Read Northern Rengma Naga EZEKIEL 7 Bible Online

EZEKIEL 7 - Northern Rengma Naga bible

EZEKIEL 7

¹Apvüwa na hi wi khi,

²“Keshü nyiwa, hawa ha hi Kemisintsa Apvüwa na pi Israel yyi wi kiza ben: Hawa ha ayyiwa maben ghena sakhendha le!

³“Israel, asakhenwa na ghodha. No ileben keminu chüyaden, kepaghenanye no mangwa satheng khe hi tsü ghena njüh kaghaten den. Hi no nankenontssü kahang yencüki tsüdi dhineng cüaden .

⁴Hi no heisha nyelela nanketizen mangla pi no ccüca nten. No nankenontssü kekulithu sa ketheng ghena hi kemeten pi no cüle ben, isanu no hi Apvüwa le kesa chüyaden.”

⁵Hawa ha Kemisintsa Apvüwa na khiben, “Wan ketizenkesa na ketsüli sen nmiwi gho tendha.

⁶Ha tsüdila cendha. Hawa ha asakhenwa. No nmidha.

⁷Asakhenwa na n-yyiwa wi hang kebenthu miwi ghoden. Ayikhathu miwi kekinyipenthu wi kemini sa keten nmila keten tsüwa na gho tendha, kivvükepe ketan saaden.

⁸“Khili wan no ileben keminu kekhang tsüdi chüya tendha. Hi no mangwa satheng khe tsüghena njüh kaghaten le saben, hi no nankenontssü kahang yencüki tsüdi dhineng cüden.

⁹Hi no heisha nyelela nanketizen mangla pi no ccüca nten. No nankenontssü kekulithu sa ketheng ghena hi kemeten pi no cüle ben, isanu no hi Apvüwa nu hi kemeten pi no cü ketenwa tsüle kesa chüyaben.”

¹⁰Ketizenkesa tsathang na gho tendha. Keyasakeyala na mahhi sabendha, kekapvüwa na misi ntsa sadha.

¹¹Keyasakeyala na gheshighena jipfü kuli chiden. Mathu ji mangla benya nben, mathu keben, mathu kemehai, nyelela anyankethang mangla benya nben.

¹²Matsü na ghoden. Asenlikesa ma men nmila keten tsathang na ghoden, kepaghenanye Anyiza kemetenwa tsüna anyi tsüdi miwi ghoden.

¹³Asententi kesathu la kesie hangben nu kededi tsü mu nengya nbendha, kepaghenanye Anyiza leben ketsuwa na anyi tsüdi miwi bendha. Nmehai ketenthu na hangya ntendha.

¹⁴Tutuwa khouchi, nu anyi tsüdila kidenya. isala thola aghi wi nwa, kepaghenanye Anyiza leben ketsuwa na anyi tsüdi miwi benden.

¹⁵Alentontithu wi kepaliben, nu ajjenthu wi kesakinaa nu kaghama na ben. Thowa na diyyiwa na ameiwa wi shu khe kepali nu shüaben, nu anyunutiwa wi anyi kesü le kesü lela kesakinaa nu kaghama wi hang meya laben.

¹⁶Ayyiketijüthu wi nkhetsü pateqhe kechi ti pahan na bvü sen nu ayikhathu wi bvüaden . Mathu tsüdila mathu kesami ghena anongü den.

¹⁷Anyi tsüdi kwen na keyha, nu mathu khu na kedheggü waben.

¹⁸Mathu na aleshithsü mphi nu kenenkhukhu waben. Mathu li whi, nu mathu tsüdila kejüghe yaden.

¹⁹Mathu na suna nu rükatssü pi keyisha tsanqai ti pi alentontithu wi khala ben, kepaghenanye Apvüwa na ma leben keminu meyisha kechi wi rükatssü nu suna tsüna mathu hangshaya nben. Mathu na tsüthu sen nu mathu sa mvu kebenwa tsü sapi alebenqan saya nben, nyelela mathu pvü kenma saya nben. Suna nu rükatssü tsüna mathu ssi nu kesami wi dua.

²⁰Kutitsü wi mathu na alon menkedhu ghena ammisa den, isala mathu na tsüthu sen nu nankenontssü tsikezhüthu sa. Tsalina Apvüwa na tsüthu pi mathu likedhamang sa cüdha.

²¹“Apvüwa na khi, hi asangthu ya mathu keben ghanfüya thsüaden, nu ayen nkeniethu ya mathu keben-keyeng tsüdi sen bvü nu tsü nakhi thsüaben.

²²Mathu na Kekinyijjen wi atsanqaithu pi kenyünkenyün sa nu nakhi lela hi mathu tang nten.

²³“Pala tsüdila kivvükepe bendha — anyi kepathithu na ayyi pongdha, nu anyunutiwa wi keyasakeyala na sha ntsa sadha.

²⁴Hi mizzatenti nkemehai ntsathu ssi nu hewi gho mathu ya nthu jjenthu nkaya thsüaden . Nthu jawi kezü ntsathu na hi mizzatentithu yala nthu kekinyipenthu yasa kegho wi mathu kempvüza nmila thsüaden .

²⁵Atu nkemi tsüwa na ghoden. Nthu na leben kecca bha lela muya nben.

²⁶Ketizenkesa na kesennie sen gho, nu jühtheü nkemehai na shapfü sen nu ghoaben . Nthu na atusenjüh-kechüthu na mangwa chüya khe khichilo kesa keshükene ben. Keqhaikedithu na mangla pi anyithu kesansi nmiladen, nu accülikesathu na mangla khipi nyu sansi-sangwe meya laden.

²⁷Kadimi na ma leben güccü, kaditsawa na kaghang teshia nu anyithu na messi pi kenen waben. Hi no kuli kethengthu tsüdi ghena kemeten pi no cü, nu no agükeccü pi nyu kecü ti pi no cüaden . Hawa ha hi Apvüwa le kesa pi no ccücaden.”