Read Northern Rengma Naga EZEKIEL 8 Bible Online

EZEKIEL 8 - Northern Rengma Naga bible

EZEKIEL 8

¹Ithu na kushiyyi wi kewa amapi tughowa asha tugho wi manga ghanan, ciwi Judah nyithu kadimi ccülikesathu na ijjen wi hi ssi nu donkiben. Zuli Kemisintsa Apvüwa kekhang na imiwi gho.

² Hi yaki ghangchi nan anyi tsi tsüna anni ti kesa mu. Nu ma geshi nten na ssanwa na ghang pi anni ti, nu tsüna meiwa na lezza misi pi wegüthsü keben ti.

³Ma akwen kesü chang chi nu ilissen mahhaya. Nu kemanthi hawa wi Anyiza ghamu na hi pieki pi tang ameghü wi chi nu hi ssisen Jerusalem wi wa. Ma hi ssisen kekinyijjen kaghapeng- jenka na aghawa kedulen non wi wa, ciwi Anyiza leben ketsu cüssi kecüwa tsikezhü tsüna ben.

⁴ Ciwi Israel Nyiza na benketen wegüthsü kesa, hi Khebar Ghaku ghüsa wi keben wi kemu tsüti kesa mu.

⁵Anyiza na hi wi khi, “Keshü nyiwa, aghawa ghangchilo.” Hi ghangchi nan kaghapeng-jenka kedulen kekinyipen kete wi Anyiza leben ketsu kecüssiwa tsikezhü tsü muya.

⁶Anyiza na hi wi khi, “Keshü nyiwa, mangwa saben khe no muben ma? Israel nyithu na hewi nankenontssü kekuli sa nu hi jügü nu hi kekinyipen kemethawa wina temeja pfüpfü keben ha ghangchi nanlo. No ha miwi lela kejüghekeya kekuli muyaden.”

⁷Ma hi ssi nu ameiwa ccühha wi kedulen witsü shhu nu ajjen-keshon wi akukebi kesü pi hi ccüca.

⁸Ma khi, “Keshü nyiwa, ajjen-keshon ha pakhhi du nanlo.” Hi tsü pakhhi du nan ajenka kesü mu.

⁹Ma hi wi khi, “Du nu nkemehaiwa tsü ghangchilo, ciwi mathu na nankenontssü kekuli saben.”

¹⁰Tsalina hi du nu ghangchi nan. Ajjen-keshonthu miwi amaghang nu aghangsa nkemetha nu Israel nyithu na kinyi keten kepathu tsithu don pi pong theng.

¹¹Israel nyi ccülikesathu achentagü pi Shafan tsawa Jaazaniya wwala ciwi ben. Kesüsü hankedemvu kemecangji kesüsü senden, nu annikekhu na hankedemvuwa wina shhugho ben.

¹²Anyiza na hi keü, “Keshü nyiwa, Israel nyi ccülikesathu na kekuthi wi mangwa saben khe no muben ma? Mathu tsüdila atsikezhü pi kepong sa ketheng ajjen-keshondhi non wi kinyipen. Mathu kemeshon khi ketenwa na: ‘Apvüwa na ithu mu nten le! Ma diyyiwa yishadha.’ ”

¹³Tsaseng wi Apvüwa na hi wi khi, “No mathu na tsü miwi lela nankenontssü sa keten muya- ben.”

¹⁴Ma hi ssi nu Kekinyijjen kaghapeng-jenka na aghawa shu nu nzathu na acenpvü Tammuz[3] keshü qaiki keben pi hi ccüca.

¹⁵Ma hi keü, “Keshü nyiwa, no tsü muben ma? No tsü miwi lela nankenontssüthu muya den.”

¹⁶Nu ma hi ssisen Kekinyijjen ccühha anonwa wi du. Ciwi kemetha pen wi kedulen kete wi kekinyipen nu accühha manyi jüwi, npvüza nkwe nu manga-u na ben. Mathu na mathu ghatsü pi kemetha pen wiwa sa nu nishu wiwa kukedu aghani keshhugho tsü kinyiben.

¹⁷Apvüwa na hi wi khi, “Keshü nyiwa, no tsü muben ma? Judah nyi hathu hana no hewi kemu nankenontssü kekuli tsüdi sa mele kesa nu yasayala kekuli pi diyyiwa tsüdi wi bvüzighe kechi tsüpi mathu leben kagha sa meya laben. Nyele, mathu na Kekinyijjen wi gho tsüthu kuli nu hi ya ilebentsu kayi nsathu yishü le. Mathu na hi nkenen saya kemehai chu[4] sapi hi kimenni keben ha ghangchilo!

¹⁸Mathu na ileben keminu kekhang tsüdi chüyaden. Hi mathu heisha nyelela nanketizen mangla pi mathu ccüca nten. Mathu na misiya kemehai chu magha nu hi wi khieden, isala hi mathu kekhie kina cü nten.”