Read Northern Rengma Naga EZEKIEL 45 Bible Online

EZEKIEL 45 - Northern Rengma Naga bible

EZEKIEL 45

¹Ayyiwa tsü gishü nu ashei kesüsü pi mizza kesüsü kecü wi gishü kesü khuthi pi Apvüwa wi chiaben. Tsü na ma kesie kilometer taghakeni nu gishü pahan, nu ma kemeza kilometer tagha saaben. Tsü kevü maben wila metha ben.

²Tsü non wi tsü ayyi kesü Kekinyijjen ghena ketikesie meter 250 meceqe sa nu ma kevü tsüdi wi apen kaghacang meter ngwe nu manga na vü keculiben.

³Apen ha gishü pahan wi apen kesü ma ketikesie kilometer taghakeni nu gishü pahan nu kilometer manga tsüti kitegü shiya ben, tsü non wi Kekinyijjen nu tsüdi wila kemetha ntsawa pen saaben.

⁴Tsüna diyyiwa wi kemetha pen, Apvüwa Kekinyijjen wi kekuli keqhaikedithu ghena khuthi pi ketheng kesü saaben. Ciwi mathu jjen nu Kekinyijjen ghena pi theng.

⁵Apen hawa ha gishü pahan pi Levi nyithu Kekinyijjen wi kekuli kesathu shei saaben. Ciwi mathu na hang thsüle kesa ghena anyutithu benden.

⁶Kemetha pen shiwa tsüna apen kesie kilometer taghakeni nu gishü pahan nu kemeza kilometer keni nu gishü pahan tsüti khuthi pi anyunuti kesü sa nu Israel nyi kesü le kesü lela hang thsüben.

⁷Kekhang sen keben kaditsawa ghena la apen kesü ghüdhi ben. Kemetha pen na niduwa ggü na sasen wa Mediterranean Tssükedone nidu cu, nu nishuwa ggü na sasen wa diyyiwa nishu ggü cuben, isanu ayyi kesie na pi Israel mizza kesüsü kecü kesie makesü saaben.

⁸Apen hawa ha kekhang sen keben kaditsawa na Israel yyi pi ma shei sa ketenwa tsü, isanu ma anyithu pasha neng nbendha, isala diyyi kepathu tsüna Israel mizzathu ji saaden.

⁹Apvüwa Kekhangwa na khi, “Nthu na sie mtsü sami ghodha le, Israel Kekhang kesenthu! Nthu yasayala nu kepasha kekuli tsü teshilo. Mangwa na meshon nu atsentsa khe tsü salo. Nthu na khiela inyithu yyi wina mathu jügüshi neng nbendha. Hi kemisintsa Apvüwa, hapi nthu kizaben.

¹⁰ “Anyi tsüdila atsentsa wina pala kitegü nu nwhuthu yishü.

¹¹“Pala keqha kekideji efa nu matssü kekideji bath manyi meceqe saaben. Pi kekideji lethu homer, kede kewa wi hati shhugho ben: Homer 1 = efa 10 = bath 10;

¹²“Nthu pala kewhu wi hati saaben. gera 20 = 1 shekel[7] 60 shekel = 1 mina

¹³“Nthu na hati nu khukechi saben: Alli wwikeya wi Awhengsu : 60 wi gishü kesü Achentha : 60 wi gishü kesü Oliv dile : 100 wi gishü kesü (Bath pi tsü kede: 10 bath = 1 homer = kor 1) Khaghaneni : Israel amou tsüdi wi 200 wi kesü. “Nthu na asu pi kekinyi, asahangthu ma benben pi kemecang ghena, nu gweghe kemehai ghena kekinyi ghena asahangthu sengho ben. Tsüna nthu kesamithu teshiyale kesalina. Hi Kemisintsa Apvüwa na ajüh ha khuchi ben.

¹⁶“Ayyiwa wi anyithu tsüdila hathu khuchithu sennu Israel kekhang sen keben kaditsawa wi ghoben.

¹⁷Asahangthu ma benben pi kemecang, asu pi kekinyi, nu kisengtssü pi Israel mizzatentiwa maben ghena asha ketheü kho, Sabbath nu akho kepathu wi khukechi tsüna ma dulu. Ma Israel nyithu kesami khupia le kesa ghena kesami ghena kekinyi, asu pi kekinyi, ma benben pi kemecang kekinyi, nu gweghe kemehai kekinyi hathu ha khuchiben.”

¹⁸Kemisintsa Apvüwa na khi, “Asha atuwa wi atsathang atuwa wi nthu na amesü süpon ma cüki kemehai kesü pi ahhansha sa nu Kekinyijjen sametha ben.

¹⁹Keqhaikediwa na kesami ghena kekinyi hawa jjü pahan khuya nu pi Kekinyijjen jenka donbvüthu ccügwen mejü, nu kevüdhi ndukuwa kedulen wi khweti-jenka donbvüthu miwi chiben.

²⁰Asha tsüwa tagü ghanan wi nthu na tsüti sapi anyi kesü le kesü lela aghandu nkenye nyelela nchüla sami kethengthu ghena saaben. Hati kesa wi nthu na Kekinyijjenwa tsü sametha benden.

²¹ “Asha atuwa taghamejü ghanan nthu na Shukeya kho mini shhuben. Ghanan tagü chuli tsüdila azimi nkechi mesa dsaben.

²²Akho tsathang atuwa ghanan wi kekhang sen keben kaditsawa na amesü süpon kesü pi ma kesami nu anyithu tsüdi ghena ahhansha sa khuchiben.

²³Akho ghanan tagü tsüdi wi ma amesü süpon tagü nu khaghaneni süpon tagü, acüki kemehai pi ma benben mecang pi Apvüwa wi chiben. Ma ghanan tsüthu tsüdi wi aneni süpon kesüsü la pi kesami ghena ahhansha sa khuchi ben.

²⁴Amesü süpon tagü nu khaghaneni süpon tagü pi kekinyi kaghapen wila awhengsu liter tagha nu tagü nu gishü pahan, nu oliv deli liter kecheng khuchi ben.

²⁵“Kelishu kho lethu, asha tagüwa tagha nu manga ghanan wi mini shhuben, kaditsawa na ghanan tagü kaghapen kesami ghena ahhansha kesa tsü makesü ma benben kemecang wi kekinyi makesü, awhengsu nu oliv deli kekinyi makesü khuchi ben.”