Read Northern Rengma Naga HOSEYA 2 Bible Online

HOSEYA 2 - Northern Rengma Naga bible

HOSEYA 2

¹Tsalina no Israel nyithu pi “Anyiza nyithu” nu “Apvüwa na kaghalithu” isa cilo.

²Itsangathu, nthu jja na iwubvü nsa nu hi ma wuba nsala lela ma wi keshükene tenlo. Ma shenpfü-nyibvü qheza nu keqheza menkedsa kekuli nsala yilo kesa ma wi keshükenelo.

³Keujüla ma nkina lethu hi ma thsümeni ccen pi nu ma ya ma kepvügha ghanan wi kemissü tsüti sa thsüaden. Hi ma sapi ayyikeshü keqha kesü ti sa thsüa, nu ma kedighe wina shü thsüaden.

⁴Hi nanketizen pi ma tsangathu ccüca nten; mathu na keqheza menkedsa nkemejüghewa tsü tsangathu. Ma ma ketanla khi, “Hi kaghalithu, kedsakejjü nu atssü, asassen nu linen, oliv deli nu kisengtssü pi hi cü ketenthu wi waden.”

⁶Tsalina hi aghazüthu pi gha nu akhweti zhü pi ma len khen cüden.

⁷Ma ma zipvüzathu jügü waden, isala mathu ghangya nben. Ma mathu bhaben, isala mathu muya nben. Tsaseng wi ma hati khiben, “Hi iwuba atuwa wi kheneng whaden — hi kheni tsü khili miwi mehai nan.”

⁸Ma khiela hi asu, kisengtssü, oliv deli, nu ma pi Baal kekinyi wi kesen ghena rükatssü nu suna tsüdi pi ma cüten le kesa chü nten.

⁹Tsalina hi mazü tsüwi aju pi kecü asu nu kisengtssü tsü khunengya, nu pi ma thsümeni salo hi khukechi asassen nu linen tsü sen bvüaden .

¹⁰Hi ma zipvüzathu tuwi na ma thsümeni ccen, nu thola hi kekhang wina ma hangsha meyala ben.

¹¹Hi ma amapi nu asha kaghapeng sa keten nu Sabbath kemini sa keten khothu nu keccüna ghena saghu keccünengli ketenthu tsüdila pi asakhen saa cüden.

¹²Ma kekhi ma zipvüzathu na pi mathu kekuli salo pi ma cüle kesa ma ji kemeshentsse nu khhaghabvü tonthu tsü hi yasa cüden. Hi ma kemeshentsse lli nu kedsaujathu tsüpi agheja ceng thsüaden, nu aghangsathu na tsüthu yasa ben.

¹³Ma hi mali nu hankedemvu mecang pi Baal cü nu alon menkedhu pvü nu ma zipvüza jügübvü kesa tsüwa tsüghena hi ma meten cüden. Apvüwa na khidha.

¹⁴Tsalina hi ma ssinu ayyikeshü wi du nengden; ciwi hi kaghali jüh pi ma juyaden.

¹⁵ Hi ma kheni keben kemeshentsse lli tsüpi ma cü neng nu Kekivvü Yyiketijü tsü sapi kaghangkeben-jenka kesü sa cüaden . Ma Egipt wina keshhugho ma kepvünyi tsüwi ti ma hi luneng ben.

¹⁶Tsaseng wi ma kheneng kuti hi pi ma wuba le ci waben, ma khiela hi pi Baal[4] le ci nbendha.

¹⁷Hi khiela ma ya Baal nyan teng thsü nbendha.

¹⁸Tsü tsüwi hi aghangsathu nu awathu tsüdi ssinu cenkethenjüh kesü saaden, isanu mathu na inyithu nkenen sa thsü nben. Hi ayyiwa wi aghighe tsüdila, njünnu nu alamughothu tsüdi khupi, nu inyithu yala cca nu yazishu hangya thsüaden .

¹⁹Israel, hi no pi iwubvü saaden; Hi ajühtsentsa nu leben tsentsa saaden; Hi ghaliki keten nu nanketizen pi no ccüca nu no pi anuphan iji saaden.

²⁰Hi khishikechi jüh nie nu no pi iji saaden, nu no hi Apvüwa le kesa chüyaben.

²¹Tsü tsüwi hi inyithu Israel kekhie luneng cüden, Hi atsangho pi ayyi miwi chicü, nu ayyiwa na asu, kemeshentsse, nu olivthu bünya thsüaben.

²³ Hi inyithu pi ayyiwa wi benya thsü, nu mathu sapi mehaikayiya thsüaden . Hi “Nkaghali” le ci ketenthu wi hi kaghali pi ccücaden, nu “Inyi nye” le khi ketenthu wi hi “Nthu na inyi” le isa khi waden, nu mathu na “No ithu Nyiza” le isa luneng den.