Read Northern Rengma Naga DANIEL 11 Bible Online

DANIEL 11 - Northern Rengma Naga bible

DANIEL 11

¹Ma hi kiqa nu hi kekhwe tsüna ma dulu.

²Nu hi khili pi no kizale kebenwa tsüna atsentsa.’ Tangnyilowa na khi, “Hewi la kadimi kecheng na Persia miwi kekhang sen den nu tsaseng wi mejüwa na ghoben, ma kepathu tsüdi miwi ben kayi yaben. Ma kekhang nu keben-keyeng qe wina Gris kadinyu tsü nniben.

³“Tsaseng wi kadimi kempvüza kesü na shagha ben. Ma kadinyu keti kesü miwi kekhang sen nu katsüha lela ma mangwa sa mvu khe saaben.

⁴Isanu ma khang ntsa keben tsüwi ma kadipenwa tsü pakhhi pi gishü mejü saaben. Ma shicübvügha nkenye wi kadimithu na ma mithon wi kadisa den, isala mathu na ma sen kesa cu kekhang tsü ben nben.

⁵“Ejipt kadimiwa na zü shaghaben. Isalela ma kekhu wi süpahi kedi kesü na zükayi nu kadinyu dikayi kesa miwi kekhang sen den.

⁶Amapi pahan seng wi Ejipt kadimiwa na Siriya kadimiwa ssinu ashusa sayaben nu ma nga pi ma wi n-nuwa thsüaben. Isala ashukesa tsüna kesie wa nben, ma, ma wuba, ma tsanga, nu amagha ma nie kewathu tsüdila pathiaben.

⁷Tsaseng wi wan ma shilithu jawi pahan na kadimi sayaden. Ma Siriya kadimi süpahizi ssikesali, nu ma khwetikevü non wi du nu mathu pashaden.

⁸Ma mathu cenpvü tsikezhüthu nu suna nu rükatssü khuthi pi acenpvü tsüthu kecü tsanqaithu pvü nu Ejipt wi wa neng shaben. Kecca tsü mapi keu seng wi

⁹Siriya kadimiwa na Ejipt nkale ghoben, isala ma jügü neng pi bvü thsüaben.

¹⁰“Siriya kadimi tsüthu na aghi ghena kiden nu süpahizi kejon saghu yaben. Mathu jawi meshu kesü na atssüketi kesü ti mejjenghu nu ghinyi khweti tsü ssikesaliden.

¹¹Ejipt kadimiwa na ma lebenketsu wina wa Siriya kadimiwa matang nu ma süpahizi kejon yayaden.

¹²Ma khangkeya mukeya nu süpahi kejon pathikea ghena awisaden, isala ma keshüthangla khangya nben.

¹³“Siriya kadimiwa na wa neng nu süpahizi khenighani keben miwi la jiki saghu yaben. Matsü sati kesa kegho wi ma süpahizi mehaitsü kecenkeli sennu wa neng ben.

¹⁴Tsaseng wi anyi kejon na Ejipt kadimiwa matang nu shunben. Nu Daniel, n-mizzatenti wi anyi yasayala kesa pahan na mathu kemanthi mukesawa tsüghena male khvu saaben, isala mathu na nyu nchala ben.

¹⁵Tsalina Siriya kadimiwa na khwetikevü nyunutiwa tsü vü nu tsü yayaden. Ejipt süpahithu na nyu ssikesali nsala, mathu jawi kemehai ntsawa lela zü ntsa nsaladen.

¹⁶Siriya nyi nyu nka keghowa na kematang nmila mathu pi ma kemeshen saaden. Ma Khishiketheng Yyi wi tsü ngan nu tsüpi ma kekhang kekhu wi chitha yaden.

¹⁷“Siriya kadimiwa na süpahizi maben ssinu aghikesa cho kesü kidenben. Tsaseng wi ma ma ghinyiwa kadinyu yasale kesalina ma ssinu ashusa nu ma nga pi ma wi n-nuwa thsüaben; isala ma chowa tsüna haicenya nben.

¹⁸Tsaseng wi ma atssükedone kete wi mizzatentithu ssikesali nu tsüthu kejon nkayaben. Isala asang nyu ccülikesa kesü na ma pasha nu ma wikesa tsü khen cüben; ntsakhiwa ma Siriya kadimiwa wikesawa tsü khapeghe pi ma miwi chicüaden .

¹⁹Kadimiwa na ma yyi khweti kezhüthu wi kheneng waben, isala nyu ma pasha nu tsüna ma kahang sakhen saaben.

²⁰“Ma seng wi kadimi kesü na ghoben, ma ma kadinyu keben-keyeng ji kayi yale kesalina kedi kesü kesun pi khajana khü nu anyithu metenben. Isala matsü keu jüwi kadimi tsüwa pathiaben, isala tsüna anyi nyon kemu nyelela aghi wi nye.”

²¹Tangnyilowa na khimetha wa: “Siriya kadimi tsü shiwa lethu anyi nkemehai, kadikesa-u ma kemeshon nkemi nyi na saaden, isala ma nyu meshen nkeben wi gho nu acho sala kekhang peghe yaden.

²²Anyi kesü le kesü lela ma kematangwa na Anyiza jjen wi keqhaikediwa lela khu aben.

²³Ma nyu ssinu keponghu kesa wina mizzatentithu mechuben, nu ma mizzatenti kizza kesü miwi kekhang senben lela khang nu khang kayi waden.

