Read Northern Rengma Naga HOSEYA 8 Bible Online

HOSEYA 8 - Northern Rengma Naga bible

HOSEYA 8

¹Apvüwa na khiben, “Kemessi hhai sa chilo! Aghinyithu na amumu ti iyyi wi juchi dugho tendha! Inyithu na hi mathu ssinu cenkethenjüh tsü pakhhi nu hi kesansijüh tsü shunla hhagheben.

²Mathu na hi pi mathu Nyiza le ci nu mathu na inyithu le khi, nu hi chübenle khi lela,

³mathu na kemehaiwa tsü meya mvula. Ha ghena mathu ghinyithu na mathu jügüden.

⁴“Inyithu na mathu kemeshen wina mathu kadimithu kessiya. Mathu na hi kemeshen nchila accülikesathu kessiya. Mathu ketanla mathu keyasa ghena mathu rükatssü nu suna khupi atsikezhüthu saya.

⁵Hi Samaria nyunuti nyithu na suna pi amesü süpon kesa kekinyi tsü nanmenghü ben. Hi mathu miwi lebenminu. Mathu na atsikezhü kekinyi tsü npi keteshi chu ha khathu saaten nu?

⁶Israel nyi kesü na atsikezhü kesü tsü sa, nu tsüna khiela acenpvü nye! Samaria wi suna pi kesa amesü süpon kinyi ketenwa tsüpi kecenchazigheaben!

⁷Mathu na ameghü pi sheng chithu, caghamo kesa wwi yaben. Alli kesü wi asu nyün nketenwa tsüna khiela amesa mangla saya nten. Isala keujüla tsüti saya lela, asangthu na tsü dsa ben.

⁸Israel na mizzatenti kepathu ti sadha, nu tsü apfü kepakhhi ti mangla nkenye sadha.

⁹aghang gadathu kejeng ti Israel nyithu na mathu kemeshen sa bvüdha. Mathu na Assiriya wi mathu kekiqa bha wa nu mizzatenti kepathu wi mathu khwe thsüle ma men pi cüa.

¹⁰Isala hi khili mathu saghuya nu mathu meten cü tendha. Wan nu Assiriya kadimiwa na mathu pasha ghothu mathu na kinaa tsü pvüyaden.

¹¹“Israel nyithu na kesami khupiale kesalina kekinyipen jipfü sathu mathu na kesami kesa penthu jikayi benden!

¹²Hi anyithu ghena kesansijüh khi mekeyakhi zhütheng, isala mathu na tsüpi kijünyi nu asang ti meya mvu.

¹³Mathu na ahhanshathu sapi hi cü nu asathu tsü dsa. Isala hi Apvüwa, hi mathu n-nen, nu hi khili mathu kesami tsü meshenya nu tsü ghena mathu meten cüden; hi mathu kesun neng pi Ejipt wi chiaben!

¹⁴“Israel nyithu na kadijjenthu satheng, isala mathu na mathu Sakechiwa tsü malidha. Judah nyithu na anyunutithu khwetivütheng. Isala hi anni kesun chipi mathu kadijjenthu nu anyunutithu mecang thsüaden .”