Read Northern Rengma Naga DANIEL 3 Bible Online

DANIEL 3 - Northern Rengma Naga bible

DANIEL 3

¹Kadimi Nebukhadnezzar na suna pi atsikezhü kesü saya, ma kemisi na meter nkwe nu tagü nu ma kemeza na meter kecheng ncenkhang, nu ma tsüpi Babilon yyi Dura deshentijü wi piekichi.

²Isanu kadimiwa na ma kekhu wi kedithu kaditsathu, ahngthu, ahng kizzathu, ayenkesenthu, kebenkesenthu, pendhethu, ayenkechüthu, nu ayyi ciwi kedithu tsüdila cighu chilo ahza khuchia. Mathu na Kadimi Nebukhadnezzar na atsikezhü pieki kethengwa tsü kesha kesa wi benlo sa.

³Kedi hathu ha tsüdila atsikezhüwa tsü kesha ghena gho saghu nu tsü tuwi ngankeya wi,

⁴anyi kesü na ahhai misikhhali thangchi, “Mizzatenti, anyi, nu ajühjja kepapa kesa nyithu!

⁵Nthu na tutuwa, tsü seng wi oboe, layer, zither, nu harp hathu; nu tsü seng wi achünong kepathu tsüdila tsü gweghe kekhou hhai zayaben. Akhwisa shagha meyi nthu na Kadimi Nebukhadnezzar na suna pi atsikezhü sapi pieki kethengwa tsü tuwi kukedula kinyiben.

⁶Anyi thowa na kukedu tsü nkinyi khe wan pi annikeqhe kisa kesü wi khala- chiaben.”

⁷Tsalina mizzatenti, anyi, nu ajühjja kepapa kesa nyi tsüdila achünongthu kekhou hhai tsü zaya meyi kukedula Kadimi Nebukhadnezzar na suna pi atsikezhü sapi pieki kethengwa tsü kinyi.

⁸Hawa ha Babilon nyithu pahan na matsü kemehaiwa tsü sennu Judah nyithu kimenni.

⁹Mathu na Kadimi Nebukhadnezzar wi khi, “Njenkeben Kadimiwa ya anuphan kahangwa salo!

¹⁰Njenkeben Kadimiwa na ahza kesü khukechi na akhwisa shagha meyi anyi tsüdila kukedula suna pi kesa tsikezhüwa tsü kinyilo,

¹¹nu anyi thowa na kukedula tsü nkinyi khe pi annikeqhe kisa kesü wi khalachiaben, isa khitheng.

¹²Ciwi no Judah nyithu pahan pi Babilon kadinyu kenoncca wi kedithu sa thsü ketheng Shadrak, Meshak, nu Adebnego hathu na Njenkeben Kadimiwa ahza khukechi tsü nkinalaben. Mathu na ncenpvü nkinyi nyelela no pieki ketheng atsikezhüwa tsü tuwi nkukedu le.”

¹³Tsü tsüwi kadimiwa na ma lebentsu ntsa saya nu meshu kecheng tsü ssinu ma tuwi gholo ahza khuchia.

¹⁴Ma mathu wi khi, “Shadrak, Meshak, nu Abednego, nthu na icenpvüwa tsü nkinyi nu hi suna pi atsikezhü sapi pieki kethengwa tuwi nkukedu mvule kesa tsüna ntsakhiwa kwe?

¹⁵Tsalina nthu na khilitsü tutuwa, oboe, layer, zither, nu harp hathu nu achünong kepathu kekhou tsüdi zaya meyi kukedula atsikezhü tsü kinyilo. Keujüla nthu na tsüti nsamvu lethu, wan nthu pi annikeqhe kisa kesü wi khalachiaben. Nthu tsü acenpvü pahan na nthu hangshaya benle meshenten kwe?”

¹⁶Shadrak, Meshak, nu Abednego, mathu na luneng, “Njenkeben Kadimiwa, ikhang na ikhang sheikhi le sa nben.

¹⁷Keujüla ikhang na ma kekuli sa ketenwa Anyiza na annikeqhe kisawa wi nu no kekhang wi ikhang hangshaya mehai, ma tsüti saaben.[2]

¹⁸Isala keujüla ma tsüti nsa lela, ikhang na ncenpvüwa tsü kinyi nten, nu no suna pi kesa atsikezhü pieki kethengwa tuwi la kukedu nten kesa Njenkeben Kadimiwa na chüti yalo.”

¹⁹Tsaseng wi Nebukhadnezzar na ma lebentsu ntsa saya, nu Shadrak, Meshak, nu Abednego hathu miwi aghepvü pi ma mmi nmieni sa. Tsalina ma ma nyithu na anni sapi hatu miwi tagü tughu sakayi thsülo ahza khuchia.

²⁰Nu ma süpahizi jawi kezü ntsathu ya anyi ha kecheng bhen pi annikeqhe kisa wi khalachilo kiza.

²¹Tsalina mathu na ma kecheng tsü agwomejuwa, agwomejuwa kaghazu, aliwen tsüdi pvü keten wi mathu bhenya nu pi annikeqhe kisa wi khala chia.

²²Kadimiwa na ahza khang ntsa khuchi nu anni sapi sa ntsawa satheng, tsalina annikeqhe tsüna anyithu pie wa kechi aghikehiethu tsü mecangthia.

²³Isanu Shadrak, Meshak, nu Abednego, hathu na kebhen tsü pvü nu annikeqhe kisa witsü khuli dua.

²⁴Nebukhadnezzar na ma keqhethiketen sa nu penshagha. Ma ma kekhu wi kedithu wi keü, “Ithu na meshu kecheng bhen pi annikeqhe kisa wi khalachi nsa kwe?” Mathu na luneng, “Anle, ithu na tsüti sale, Njenkeben Kadimiwa.”

²⁵Tsaseng wi ma keü, “Isathu, mangkesa na hi meshu mejü anni non wi kegoe keten muben nu? Mathu kebhen tsü nmidha, nu mathu mecangtena kesa mangla nmi, nu meshu mejüwa tsüna tangnyilo kesü ti mu ben le.”

²⁶Tsalina Nebukhadnezzar na annikeqhe keti kisa jenka witsü wha nu jishachi, “Shadrak, Meshak, nu Abednego! Kemisintsawa Anyiza maghathu! Shhugholo!” Isanu mathu na wan shhughoa.

²⁷Kaditsathu, ahngthu, ahng kizzathu, nu kadimi kekhu wi kedithu tsüdila saghu nu anni na mecang nkeyathu meshu kecheng ha ghangben. Mathu lissen nu mathu thsümeni la nmecang, nu mathu miwi annikhu han la nmi.

²⁸Kadimiwa na khi, “Shadrak, Meshak, nu Abednego, hathu Nyiza sengle! Ma ma nyilo kesun pi ma nondi nu ma kinyi keten hathu ha kekasha cüle. Mathu na hi ahza khukechi tsü nkinala mathu Nyiza ketan khe acenpvü kepa tuwi kukedu nkinyile kesa ghena mathu kahang khuchi.

²⁹“Nu hi khili ijühkhuchi kebenwa na mizzatenti, anyi nu ajühjja kepapa khi keten jawi anyi kesü le kesü lela Shadrak, Meshak, nu Abednego, hathu Nyiza nkinyikü lethu, ma ccükwen zandhi-zanghe, nu ma jjen yasa pi abhon sa cüben. Ciwi acenpvü kesüla hati kekashaya kemehai nmi.”

³⁰Tsütinu kadimiwa na Shadrak, Meshak, nu Abednego, hathu sapi Babilon yyi wi dikayi cüa.