Read Northern Rengma Naga EZEKIEL 9 Bible Online

EZEKIEL 9 - Northern Rengma Naga bible

EZEKIEL 9

¹Tsaseng wi Anyiza na jisha kechi hi zaya, “Hewi gholo, nthu kemeten pi anyunutiwa cüale kebenthu. Nthu ghighe sen gholo.”

²Tsümeyi, Kekinyijjen kaghapeng-jenka na aghawa wi ameiwa wina meshu tugho, kesüsü na aghighe kesüsü sen nu shhugho . Anyi kesü na linen thsümeni pvü nu pala kezhüji pahan sen keten na mathu gweghe den. Mathu tsüdila gho lezza pi kesa kekinyipen kete wi nganya.

³Tsaseng wi Israel Nyiza keten wegüthsü kesa tsüna ma ben keten Cherubim jawi na shagha nu Kekinyijjen wi kedulen wi wha. Apvüwa na anyi linenthsü mphi ketenwa tsü cichi,

⁴“Jerusalem nyunutiwa maben wi wa nu kemechan kesü pi anyunutiwa wi nankenontssü kesa kekuli sa ketheng ghena agüccü nu ketizensa keben nyi kesüsü tie wi jengyalo.”

⁵Nu hi Anyiza na anyi kepathu wi khi keben zaya, “Ma nie sen anyunutiwa chuli wa nu nyu pathilo. Kesüla nheishala, thola nantizen nsala.

⁶Keqhaithu, acalithu, nza cahlithu, ajjathu, nu ghanyithu pathilo. Isala kemechan pi atie wi chipvü ketenthu thola nkidhenla. Hewi hi Kekinyijjen wina sa shhulo.” Tsalina mathu na Kekinyijjen kete wi ngan keben accülikesathu wina pathi shhu.

⁷Anyiza na mathu wi khi, “Kekinyijjenwa nakhilo. Akamang pi tsü ccühha tsüdi pong cülo. Kuli wayilo!” Tsalina mathu na anyunutiwa wi anyithu pathi shhua.

⁸Anyithu pathi keben wi, ciwi hi ketan sa. Hi ayyi wi nkhwendu nu magha, “Kemisintsa Apvüwa, no Jerusalem miwi nleben-minu ntsa sa nu Israel wi anyi kesüla keben chu pathi khiale bendha kwe?”

⁹Anyiza na lunengchi, “Israel nu Judah nyithu na kesami keqhethiketenthu kesa wi sazzidha le. Mathu na ayyiwa tsüdi wi kepathi kekuli sa, nu kesazzi pi Jerusalem pongdha. Hi Apvüwa, mathu diyyiwa tsü yisha nu hi mathu mu nben le kesa mathu na khiben.

¹⁰Isala hi nanketizen pi mathu miwi chicü nten; mathu na nyu miwi mangwa sachi khe hi mathu miwi tsü sa chiaben .”

¹¹Tsaseng wi anyi linenthsü mphi ketenwa na kheneng gho nu kulicüki pi Apvüwa wi khi, “Hi no ahza khukechithu tsü sacendha.”