Read Northern Rengma Naga HOSEYA 13 Bible Online

HOSEYA 13 - Northern Rengma Naga bible

HOSEYA 13

¹Kheni tsüwi Efraim mizza na ajühkhithu Israel mizza kepathu na messi; mathu na yakila Efraim ghang. Isala anyithu na Baal kekinyi wina samia, nu tsü ghena mathu na shüaben.

²Mathu na khili kecu amighe, rükatssü pi atsikezhü sa, anyi leben pi matsi meshen nu anyi kwen pi cü keyathu tsü kekinyi wina samiden. Tsaseng wi mathu na khiben, “Ahhanshathu sapi tsüthu cülo!” Anyi na khatinu atsikezhü amesü süponthu tsi ti kesa tsü kimangya mehai nu!

³Tsalina anyi hathu na aghanen ajangcü ti nmiladen, akejan na ghanen mitu na nmila keten ti saaben. Mathu na aniegi wi ameghü na gho asugwen mopi bvü, nu anikhu ku wi annikekhu ti saaben.

⁴Apvüwa na khiben, “Hi Apvüwa, nthu Nyiza, Ejipt wina nthu ssi keshhughowa tsü. Nthu na hi khe Anyiza kepa wi nmi. Hi ketan nthu hangshawa.

⁵Hi ayyi keqha nu keshü wi nthu nonccaya.

⁶Isala nthu na ayyi kemehaiwa wi dukeya wi nthu pvü nma nu anonkwenya, tsaseng wi nthu na kapvü shagha nu hi malia.

⁷Tsalina hi ssensitemi kesü ti nthu ssikaghashen den. Hi shenkitemi kesü ti nthu len wi nthu ceng benden.

⁸Hi aduweng bvü kesü ma zza bhatagha kesawa ti nthu ssikaghashen, nu nthu zandhi-zanghe cüden. Hi ssensitemi kesü ti nthu ghan nu mapen na nthu pi aghangsa kesü ti mezüdhizighe cüden.

⁹“Israel nyithu, hi nthu yasa cüden! Isalethu, thowa na nthu kiqaya mehai nu?

¹⁰Nthu na kadimi kesü nu ccülikesathu khie, isala mathu na khatinu mizzatentiwa tsü hangshaya mehai nu?

¹¹Hi aghekepvü wi kadimithu pi nthu cü, nu ileben ketsu wi mathu sen bvüdha.

¹²“Israel kesami nu kesazzithu tsü zhütheng, nu zhü kethengthu tsüpi mehaitsü tsanqaitheng.

¹³Israel na hangya kemehai matsü kesü ben, isala pvüghaya le kebenwa meme tsüna apvü non wina nshhugho mvula keben ti, jüphon mtsü pi tsü ya meya.

¹⁴ Hi keshü yyi wina anyi hathu ha hangshaya nyelela keshü kekhang wina mathu kekashaya nten. Keshü, no adhagha sen gholo! Keshü yyiwa, no keyasa sen gholo! Hi anyi hathu tizen chi ntendha.

¹⁵Israel nyithu na kepagha ti mehai ben lela, hi ayyikeshü wina nishu meghü kisa kesun chiden, nu mathu tssükebvüpen nu atssükhang na keqha thsüaden . Tsüna ma men keben tsüdi sen bvüaden .

¹⁶Samaria na hi kematang ghena meten ncüthu yishü. Ma nyithu na aghi wi shüaben; memethu na ayyi wi pacha, nu nza atsa-npvü ketenthu pvü hanbhi cüden.”