Read Northern Rengma Naga HOSEYA 9 Bible Online

HOSEYA 9 - Northern Rengma Naga bible

HOSEYA 9

¹Israel nyithu, nthu na Anyiza nkechüthu ti akho kemishu sa ketenthu tsü teshilo. Nthu na nthu Nyiza wina bvüa nu ma wi leben tsentsa nsala ghodha. Ayyi tsüdi wi nthu ketanla nthu pi keqheza menkedsathu ti pi Baal cenpvü wi jeü nu ma asu pi nthu cü ketenwa le ma nmvu wa!

²Isala nthu na wan asu nu oliv deli kesen qo nmiladen, nu ciwi kisengtssü la nmiladen.

³Israel nyithu na Apvüwa yyi wi nbenla ben, isala Ejipt wi wa neng nu Assiriya wi dsa keccüna tsse[8] tsü dsaben.

⁴Asang yyi tsüthu witsü mathu na kisengtssü pi kekinyi sapi Apvüwa cü nyelela ahhanshathu sapi ma cüya nben. Mathu tsse na anyi tsü kedsathu tsüdi nakhi pi keshü tsse kedsa ti saaben. Tsüna mathu kaghama wi anonkwen keya ketan; tsü kesütanla sen wa Apvüwa Kekinyijjen wi kekinyi ti saya nben.

⁵Nu khathansha wi Apvüwa kekinyikü ghena akho ssan kethengwa tsü gho khe, mathu na khati saaben nu?

⁶Khathansha wi ketizenkesa tsüna gho nu anyithu na bvüzighe khe, Ejipt nyithu na pi Memfi wi vhüale kesa ghena tsüthu saghu yaden! Mathu rükatssü keben nu kuti wi mathu jjen keben penthu witsü kepagha nu aghazüthu na shigübhon ben.

⁷ Meten cü keten matsüwa na ghodha, anyithu na mathu keya qo muya keten tsüwa na ghodha. Khathansha wi tsü sa gho khe, Israel na tsü chüyaden! Nthu na khiben, “Atusenjüh-kechü hawa ha kejüphon kesü. Kechü-kenong keten nyiwa ha kedeja.” Nthu kesami ji mtsü kesalina nthu na hi nanmeghü ntsa saden.

⁸Anyiza na hi kesun pi atusenjüh-kechü kesü sala ma nyi Israel kitsan chi thsü. Isala hi khiewa wa khe nthu na awa kesü ti hi dieyale saden. Anyiza yyi wi anyithu na atusenjüh-kechüwa ghinyithu sa.

⁹Mathu na Gibea[9] wi keben tsüwi ti mathu kekuli na nmehai ntsa sa. Anyiza na mathu kesami meshenya nu tsüghena mathu meten cüden.

¹⁰ Apvüwa na khiben, “Hi hatu wi Israel muya tegü wi tsüna ayyikeshü wi kemeshentsse na shigü keben mukeya ti kesa. Hi nthu bamyithu muya tegü wi tsüna khhaghabvü nyün tegü ti kesa. Isala khathansha wi mathu na Peor Yikha wi ghoya khe mathu na Baal kinyi wa nu mathu na wan mathu nen keten cenpvüthu ti nankiqanan sa.

¹¹Israel nyankethang tsüna awa kesü ti pighe bvüaben, nu ciwi mathu na atsanga npvügha, nza kesüla atsa nmepvü, atsanga npvü neng meya laben.

¹²Isala keujüla mathu na atsanga muya lela hi tsüthu senbvü nu kahang kesüla teshi nben. Hi anyi hathu ha yishathu pala qhethiketen kesa na mathu miwi ghoaben .”

¹³Apvüwa, hi nyu na mathu tsangathu jügü

¹⁴Hi no anyi hathu miwi mangwa sa cülo khie nu? Mathu kinyibvüthu sapi atsanga nmi thsü lalo! Mathu sapi mathu tsangathu noncca meya thsü lalo!

¹⁵Apvüwa na khiben, “Mathu kekuli nkemehai tsüdila Gilgal wina sa shhugho. Hi ciwi na mathu nanmeghü shhugho. Nu mathu kekuli nkemehai sa kesa tsüwa ghena hi iyyi wina mathu jügüshiaben . Hi mathu nantizen neng ntendha; mathu ccülikesathu tsüdila hi matang.

¹⁶Israel nyithu na achan kesü ma ghazanthu na qha nu ma bi bün meyala kesa ti. Mathu na atsanga benya nben, isala keujüla mathu na benya lela hi mathu nen keten tsangathu tsü pathiaben .”

¹⁷Hi ma kekuli sa ketenwa Anyiza tsüna ma nyithu yishaden, kepaghenanye mathu na ma jüh nkina mvu. Mathu na mizzatentithu jawi kegoedeja ketenthu sa waden.