Read Northern Rengma Naga EZEKIEL 6 Bible Online

EZEKIEL 6 - Northern Rengma Naga bible

EZEKIEL 6

¹Apvüwa na hi ccüneng,

²“Keshü nyiwa, Israel yikhathu wi ghang nu hi ketsijüh pi mathu cülo.

³Israel yikhathu ya Kemisintsa Apvüwa jüh kinalo kiza lo — hi Kemisintsa Apvüwa na mangwa pi ayikhathu, yyishiphon thu, kaghakuthu, nu ayyiketijüthu kiza ben khe ha kinalo kiza lo. Hi njünnu kesü kesun pi anyithu na khiewi atsikezhüthu kinyiten khe yasa cüden.

⁴Kekinyipenthu pheghe nu hankedemvu kemecang kekinyipenthu tsüdila pakhhiaben . Ciwi anyithu tsüdi pi mathu tsikezhüthu tuwi na pathiaben .

⁵Hi Israel nyithu kamang pi vvüzighe cüden; hi mathu gü tsüpi mecang pi kekinyipenthu kevü tsüdi vvüzighe chi cüden.

⁶Israel nyunutithu tsüdila yasaden, isa nu mathu kemecang kekinyi nu atsikezhüthu tsüdi whengkhhi zigheaden, mathu hankedemvu kemecang kekinyipenthu pakhhi, nu mathu kekuli tsüdila nmiladen.

⁷Kahe lela anyithu tsüdi pathi, nu hangkeyathu na hi Apvüwa le kesa chüyaden.

⁸“Hi anyi pahan ya kepathi ghüya nu mizzatentithu jawi bvüzighe wa

⁹ciwi kushinyithu sa nu hang thsüden. Ciwi mathu na hi meshenya nu mathu leben wi kenondi nkemi ghena hi yisha nu atsikezhüthu pi imiwi mehaiki le sa kesa ghena hi kemeten pi mathu cü nu kimenni cüle kesa chüyaben. Nu mathu na mathu kekuli nkemehai nu nsala kemehai sa kethengthu ghena mathu ketanla mathu nan-nontssüaben.

¹⁰Mathu na hi Apvüwa, nu hi nyu kekitsan nu pateqhe jühthu tsüna kaghacang nyele kesa chüyaben.”

¹¹Kemisintsa Apvüwa na khi, “Nkwen misügüya! Nccü pi ayyi cüya! Israel nyithu na kekuli nkemehaithu nu nankenontssü kekuli sa kesathu tsüdi ghena hathana nu qailo. Mathu na aghi, nyelela kepica, nyelela kesakinaa ghei wina shüden.

¹²Kelensie wi kebenthu na naa nu shüden; teghatsan wi kebenthu na aghi wi shüaden; nshüla kebenthu na picathiaben. Mathu na ileben keminu kekhang tsüdi chüyaben.

¹³Akamangthu na atsikezhüthu nu kekinyipenthu kevü tsüdi wi khulizighe, nu ayyishiphon kemisi nu ayikha tsüdi miwi, nu achanton kemejjü, ayangton ketitithu ccü tsüdi wi, nu mathu na ahhansha kesa mecang pi mathu tsikezhüthu kekinyipen tsüdi wi khulizighe den. Ciwi ccüna anyi tsüdila hi Apvüwa le kesa chüya den.

¹⁴Anle, hi ikwen chang chi nu mathu diyyiwa yasa den. Hi Israel nyithu kahang pen kesüla nheila acülawa ayyikeshü wina shu aghawa Ribla nyunuti kecu pi kededi yyi sa cüden. Tsaseng wi anyi tsüdila hi Apvüwa le kesa chüyaden.”