Read Northern Rengma Naga EZEKIEL 47 Bible Online

EZEKIEL 47 - Northern Rengma Naga bible

EZEKIEL 47

¹Anyiwa tsüna hi ssi neng sen Kekinyijjen kedulen wi tsü wha. Atssü na kedulen kekhu wi lle shhugho Kekinyijjen nishuwa wa ben. Atssü tsüna Kekinyijjen cülawa na llesen kekinyipen acülawa dugho ben.

²Anyiwa tsüna akhweti-jenka agha len wina kekinyipen wi hi ssisen shhu, nu hi ssisen nishuwa peghe keben khweti-jenka wi tsü vü wa. Atssü keben akuza kesü na khweti-jenka acülawa na lle shhugho ben.

³Anyiwa tsüna ma kekitegüji tsüpi nishuwa lle cü keben akuza tsü meter meza manga kitegüya, nu hi ya akuza tsü pvüdhi whalo kiza. Atssü tsüna iccünan nten ketan.

⁴Tsaseng wi ma meter meza manga kitegü nengya, nu atssü tsüna ikhu wi tan keghoa. Kepala meter meza manga cü neng nan atssü na igeshi nten tankiya.

⁵Ma meter meza manga kitegü neng nu ciwi atssü na dhu mtsü nu hi tsü pvüdhi meyala. Tsüna dhu mtsü pi atssüghe nkesa tsü pvüdhi meyala.

⁶Ma hi wi khi, “Keshü nyiwa, ha tsüdila chü kemehai sayalo.” Tsaseng wi anyiwa tsüna hi ssi neng sen aghüsa wi shhu,

⁷hi ciwi keshhu wi achantonthu ji ntsa na aghüsa ghapili wi keben mu.

⁸Ma hi wi khi, “Atssü hawa ha ayyiwa wi llesen nishuwa wa, nu Jordan yyiketijü nu Keshü Tssükedone wi duben. Tsüna llesen nu Keshü Tssükedone wi duthu atssü kisheng tsü sapi atssü metha thsüden.

⁹Akuzawa tsüna khiewa llewa khe atssü wi keben pala ghei nu anga tsüdila hang yaden. Akuza tsüna Keshü Tssükedone tssü tsü sapi metha thsüden, nu khiewa lle wa khe kahang sengho den.

¹⁰Engedi Tssü-kebvüpenthu wina sa sennu Eneglain Tssü-kebvüpenthu kecu tsüdila angakecüthu na atssükedone ghüsa wi ben, nu mathu na mathu nga kaghanthsü pi ciwi thsüden. Ciwi angathu alen kepapa kesa na ji pi Mediterranean Tssükedone wi keben tsüti sa benden.

¹¹Isala aghüsa wi awen nu acücengthu wi tsü atssü tsü samethaya nben. Tsüthu tsüna ciwi ben nu atssü kisheng kebvüpen saaben.

¹²Akuza ghüsa ghapili wi achan tonthu len kepapa kesa shigü nu atsse khuchi den. Tsüthu wa na jüwa nben, nu tsüthu na abi bündhi nben. Tsüthu tsü asha kaghapen abi ketheü bünden, kepaghenanye tsüthu tsüna Kekinyijjen wi akuza wina atssü lle keshhughowa tsü ten benden. Achan tonthu tsüna atsse bünchi nu tsüthu wa pi anyithu kesakinaa sapi mehaiden.”

¹³Kemisintsa Apvüwa na khi, “Hathu ha ayyi pi amizza taghakeni jawi kegishü nu Josef mizza na ashei keni muya keten ggüwa tsü le.

¹⁴Hi nthu bamyithu wi kekaketsü sa nu ijüh khuchila ayyi hapi mathu cüle kesa khitheng; tsalina khili tsüpi nthu jawi meceqe gishüyalo.

¹⁵“Aghawa ggü na Mediterranean Tssükedone wina nishuwa wa Hethlon nyunuti, Hamath Pass na wa Zedad nyunuti kecu.

¹⁶Berotha nu Sibraim nyunutithu (tsüthu tsüna Damaska kadiyyi yegu nu Hamath kadiyyi manyi jüwi ben), nu Tikon nyunuti (Hauran elakha kemeggü wi keben tsü) kecu.

¹⁷Tsalina aghawa ggü na Mediterranean nishuwa na sasen nu Enon nyunuti wi wa Damaska nu Hamath yegu ggü ton sennu tsüna aghawa shuben.

¹⁸“Nishuwa ggü na Damaska nu Hamath yyi manyi jü wina acülawa ton cü nu Israel yyi pi niduwa nu Gilead pi nishuwa sala Jordan ghaku pi manyi jüwi aggü sa sen wa Keshü Tssükedone ghüsa Tamar cuben.”

¹⁹Acülawa ggü na aghawa nidu meiwa Tamar wina sasen Kadesh Meriba wen wi wa; kepala aghawa nidu miwi Ejipt ggü ton sen wa Mediterranean Tssükedone kecu.

²⁰“Niduwa ggü na Mediterranean pi aggü sasen aghawa shula nishuwa Hamath Pass kecu.

²¹“Ayyi hapi nthu mizza jawi gishüya,

²²Tsüna keshüthangla nthu ji saaben. Asang nthu jawi hang nu hewi atsangathu pvüghakeya la nthu na ayyi kegishü wi mathu shei muya ben. Mathu pi Israel ahvu nyi ti saaben, nu mathu shei ayyi muya le kesa ghena Israel mizzathu gweghe akezen wwiben.

²³Asang hewi hang kebenthu tsüdi ma hang keben mizzawa jawi ma shei muyaben. Kemisintsa Apvüwa, hi khidha.”