Read Northern Rengma Naga DANIEL 9 Bible Online

DANIEL 9 - Northern Rengma Naga bible

DANIEL 9

¹Xerxes tsawa Dariya, Mede nyiwa na Babylonia yyi kadinyu miwi kekhang sen keben tsüwi.

² Ma kekhang kesen mapi atuwa wi hi lesüshen kemethathu si nu Apvüwa na pi atusenjüh-kechüwa Jeremiya wi Jerusalem na amapi achentagü kededi wi benben le kesa kekiza cüki tsü meshenben.

³Nu hi atsentsa sa Apvüwa Anyiza wi khie nu ma wi keshükenela zi, nu aleshithsü mphi nu ayyinikhu wi donkiben.

⁴Hi Apvüwa iNyiza wi khie nu inyithu kesamithu khishü. Hi khi, “Apvüwa Anyiza, no di ntsa nu ithu na no kinyiküden. No leben tsentsa sa cenkethenjüh nie nu no ghaliki keten pi no ghali nu njühkekhi sa ketenthu ccücaden.

⁵“Ithu na samidha, ithu na nmehaila gho nu ithu na sazzidha. Ithu na no ithu ya salo khikechi tsü hhaghe nu no kemeshon pi ithu keccüca witsü na kheneng bvü le.

⁶Ithu na nmagha atusenjüh-kechüthu na n-nyan wina khipi ithu kadimithu, ithu miwi kekhang kesenthu, ithu baqhaithu, nu ithu mizzatentiwa maben wi kekiza tsü nkinaladha.

⁷Apvüwa, no keshüthangla kemeshonwa tsü saden, isala ithu na keshüthangla anyankekinyen sengho ithu miwi chiyaden. Tsüna ithu Judea wi nu Jerusalem wi nu Israel nyi no mathu jügüzighe pi diyyithu akete nu kelensie wi chi kesathu tsüdila tsüti le, kepaghenanye mathu na ntuwi leben tsentsa nsala.

⁸Ithu kadimithu, ithu kekhang kesenthu, nu ithu baqhaithu na kejüghekeya kekuli sa nu sami pi no nkenen sadha, Apvüwa.

⁹No nyu nantizen nu kesami teshi cüten le, ithu na no matang nu shun lela.

¹⁰O Apvüwa ithu Nyiza, no ithu na n-yenthu tsü nie nu hanglo kesa pi nmagha atusenjüh-kechüthu wina pi ithu kecü tsü ithu na nkina lale.

¹¹Israel nyithu tsüdila n-yenwa tsü bheghe nu no mangwale khi khe tsü nkina mvula le. Ithu na sami pi no nkenen sadha, tsalina no nmaghawa Mosa Yenwa wi zhüketheng kishen-keshithu tsü sengho ithu miwi chidha.

¹²No ithu nu ithu kekhang kesenthu miwi mangwa sale khi khe sadha. No ayyi wi anyunuti tsüdi miwi lela Jerusalemwa meten ntsa sadha,

¹³Mosa Yenwa wi kemeten cüki zhüketheng tsüti tsüdi ithu miwi ghodha. Isala khili lela, O Apvüwa ithu Nyiza, ithu na kesami wina kheneng nyelela no wi atsentsawa tsü nie nu no kenenwa sale nsaladha.

¹⁴O Apvüwa ithu Nyiza, no ithu meten cüle kiden nu tsü sadha, kepaghenanye no keshüthangla kemeshonwa tsü saden, isala ithu na njüh nkinala.

¹⁵“O Apvüwa ithu Nyiza, no Ejipt wina n-nyithu ssi keshhugho wi no kekhang pi ccüca, nu no kekhangwa tsüna khili kecu meshen benden. Ithu na samidha; ithu na sazzidha.

¹⁶No wakea tsüwi ithu khwe gho, tsalina no Jerusalem ghena leben ntsula yilo. Tsüna n-nyunutiwa, no kemetha yyishiphon wa le. Ithu na kesamithu sa nu ithu baqhaithu na nkemehai kekuli ghena ketekevü diyyithu wi keben nyithu tsüdila Jerusalem nu n-nyithu nkhichiladha.

¹⁷O Anyiza, hi kekhie nu keshükene kesa ha kinachilo. No Kekinyijjen yasakea tsü saneng cülo; anyi tsüdila no Anyiza le kesa chüya thsüale kesalina tsü saneng cülo.

¹⁸Ithu kekhie kina cülo, O Anyiza; ithu na agükeccü wi ben nu n-nyan senketen nyunutiwa na ketizensa keben ha ghangchilo. Ithu na kemeshon kesa ghena nye, isala no nyu nantizen keten ghena ithu na no wi nanketizen khieben.

¹⁹Apvüwa, ithu kekhie kina cülo. Apvüwa, ithu kesami teshi cülo. Apvüwa, ithu hhai kina, nu kulichilo! Anyi tsüdila no Anyiza le kesa chüya thsüale kesalina nminu lalo! Anyunuti hawa nu anyithu hana nji.”

²⁰Hi kekhie sakiben, hi kesamithu nu inyi Israel kesamithu khishü nu Apvüwa Anyiza na ma Kekinyijjen kemethawa tsü saneng cülo keshükene ben.

²¹ Hi kekhie sa keben wi hi kemanthi atuwa wi mukeyawa Gabriel tsüna pighe sen hi keben pen wi dugho. Tsüna minulen ahhansha sapi kekinyi tsüwi.

²²Ma khimetha chi, “Daniel, hi no kiqa pi atusenjüh-kekhi jjügi tsü chüshiya thsüale hewi ghoben.

²³No khathansha Anyiza wi keshükene shagha khe ma no luneng chidha. Ma no ghaliden, tsalina hi luneng kechi pi no kizale ghodha. Tsalina hi kemanthiwa tsü jjügi khimetha keben wi kina kaketsü sayalo.

²⁴“Anyiza na kesami nu nkemehai wi n-nyithu nu n-nyunuti kemethawa tsü teshichi keten matsü ssan pi ketheng na amapi achentagügü kesa tagü. Kesami teshi pi cü nu anuphan ketsatan pieki chiden, isanu kemanthiwa nu atusenjüh-kekhi tsü sacen nu Kekinyijjen kemethawa tsü sametha nengya thsüale kesalina.

²⁵Ha meshen nu chüyalo: Jerusalem saneng yalo ajüh khukechi tsüna wa Anyiza na kessikeya ccülikesawa kegho kecu amapi tagügü kesa tagü tughu saaben. Jerusalem lentonti pi akhweti kezüthu wwala saneng den, nu amapi achentugho nu keni kesa tagü tughu benden, isala tsüna agükeccü tsü kesü saaden.

²⁶Nu tsü tsü sakhen wi Anyiza na kessikeya ccülikesawa tsüpi atsentsa nkenye wi pathiaben. Anyunutiwa nu Kekinyijjenwa tsüna kekhang ntsa kekhang kesenwa süpahizi na gho yasa ben. Asakhenwa tsüna atssüketi ti Anyiza na kiden ketheng aghikesa nu keyasa sengho ben.

²⁷ Kekhang kesenwa tsüna amapi tagü anyi kejon ssinu ajühcenkeya zükeqhe kesü saaben, nu matsü tsüwa gishü pahan kewa seng wi ma ahhansha kesathu nu kekinyithu tsüpi asakhen sa cüaben. Qhethiketen Mankesawa tsüpi Kekinyijjen shoni Kemisintsa wi chiaben, nu tsüpi ciwi kechiwa na Anyiza na ma ghena kiden pi ketheng asakhenwa tsü npi kemetu chu ciwi benden.”