Read Northern Rengma Naga DANIEL 10 Bible Online

DANIEL 10 - Northern Rengma Naga bible

DANIEL 10

¹Sira na Persia kadimiwa sakeya kechengwa mapi wi ketsijüh kesü pi Daniel, Belteshazzar lela ci ketenwa ccüca chi. Ketsijüh tsüna atsentsa, isala chüshiya le kesa na dhu mtsü. Kemanthi kesü wi tsü khimetha pi ma kiza.

²Tsü tsüwi hi hapta kecheng anongü ben.

³Hapta kecheng tsü npi kecen chu hi kedsakejjü kenyan nyelela asa mangla ndsa, kisengtssü mangla njjü, nyelela ili la nhhe.

⁴Amapi tsüwa asha atuwa ghanan nkwe nu mejü wi hi aghaku ketiwa Tigri ghüsa wi ngan ben.

⁵ Hi yaki ghangchi nan meshu kesü na linen thsümeni mphi nu suna kemehai geshikeqhan pvü keten mu.

⁶Ma gwo na wegü pi alon menkedhu kesü ti. Ma mmi na atsancwe kekiza ti, nu ma nyon na anni kekiza ti. Ma kwen nu ma ccü na wegü pi lezza mesi ketheng ti. Nu ma hhai na anyitenti kesü hhai ti saben.

⁷Hi ketan kemanthiwa tsü mu. Hi gweghe ketenthu na mangla nmu, isala mathu qhethiketen nu bvü wala kuthi.

⁸Ciwi hi ketan sa nu kemanthi mankesawa ha ghangben. Hi kezü nmitha sa, nu immi na kemili pi thola hi chüshi nkeya sa.

⁹Hi ma hhai zakeya wi hi mangla nchüla ayyi wi khuli du nu ciwi nkhwen wa.

¹⁰Tsaseng wi akwen kesü na gho hi ghantenya nu hi pieki pi shaghaya thsüa, isala hi ciwila kedheggüben.

¹¹Tangnyilowa na hi wi khi, “Daniel, Anyiza na no ghaliben, shagha nu hi mangwa khi le ben khe mehaitsü kina yalo. Hi kesun pi no wi chitheng le.” Ma ha kekhi seng wi hi kedheggüla shagha.

¹²Tsaseng wi ma khi, “Daniel, nmessi lalo. No chüshikeya muyale kesalina no satemeni le südhekeya ghanan atuwa nten na Anyiza na no kekhie yacüdha. No kekhie yakecü wina hi ghoben.

¹³ Persia kadinyu kaditsa nyilowa na ghanan nkwe nu kesü hi matang wale. Tsaseng wi nyilothu jawi kediwa Mikhael na gho hi kiqa, kepaghenanye hi ketan teshi pi ciwi Persia wi chitheng.

¹⁴Hi haseng wi n-nyithu miwi mangwa kulile ben khe pi no chü thsüle ghoben. Hawa hana haseng wi ghena kemanthi kesü.”

¹⁵Khathansha wi ma ha khi khe hi ayyi wi ghang nu ajüh nkhila.

¹⁶Tsaseng wi nyilo anyi ti kesawa tsüna ma kwen chang pi ikhemeggü kidhenchi. Hi ma wi khi, “Kediwa, kemanthi hawa ha ghena hi nzütha sa nu hi kekinen kekheneng meya ladha.

¹⁷Hi amagha kesü na ma pvüwa tuwi ngan keben ti sadha. Hi khati no ccünengya ben nu? Hi kezü nu ihatha nmiladha.”

¹⁸Kuti ma hi ghati nengya nu hi züpfüya.

¹⁹Ma khi, “Anyiza na no ghaliben, tsalina mangla no sapi leben ketizensa nyelela no pateqhe thsü nsa lalo.” Ma ha khi kechi wi hi zünengya nu khi, “Kediwa, no mangwa khile ben khe hi kizalo, no hi sapi mehai nengya thsüdha.”

²⁰Ma khi, “Hi mangwa ghena no wi gho khe chüben ma? Tsüna Atsentsa Lesüshen wi mangwa zhütheng khe pi no ccüca chile kesalina. Hi khili wa neng nu Persia kehie nyilowa ssinu kesali nsathu yishü ben. Tsaseng wi Gris kehie nyilowa na shhugho ben. Israel kehie nyilowa Mikhael ketan khe ciwi thola hi kekiqa nmi.”