulen wi kedu wi mathu na linen thsümeni pvüya ben. Mathu na kevüdhi ndukuwa nyelela Kekinyijjen non wi keben wi assenthsü mangla pvü nben.

¹⁸Mathu na nshhüshü kesalina linen likeshonthsü nu linen patano pvüben, isala ageshi keqhan pvü nben.

¹⁹ Mathu na anyithu na ben ketenpen kevüdhi na ameiwa npi keshhu wi mathu na Kekinyijjen wi kekuli sa keben tsü wi kepvü thsümeni khushi nu pi kemetha jjen keshondhithu wi theng nsathu yishü. Mathu na athsümeni kemetha tsüpi anyithu patena[6] nsale kesalina athsümeni kepawa pvüya nsathu yishü.

²⁰ Keqhaikedithu na mathu li whi nyelela mathu lissen na kesiesie sa thsü yishü. Mathu na tsü maghanen wi npvüthu yishü.

²¹ Keqhaikedithu na kevüdhi ndukuwa wi npi kedu wi kisengtssü katsüha lela kejjü-u nye.

²² Keqhaikedi kesüla yisha kesa nza ya yishü; ma Israel pvünyimetha nyelela keqhaikedi kepa na shü kesa wubvü yaya mehai.

²³ “Keqhaikedithu na kemetha nu nkemetha kepapa südhe pi anyithu sansi ben, nu mangwa na keccüna yen wi metha nu nmetha khe tsü la pi sansi ben.

²⁴Ayen kesü ghena kicennali shagha lethu keqhaikedithu na iyenthu kicennali kebenwa tsü pendheben. Mathu na iyenthu kenie wina keccüna kho yenthu tsü nieben, nu mathu na Sabbath tsü sen methaben.

²⁵ Keqhaikedi kesü na ma bajja, nu ma tsanga nyelela ma cünyu kesü, nyelela ma tsüggü n-nuwa kesa kesü nkenyetsü keshü kamang kesüla kidhen nu keccüna yen wina nmethala kesa-u nye.

²⁶Ma metha nengya lethu ghanan tagü hie nbenthu yishü,

²⁷nu tsaseng wi ccüna Kekinyijjen kevüdhi ndukuwa wi du nu ma sakemetha ghena ahhansha saaben, ma Kekinyijjen wi kekuli sa nengya le kesalina. Hi Kemisintsa Apvüwa na khidha.

²⁸ “Keqhaikedithu na hi Israel nyithu ya abvüye kesüwi layi pi kepawa cü keten keqhaikedi kekuli mathu shei tsüna ben. Mathu na Israel jawi mathu keben-keyeng ben nben, nu hi mathu nsenthu keyishü tsüdiwa tsü.

²⁹Asu pi kekinyi, kesami ghena kekinyi nu kedhineng kekinyithu tsüna keqhaikedithu kedsakejjü, nu mathu na Israel wi katsüha khuthi pi hi kecüthu tsü yaya mehai.

³⁰Keqhaikedithu na Matheükedhi atuwa wi mukeya kemehai ntsa tsüdi nu katsüha pi hi kecü tsüdi tsüna mathu ji. Anyithu na amesa kegü kaghapen wi amesa be atuwa tsüpi keqhaikedithu kecü-u, isathu hi kemihhi na mathu jjen wi ben waben.

³¹ Keqhaikedithu na awa le asa lela ma ketanla keshü nyelela amesengthu tsü dsa nben.”