Read Northern Rengma Naga EZEKIEL 46 Bible Online

EZEKIEL 46 - Northern Rengma Naga bible

EZEKIEL 46

¹Kemisintsa Apvüwa na khi, “Nishu wi khweti-jenka akhemi kevüdhi ndukuwa wi kedulen wi tsü kekuli tsathang tugho jüwi tsü khen nthengthu yishü, isala tsüna Sabbath nu Asha Ketheü kho tsathang wi tsü sha ben.

²Kekhang sen keben kaditsawa na keqhaikedithu na ma benben pi mecang pi ahhansha sa nu gweghe kemehai kekinyi sa keben jüwi akhemi kevüdhi ameiwa wina akhweti-jenka kete wi kedulen jenka keshondhi ketiwa wi du nu khweti-jenka donbvüthu kete wi ngan benden. Ma ciwi akhweti-jenka wi kinyi nu shhu neng nsathu yishü. Npi keminu chu akhweti-jenka tsü khen yishü.

³Sabbath tsüdi nu Asha Ketheü kho tsüdi wi anyithu tsüdila akhweti-jenka tuwi kukedu Apvüwa kinyi ben.”

⁴Sabbath tsathang wi kekhang sen keben kaditsawa na ma benben mecang pi ahhansha kesa ghena khaghaneni zza tugho, khaghaneni süpon kesü tsüdila ma cüki kemehai sennu Apvüwa tu wi ghoben.

⁵Khaghaneni süpon kesü pi awhengsu liter tagha nu tagü nu gishü pahan wwaya, nu khaghaneni zza kesüsü wi ma mangwa pi chi mvu ben khe pi wwa nu sengho ben. Asu pi kekinyi tsüdi wi oliv deli liter kecheng cheng sengho ben.

⁶Asha Ketheü kho wi ma amesü zza süpon kesü, nu khaghaneni zza tugho nu khaghaneni zza süpon kesü tsüdila ma cüki kemehai khuchi ben.

⁷Amesü süpon kesüsü nu khaghaneni süpon kesüsü tsüdi wi awhengsu liter tagha nu tagü nu gishü pahan, nu khaghaneni zza kesüsü wi kaditsawa na mangwa khuchi mvu khe pi wwa sengho ben. Oliv deli liter kecheng pi awhengsu pi kekinyi tsüdi saghu yaben.

⁸Kaditsawa na khweti-jenka kedulen keshondhi ketiwa tsü teshi nu ma kedulen witsü shhu neng nsathu yishü.

⁹Anyithu na akho katsüha wi lela Apvüwa kinyi le ghothu, thothu na akhweti-jenka aghawa na du khe kinyikeya seng wi tsüthu na akhweti-jenka acülawa wina shhu, nu thothu na khweti-jenka acülawa wina du khe tsüthu na aghawa khweti-jenka wina shhu aben. Thola ma kedulen wina shhu neng nben, isala ma kejentanwa wina shhu aben.

¹⁰Kaditsawa na anyithu na duthu ma la du nu anyithu na shhuthu la shhu, isaben.

¹¹Kemishu tsathang nyelela akho tsathang wi amesü süpon kesüsü nyelela khaghaneni süpon kesüsü wi asu pi kekinyi liter tagha nu tagü nu gishü pahan pi wwaben, nu kinyi kebenwa na khaghaneni zza kesüsü nu ma mangwa pi chi mvu khe wwaben. Oliv deli liter kecheng pi asu pi kekinyi tsüti kesa tsüdi gweghe ben.

¹²“Kekhang sen keben kaditsawa na pala pi Apvüwa kecü wi ma benben mecang pi kekinyi le gweghe kemehai kekinyi lela sathu akhemi kevüdhi ndukuwa kedulen khweti-jenka nishuwa tsü sha pi ma cüben. Ma Sabbath tsathang wi sa keten ti kekinyi saaben, nu ma keshhu seng wi akhweti-jenka tsü khen aben.”

¹³Apvüwa na khi, “Ghanen kaghapen wila khaghaneni zza mapi kesü ji nyu ghojünkeya mangla nkemi pi ma benben mecang pi Apvüwa kecü saaben. Kekinyi hawa ha ghanan kaghapen wila nsathu yishü.

¹⁴Ghanan kaghapeng wi awhengsu kilogram kenini pi oliv deli liter kesüsü pi kuwenghu le kesalina saghu pi kekinyi saaben. Kekinyi pi Apvüwa kecü hawa ha anuphanla satezü ben.

¹⁵Khaghaneni zza, awhengsu, nu oliv deli ha anuphanla ghanen kaghapen pi Apvüwa cüben.”

¹⁶Kemisintsa Apvüwa na ajüh khuchi, “Keujüla kekhang sen kebenwa na ma yyi kahe wi lela pi aju sapi ma tsa kesü cü lethu, tsüna atsa tsüwa ji sa nu pi atheghi keben saaben.

¹⁷ Isala kekhang sen kebenwa kaditsawa na ma yyi kahe wi lela pi ma kekuli sa kebenthu kesü le kesü lela cü lethu tsüna Pi Kecüneng Mapi[8] kegho wi kaditsawa ji sa neng shaben. Tsüna ma ji nu ma nu ma tsathu ketan tsüpi anuphan mathu ji saya mehai.

¹⁸Kekhang sen kebenwa kaditsawa na anyithu keben mangla khuya yishü. Ayyi kahe pi ma tsathu cü lela tsüna pi ma cü ketheng yyi wi pi nsathu yishü, isanu ma inyithu keben khuya nu mathu npasha le kesalina.”

¹⁹Tsaseng wi anyi tsüwa tsüna hi ssinu akhemi kevüdhi ndukuwa acülawa akhweti-jenka kete wi kedulen jjen keshondhithu na aghawa peghe keben wi tsü du. Hathu hana niduwa apen kesü keqhaikedithu ghena ajjen keshondhi kemethathu. Ma ajjen keshondhithu tsütson pi hi ccüca,

²⁰nu ma khi, “Apen hawa ha keqhaikedithu na kesami ghena ahhansha kesa ghena kekinyi sa tsüpi shvu, nyelela kedhineng, nu awhengsu pi kekinyi mesa kegü pen, pala kemetha mangla sennu akhemi kevüdhi amei wi shhu nu anyithu patena nsale kesalina.”

²¹Tsaseng wi ma hi ssinu akhemi kevüdhi na ameiwa shhu nu ciwi ma ccügwen mejü qho keshondhi zzapfü kesa, ma kesie meter ngwe, nu ma kemeza meter tagha manga keben pi hi ccüca.

²³Kesüsü tsüdila alon pi wikeshon zhüpi tsü vü, annibhon zhü pi ma keshon shonki theng.

²⁴Anyiwa tsüna hi kiza, “Hathu ha nu Kekinyijjen wi amaghathu na anyithu khukechi ahhansha kesa pi shvu keten atssekesapen le.”