Read Northern Rengma Naga EZEKIEL 5 Bible Online

EZEKIEL 5 - Northern Rengma Naga bible

EZEKIEL 5

¹Apvüwa na khi, “Keshü nyiwa, njünnu keti kesü khuya nu pi npang kenye nu nssen tsüdila whilo. Nu nssen tsüpi kewhuchan wi whu nu gishü pi kecheng saya.

²Anyunutiwa vü cenkeya sengwi assen gishü kecheng wi kesü tsüpi ciwi mecang. Nu gishü kechengwa kepa wi la khuya nu no anyunuti na ameiwa vükeben wi no njünnu pi tsü kitsen pilo. Nu gishü kesü keben tsüpi ameghü wi cügi chilo, sathu hi hi njünnu pie nu tsü jügüden.

³Assen keu pi nthsü katen wi den pi thenglo.

⁴Tsaseng witsü keu khushi nengya nu tsü pi anni wi cüchi nu tsü ya mecang thsülo. Tsüthu wina anni na kesen kayi sen nu Israel mizzatenti maben wi waben.”

⁵Kemisintsa Apvüwa na khi, “Jerusalem wi ghangchilo. Hi ma pi ayyi mnon wi chi nu diyyi kepathu pi ma vü chile.

⁶Isala Jerusalem na ijüh khukechithu tsü matangla shun, nu mizzatenti kepathu miwi gheshighena, nu mizzatenti kepathu ma vü kebenthu miwi la ajüh meyale kesa pi ccücadha. Jerusalem na ijüh khukechithu meya mvu nu iyenthu hhaghedha.

⁷Tsalina Jerusalem, hi Kemisintsa Apvüwa, hi mangwa khiben khe kinalo. Iyen nkenie nyelela ijüh khukechi nkeya mvu wina no mizzatentithu no vü kebenthu miwi lela kekivvü passi chidha. No mizzatenti kepathu na sa keten yenthu nie wadha.

⁸Tsalina hi Kemisintsa Apvüwa, hi nghinyile kesa no kiza ben. Hi agükeccü pi nmiwi gho thsü nu mizzatentithu tsüdila tsü muya kemehai sa thsüden.

⁹No hi nanmeghü keten kekuli kesa tsüdi ghena hi hatu wi khiela npi kekuli nyelela haseng wi khiela sa nketen kemeten pi Jerusalem cüaden .

¹⁰Tsüwa ghena Jerusalem wi abajjathu na mathu tsangathu ghan dsa, nu atsangathu na abajjathu ghan dsaden. Nu nshüla kebenthu jügüzighe pi alen tsüdi wi chiaben .

¹¹“Tsalina hi hangkeben Nyiza sa keten ti — hawa ha Kemisintsa Apvüwa jüh le — kepaghenanye nthu na kekuli nkemehai ghena nu nankiqanan kekuli sa kethengthu tsüdi sapi hi Kekinyijjen nakhi kesalina, hi nanketizen nmila no shüchi cüden.

¹²N-nyithu gishü kecheng wi kesü na kesakinaa nu azeng wina anyunutiwa wi shüaden; gishü kecheng wi kesü na anyunuti na ameiwa njünnu pi süthiaben; nu hi gishü kecheng sakhenwa tsüpi ameghü wi vvüzighe chi nu njünnu pi mathu sü jügüden.

¹³“Hi ileben npi ghakeya chu nthu na ileben keminu nu ighekepvü kekhang tsüdi chüben. Hathu tsüdi sa kegho wi hi Apvüwa, no ajühtsentsa nkesa ghena hi ilebentsu ntsa sale kesa chüya den.

¹⁴No kevü wi mizzatentithu na no pvüdhi kewa tsüdila no nankeqhe nu ghüben.”

¹⁵Hi nmiwi ilebentsu ntsa nu kemeten pi no kecü wi, no kevü mizzatentithu tsüdila qhethiketen saaben. Mathu na no nan-nontssü nu nankeqheden.

¹⁶Hi no kedsakejjü kegho len khen nu no yala khhwenthi thsüaden .

¹⁷ Hi azeng kesun chi nu Aghangsathu ya ntsangathu ghan thsüaden, nu kesakinaa, yasayala, nu aghi kesun pi nthu pathi thsüaden . Hi Apvüwa, hi khidha.’