Read Northern Rengma Naga HOSEYA 5 Bible Online

HOSEYA 5 - Northern Rengma Naga bible

HOSEYA 5

¹Ha kinayalo, nthu keqhaikedithu! Kina kaketsü sayalo, Israel nyithu! Kinayalo kadi theghithu! Nthu na atsentsawa sennu ajüh kekaghaten-u — tsalina agükeccü na nthu miwi ghoden! Nthu na Mizpah wi aca kesü, Tabor Yikha miwi kaghanthsü zanshigü pi kethen kesü,

²Akakia Nyunuti wi ayyiku kedhu kesü sadha, nu hi nthu tsüdi meten cüden.

³Hi Israel na khati kesa khe chüben, ma hi kuthiya nben. Ma leben tsentsa nsala gho, nu ma nyithu na hi nkinyi qo ladha.

⁴Anyithu nkemehai kekuliwa tsüna mathu na mathu Nyiza wi kheneng kegho khenben. Atsikezhü kekinyi kekhangwa tsüna mathu ghantenya, nu mathu na Apvüwa nchüladha.

⁵Israel nyithu wikesawa tsüna magha pi mathu matangben. Mathu kesamithu na mathu sapi accümeshü nu khuli thsü, nu Judah nyithu la mathu gweghe khuli.

⁶Mathu na mathu khaghaneni nu mesüsithu khupi ahhansha sapi Apvüwa cüle saden, isala tsüna mathu ghena kemehai mangla saya nten. Mathu na ma muya nben. Kepaghenanye ma mathu teshidha.

⁷Mathu na Apvüwa wi mathu leben tsentsa nsala gho, mathu tsangathu na mathu ji nye. Tsalina khili mathu nu mathu yyithu na wan yasa tendha.

⁸Gibea wi aghi tutuwa khou chilo! Rama wi kemessi hhai sa chilo! Bethaven wi aghikesa hhai magha chilo! Aghikesa pen wi dulo, Benjamin nyithu!

⁹Kemeten tsathang na gho tendha, nu Israel na dedi tendha. Israel nyithu, ha sacen metsiben!

¹⁰Apvüwa na khiben, “Hi aghepvü ben, kepaghenanye Judah ccülikesathu na Israel nkaya nu mathu yyi ghanfüya. Tsalina hi kemeten atssüketi kellu ti pi mathu miwi keshusha chiden.

¹¹Israel na nyu ma kepasha wi ketizen saaben; ma ma ji kesa-u ntsa kesa yyi tsü bhataghadha, kepaghenanye ma mangla pi ma cüya nketenthu wi kekiqa bhale khvu wa kesalina.

¹²Hi keyasa sengho Israel miwi chi, nu kededi sengho Judah nyithu miwi chiaben .

¹³“Khathansha wi Israel na ma kinaa muya nu Judah na ma yisüthu muya khe, Israel na Assiriya wi kadimiwa wi kekiqa khie, isala ma mathu kinaa nyelela ayisü tsü sapi mehai ncü.

¹⁴Hi ssensitemi kesü ti Israel nu Judah nyithu ssisaden. Hi hi ketanla mathu zandhi-zanghe nu mathu teshiaben . Hi khathansha wi mathu zanshiya khe thola mathu hangshaya nben.

¹⁵“Inyithu na mathu kesami ghena agükeccü qo sa nu hi npi bha kegho chu hi mathu teshiaben . Mathu na ketizenkesa wi hi bhagho benshe.”