Read Northern Rengma Naga DANIEL 7 Bible Online

DANIEL 7 - Northern Rengma Naga bible

DANIEL 7

¹Belshazzar na Babilon kadimiwa sakeya mapi atuwa wi hi aghaja wi aman kesü nu kemanthi kesü mu. Hi aman tsü zhüya nu hana

²hi aghaja wi kemu zhüketheng tsü: Ameghü na apen tsüdi wila sho gho nu atssükedone miwi khang ntsa mo ben.

³ aghangsa keti mejü na atssükedone ketiwa wina shhugho, mathu tsüdila atsi kepapa sa.

⁴Atuwa na ssensitemi kesü ti, isala amumu gisha ti kesa pvü den. Hi ghang keben wi agishathu tsüna dea. Aghangsawa tsü pieki pi anyi ti nganya thsü. Nu tsaseng wi anyi leben pi tsü cüa.

⁵Aghangsa keniwa na ghang pi aduweng na ngan keben ti. Tsüna amenni gü kecheng pi ma yha jüwi mekü pieden, nu ahhai kesü na tsüwa wi khi, “No wala asa dsaya kemehai chu dsaben lo!”

⁶Hi ghang keben wi aghangsa kepa wi kesü shhugho. Tsüna ghang pi shenkitemi kesü ti, isala ma ghatsü miwi awa gisha ti kesa mejü na ben, nu ma li mejü na ben. Kekhang pi ma cü ketheng ti mu.

⁷ Hi ghang keben wi aghangsa mejüwa na shhugho. Tsüna khang ntsa, amankesa, nu qhethiketen ntsa. Ma amighe yha tsüpi ma tsse nküchha, nu tsaseng wi tsüna tsüthu cüten. aghangsa kepathu ti nyela tsüna ma ghacü tagha pvüden.

⁸ Hi ma ghacüthu tsü ghang keben wi aghacü kepa wi kizza kesü na tsüthu jawi shhugho keten hi mu. Tsüwa tsüna aghacü ciwi keben kecheng pashüa. Aghacü hawa ha anyi nyon nu apang pvü nu kapvü wisa ntsa saden.

⁹ Hi ghang keben wi kadipenthu piaben pen satheng. Anuphan hangkebenwa tsüna kadipen kesü miwi donkiya. Ma thsümeni na miki pi aghola ti, nu ma lissen na asassen ti metha. Ma kadipen na accüqe nnikeqhethu miwi keben tsüna anniqhe pi kizaben,

¹⁰ nu anni ghaku kesü na ciwi na lle shhughoben. Anyi hazar kejon na ma kekuli saale ciwi ben, nu anyi khalatsi khalatsi na ma tuwi nganben. Ajühkekaghaten kekuli sa shhu, nu lesüshenthu shi pi theng.

¹¹Hi ghang keben wi hi khili lela aghacü kizzawa tsüna awisa nu kapvü keben zaya. Hi ghang keben wi aghangsa mejüwa tsü pathia, nu ma kamang pi anni wi khalachi nu yasa.

¹²Aghangsa kepathu mathu kekhang tsüna sen bvüdha, isala mathu ya matsü keu hang waya kemehai pi cütheng.

¹³Aghaja wi kemanthi hawa tsü wi hi anyi ti kesa kesü mu. Ma akulukeshü pi ma vü pvü nu hi tetsaki gho, nu anuphan hang kebenwa witsü wala ma tuwi benya.

¹⁴ Kekhang, kenyuwakü, nu kadi kekhang pi ma cüa, isanu mizzatentithu, anyi nu ajühjja kepapa kesa nyithu tsüdila ma kekuli sa thsüle kesalina. Ma kekhang na anuphanla benden, nu ma kadinyu na asakhen sa nben.

¹⁵Hi kemanthi ha kemu wi kivvü nu messi ntsa sa.

¹⁶Hi ciwi ngan kebenthu kesü wi wa nu ma ajjügi tsüdila khimetha pi hi kizalo keü. Tsalina ma tsü jjügi pi hi kiza.

¹⁷Ma khi, “Aghangsa keti mejü hathu hana kadinyu mejü na ayyi miwi shagha ketenthu le.

¹⁸ Nu Kekhang ntsawa Anyiza nyithu na kadi kekhang muya nu pi anuphanla theng den.”

¹⁹Tsaseng wi hi aghangsa mejüwa kepathu ti nyela qhethiketenkesa, ma lezza ccümezenthu pi ma tsse tsü ghan, ma mighe yhathu pi nkücha, nu tsaseng wi tsüthu miwi cüten kebenwa cüki tsü chüya mvu sa.

²⁰Nu tsüwa li miwi aghacü tagha na ben nu aghacü kesü asakhen wi shhugho aghacü kecheng pashü. Tsüna anyonthu nu apang ben nu kapvü wisa den. Tsüna kepathu miwi qhethiketen kesawa cüki tsü chüya mvu sa.

²¹ Hi ghang keben wi aghacü tsüwa tsüna Anyiza nyithu ssinu aghisa nu mathu miwi khangya.

²² Tsaseng wi anuphan hang kebenwa na gho ajühkaghaten nu Kekhang ntsawa Anyiza nyithu kenenwa wi khichia. Anyiza nyithu na kadi kekhang mukeya tsüna ghodha.

²³Ma jjügi khimetha pi hi kekizawa tsüna ha: “Aghangsa mejüwa tsüna ayyi wi kadinyu mejüwa nu kadinyu kepathu ti sa nketenwa tsüle. Tsü ayyi maben pacha pi nu tsü cüten shaben.

²⁴ Aghacü tagha tsüna kadimithu tagha kadinyu wi kekhang sen ketenthu. Tsaseng wi kadimi kepa wi kesü shagha den; ma hatu kadimithu miwi makepa sa nu kadimi kecheng pashaden.

²⁵ Ma Kekhang ntsawa Anyiza kidhenjüh khi nu Anyiza nyithu pashaben. Ma mathu keccüna yenthu nu akhothu kemiliale kiden, nu Anyiza nyithu na amapi kecheng nu gishü pahan ma kekhang kekhu wi benden.

²⁶Tsaseng wi tang wi ajüh kaghaten, nu ma kekhang sen bvüa, nu ma yasatha saaben.

²⁷ Ayyi wi kadinyuthu tsüdi kekhang nu keti pi Kekhang ntsawa Anyiza nyithu cüaden. Mathu kadi kekhang na asakhen sa nben, nu ayyi wi kekhang kesenthu tsüdila mathu kekuli sa nu mathu jühkina den.”

²⁸Hawa ha pala cüki kezhü sakhen. Hi qhethiketen nu phalagha sa, nu hi ketanla pala tsüdi meshen ben wa.