Read Northern Rengma Naga EZEKIEL 48 Bible Online

EZEKIEL 48 - Northern Rengma Naga bible

EZEKIEL 48

¹Aghawa yyi ggü na nishuwa Mediterranean Tssükedone wina sasen nu Hetlon nyunuti Hamath Pass, Enon nyunuti wi wa Damaska nu Hamath kadiyyi manyi jüwi aggü tsü kecu. Amizza kesüsü tsüdila ayyi nishuwa aggü wi tsüna sasen nu nidu kepeghewa Mediterranean Tssükedone kecu. Aghawa na acülawa kecu hatinu ayyi gishü kesüsü muyaben: Dan Asher Naftali Manasseh Efraim Reuben Judah

⁸Ayyi kegishü tsü shiwa lethu kekuli makepa kesa ghena ghüdhi yaben. Tsüwa tsüna aghawa na cü acülawa kecu kilometer taghakeni nu gishü pahan, nu niduwa na wa nishu kecu la ma kesie makesü pi amizzathu kecü ti saaben. Kekinyijjen na ayyi kegishü hawa non wi benden.

⁹Ayyi kegishü hawa non wi kegishü makepa kesa ma ketikesie kilometer taghakeni nu gishü pahan, nu kilometer tagha khuthi kepa sapi Apvüwa wi chiaben.

¹⁰Keqhaikedithu na apen kemetha hawa wi ashei kesüsü ben ben. Nishuwa na wa niduwa kecu mathu shei na kilometer taghakeni nu gishü pahan, nu aghawa na cü acülawa kecu kilometer manga kitegü yaben. Apvüwa Kekinyijjen na apen hawa mnon wi benden.

¹¹Apen kemetha hawa ha Zadok shicübvügha wi keqhaikedithu ji saaben. Mathu na leben tsentsa sa nu hi kekuli sa, nu Levi mizza wi anyi kepathu na kesa ti kesazzi kekuli wi Israel nyithu ngweghe.

¹²Tsalina mathu na Levi nyithu sheiwa ayyi makepa kesa muya ben. Nu tsüna tsüdi miwi kemetha ntsawa saaben.

¹³Levi nyithu la keqhaikedithu yyi na acülawa ayyi kegishü makepa kesa tsü muyaben. Tsüwa tsü la nishu na wa nidu kecu kesie kilometer taghakeni nu gishü pahan, aghawa na cü acülawa kecu kilometer manga saaben.

¹⁴Ayyi khuthi pi Apvüwa kecü apen tsüna ayyi tsüdi jawi kemetha ntsa; nu tsü pen kesüla pi jeü nyelela kemili, nyelela kemili pi thola cü nben. Tsüna metha nu Apvüwa ji.

¹⁵Ayyi makepa kesa gilliwa ma kesie kilometer taghakeni nu gishü pahan pi ma kemeza kilometer keni nu gishü pahanwa tsüna kemetha nye, isala tsüna ghuzaghuti tsüdi kesen ghena. Anyunutiwa tsüna tsü mnon wi saaben,

¹⁶ma ketikesie meceqe nu ghapili meter 2250.

¹⁷Nu anyunutiwa kevü tsüdila ayyi meter 125 benden.

¹⁸Anyunuti tsü shiwa yyi lethu kemetha pen na acülawa ketsaki ntsa wi nishuwa na kilometer manga, nu kilometer keni nu gishü pahan, nu niduwa na kilometer manga, nu kilometer keni nu gishü pahan pi anyi anyunutiwa wi kahangthu ya alli keca ghena sen ben.

¹⁹Kesü le kesü lela anyunutiwa wi kahangthu nu amizza katsüha wina ghole khi lela ayyi tsü caya mehai.

²⁰Isanu ayyi kegishü tsüwa mnon wi khuthi pi kethengwa tsü ya ghapili ma ketikesie kilometer taghakeni nu gishü pahan kekitegü meceqe saaben, nu tsüna anyunutiwa keben pen tsüdi saghu.

²¹Ayyi nishuwa na wa niduwa kecu wi keqhaikedithu ji, Levi nyithu yyi, anyunutiwa nu kepa wi kebenwa tsüna kekhang sen keben kaditsawa ji. Tsüna sasen nu nishuwa wi nishu ggüwa kecu, nu niduwa Mediterranean Tssükedone kecu, nu aghawa lethu Judah yyi, nu acülawa lethu Benjamin yyi pi vüben.

²³Ayyi makepa kesa hana acülawa lethu amizza keben kepathu kesüsü tsüdila nishuwa ggü wina sasen nu nidu meiwa wa Mediterranean Tssükedone kecu aghawa na cü acüla kecu hati nu ashei kesüsü muyaben: Benjamin Simeon Issakhar Zebulun Gad

²⁸Pi Gad mizza cü ketheng yyi kegishü acülawa lethu aggü na niduwa cülawa Tamar wina sasen nu Gadesh Tssükebvüpen kecu, nu aghawa nishuwa na Ejipt ggü ghüsen nu Mediterranean Tssükedone wi duben.

²⁹Kemisintsa Apvüwa na khi, “Tsütinu ayyi tsüpi gishü pi Israel mizzathu sen thsüben.”

³⁰ Jerusalem nyunuti wi kedulenthu taghakeni na ben. Ma wikeshon mejü qho wi meter 2250 ben, nu ciwi akhweti-jenka kecheng cheng na ben, nu kesü miwi amizza kesüsü nyan na ben. Ma wikeshon aghawa khweti-jenkathu lethu Reuben, Judah nu Levi hathu nyan pi chitheng; nishuwa wikeshon wi lethu Josef, Benjamin nu Dan hathu nyan pi chitheng; acülawa wikeshon wi lethu Simeon, Issakhar nu Zebulun hathu nyan pi chitheng; nu niduwa wikeshon wi lethu Gad, Asher nu Naftali hathu nyan pi chitheng.

³⁵Anyunutiwa wikeshon mejü tsüdi kesie saghu meter hazar tugu. Khili nten na anyunutiwa ha nyan pi “Apvüwa Na Hewi Ben” isa cia tendha!