²⁴Ma kitsan nchila keben-keyeng yyi kesü jügü nu ma bamyithu kesüla sa nkegho ji saaben. Tsaseng wi ma aghi wi keben nu atsanqaithu shukeya tsüpi ma senkeniethu jawi gishü yaden. Ma akhweti kezhüthu ssikesalile acho kidenben, isala ma ghena matsüwa na wan nmila den.

²⁵“Ma kempvüza ntsa sa nu süpahizi keti pieki nu Ejipt kadimiwa ssinu kesaliden, nu tsüwa la ma süpahizi keti nu kekhang ssinu ma kaghanineng den. Isala Ejipt kadimiwa mechu pi mehaicen meya thsüla den.

²⁶Ma tetsaki ntsa sa keten lenketsütsonthu na ma yasaden. Ma süpahithu kejonla pathia, nu ma süpahiziwa tsü dedi piaden.

²⁷Tsaseng wi kadimi keni na miz kesü wi donki nu gweghe dsaben, isala manyi kemeshen na mehai nben, nu manyi na kemechuliben. Manyi na mangwa nmvu khe muya nben, kepaghenanye tsü tsüwa na npi gho.

²⁸Siriya kadimiwa na Anyiza nyithu keccüna yasale kesalina atsanqai shukeya tsüdi pvü nu ajjen wi wa neng shaben. Ma ma kesa mvu sabenla nu ma yyi wi wha neng shaben.

²⁹“Tsaseng wi ma Ejipt tsü nka neng ben, isala tsü tsüwi pala makepa sa shhughoaben .

³⁰Rom nyithu na ahunjjen wina gho nu ma matangben, nu ma qhethiketen saben. “Nu ma aghepvüla kheneng gho Anyiza nyithu keccüna tsü yasale saaben. Ma keccüna tsüwa teshi kesathu jühkina den.

³¹ Ma süpahithu pahan na Kekinyijjenwa tsü nakhi ben. Mathu na atsathangla ahhansha kesa tsü khen nu Mankesa Qhethiketenwa tsü pieki chiaben .

³²Kadimiwa na milikemesa sennu anyi ma keccüna teshi kesathu mechu pi ma kiqaben, isala Anyiza sen nieketenthu na tsü kaghanineng den.

³³Anyithu ccülikesa kemetsathu na mathu kemetsa pi anyi kepa wi kejonla gishü yaben. Isala matsü pahan jüwi aghi wi mathu pahan pathi nyelela mecangthiaben, nu pahan tengya nu pi atssüzüthu sa thsüaben.

³⁴Anyi pathi keben wi Anyiza nyi na kekiqa pahan muyaben, anyi kejon na mathu wwaya lela apvükemenewa tsü saaben.

³⁵Accülikesa kemetsathu pahan pathiaben, isala ha ghena anyithu sametha yaden. Hati sa wa Anyiza na matsü ssan ketheng asakhen tsüwa kegho cuden.

³⁶ “Siriya kadimiwa na ma kenen saaden, ma acenpvü tsüdi miwila diki, Kekhang ntsawa Anyiza miwi la diki le khi nu awisa den. Anyiza na ma kemeten tsüwa npi kecu chu ma hati sayaben. Anyiza na mangwa kidentheng khe tsüti saaben.

³⁷Kadimiwa na ma bamyithu na kinyi kegho cenpvü nu nzathu na nenketen cenpvü lela nkhichila saaden. Ntsakhiwa ma acenpvü tsüdi nkhichi saaden, kepaghenanye ma acenpvü tsüthu tsüdi miwi lela dikile meshenden.

³⁸Nu ma akhwetithu khwe ketenwa cenpvü kinyiküden. Ma suna, rükatssü, alon menkedhu, nu aju kepa kemehai sapi ma bamyithu na khiela kinyi nkegho cenpvü kesüwa tsü cüden.

³⁹Ma ma khweti khwele kesalina asang cenpvü kinyi ketenthu senden. Ma nyu ma pi kekhang kesen nyi ti sa nu ssiya ketenthu nyuwakü, mathu pi kedi kemehai sa thsü, nu ayyi pi mathu kutimen sapi cüden.

⁴⁰“Siriya kadimi matsü sakhenwa na ghoa le keben wi Ejipt kadimiwa na gho ma ponben, nu Siriya kadimiwa na ma gorugari, goruthu, nu ahunjjen kejon sennu ma kekhang tsüdi pi ssikesali neng ben. Ma atssüketi kullu ti diyyi kejon nkaben.

⁴¹Ma Khishiketheng Yyiwa lela nka nu mathu hazar hazar pathiaben, isala Edom, Moab, nu Ammon diyyi wi teshi kethenghu tsü bvü yaben.

⁴²Ma diyyi tsüthu tsüdi nka kegho wi Ejipt lela heisha nben.

⁴³Ma Ejipt wi kekuthi keben suna, rükatssü, nu kepa wi pala men kedhuthu tsü sen bvüaben. Ma Libia nu Sudan manyi nkayaden.

⁴⁴Tsaseng wi nishuwa nu aghawa wi jühtheü tsüna ma pateqhe nu ma aghepvü ntsa pi kesali nu anyi kejon pathiaben.

⁴⁵Ma ma kadi nithsüjjen pi tssükedone nu Kekinyijjen keben yikha manyi jüwi lela saaden. Isala ma ciwi ma kekiqa nyi kesüla nmula shüaben.”