Read Northern Rengma Naga DANIEL 1 Bible Online

DANIEL 1 - Northern Rengma Naga bible

DANIEL 1

¹ Jehoiakim na Judah kadimiwa sakeya amapi kechengwa wi Babylonia Kadimiwa Nebukhadnezzar na Jerusalem ssikaghashen nu anyunutiwa tsü vüya.

² Apvüwa na ma ya Kadimi Jehoiakim ghanya nu Kekinyijjen wi keben pahan shuya thsüa. Ma atssüzüthu pahan ssinu Babilon wi ma cenpvü kekinyijjen wi wa, nu atsanqaithu khukeya tsüpi kekinyijjen keben ketheng-jjen wi chia.

³Kadimiwa na ma kekhu wi kedi ntsawa Ashpenaz ya Israel kushinyithu jawi kedi theghi nu atheghi kemehaithu wina kepvüza nyi pahan kessiyalo ahza khuchi.

⁴Mathu na atsimehai, meghe-metsa, sansi-mehai ketheng, wanwan chüya keten, nu akhüton kemehaithu saaben, isanu mathu na kadijjen wi kekuli kesa qothu sa thsü le kesalina. Ashpenaz na tsüthu sansi pi Babilon nyi jühjja si nu zhü chüya thsü.

⁵Kadimiwa na atsathang wila kadijjen wi kebenthu kedsakejjü nu kisengtssü tsü makesü pi mathu la cülo kesa ahza khuchia. Kesansi tsü hawa ha amapi kecheng kecen seng wi mathu na kadimiwa tuwi ghoben.

⁶Kessikeyathu jawi Daniel, Hananiya, Mishael, nu Azariya hathu tsüdila Judah mizza wina kegho nyi.

⁷Kedi ntsawa na mathu nyan ketheü cicüa: Belteshazzar, Shadrak, Meshak, nu Abednego.

⁸Daniel na kadijjen wi kedsakejjü tsü dsa nu kisengtssü jjü pi keccüna wi ma nakhi thsüa ntenle meshenya, tsalina ma Ashpenaz wi ma kiqa cülo keü,

⁹nu Anyiza na Ashpenaz sapi Daniel nantizenchi thsüa.

¹⁰Isala Ashpenaz na kadimiwa messi, tsalina ma Daniel wi khi, “Kadimiwa na no mangwa dsa nu jjüben khe südhe cüdha; nu keujüla nthu ghang pi pvüza kepathu ti nkesa qo sa lethu, ma hi pathiaben.”

¹¹Tsalina Daniel na Ashpenaz na kessi pi ma nu ma pvüshang kecheng kehiewa sa thsü kethengwa wi wa.

¹²Ma khi, “Aghang wwenja pi ikhang dsa thsü, nu atssü pi ikhang jjü thsülo, nu ghanan tagha jüwi ikhang ghang nanlo.

¹³Tsaseng wi ikhang pi kadijjen wi kedsakejjü dsa kegho kepvüzathu tsü ghape nanlo, nu ciwi khati ikhang muya khe no südhe yalo.”

¹⁴Ma mathu ya ghanan tagha tsüti sa nan thsüle cenya.

¹⁵Khathansha wi matsü na cen khe, mathu ghang pi kadijjen wi kedsakejjü dsa keghothu tsüdi miwi süqon nu zükayi muya.

¹⁶Tsalina tsü nten na mathu kehiewa na mathu ya kadimiwa na khukechi mithon wi aghang wwenja dsa wa thsüa.

¹⁷Anyiza na palakechü wi kemetsa-kemena nu sapichü nu metsabvü pi kepvünyi ha mejü cüa. Tsümiwi ma kemanthi nu amanthu khikemiliya kemehai pi Daniel cüa.

¹⁸Kadimiwa na ssan pi ketheng amapi kecheng kecen wi Ashpenaz na pvüzathu tsüdila ssinu Nebukhadnezzar wi wa.

¹⁹Kadimiwa na mathu tsüdila ccüneng, nu anyi kepathu tsüdi miwi Daniel, Hananiya, Mishael, nu Azariya hathuha ma nenya. Tsalina mathu na kadijjen wi keben nyi saya.

²⁰Kadimiwa na katsüha keü nyelela ajüh kedhu khi lela ha ma mejü na ma kadinyu maben wi tusencüki kekhi nyelela kedemathu miwi kishen tagha chüben.

²¹Daniel na kadijjen wi ben wa Persia Kadimiwa Sira na Babylonia nkakeya tsü cu.