Read Northern Rengma Naga JOEL 1 Bible Online

JOEL 1 - Northern Rengma Naga bible

JOEL 1

¹Hawa ha Apvüwa na ketsijüh pi Pethuel tsawa Joel kecü.

²Kina kaketsü saya, nthu anyi keqhaithu; Judah yyi wi anyi tsüdi, kinalo. Kekuli hati kesa kesüla nthu tsüwi, nyelela nthu bathu tsüwi sadha kwe?

³Tsü cüki pi nthu tsangathu kizalo; mathu na pi mathu tsangathu kizaben, nu tsüthu na pi tsü shiwa bvüye wi kizaben.

⁴Ashiqathu athuthu sala gho asu miwi kaya; athu kesü na mangwa teshi theng khe athu kepawa na tsü dsa.

⁵Nthu adikinathu, shagha nu qailo; nthu kisengtssü jjü ketenthu, qailo; kemeshentsse bi pi kisengtssü ketheü sa kententhu tsü yasadha.

⁶ Ashiqa zitenti kesü na ithu yyi pongdha; tsüthu na khang ntsa nu ji pi si meyakhi; mathu yha na ssensitemi yha kedighe ti.

⁷Mathu na ithu kemeshentsse tonthu yasa, nu ithu khhaghabvü tonthu dsakhidha; achan cünathu na npi kemiki chu tsüthu na ma yhu shi dsakhidha.

⁸Nthu anyithu, ghala kesü na ma n-nuwale keben pvüzawa keshü qaiki keben ti qailo.

⁹Ciwi asu nyelela kisengtssü mangla pi Kekinyijjen wi kinyikeya nmidha; keqhaikedithu na mangla pi Apvüwa kinyikeya nkemi ghena ahathana nu qaiben.

¹⁰Allithu na ghacangdha; kepaghenanye asu na yasa, kemeshentsse bi na qen, nu oliv tonthu na jü wa kesa ghena ayyiwa na anongüben.

¹¹Ahathanalo, nthu allikecathu; nthu kemeshentsse noncca ketenthu qailo, kepaghenanye awhengsu, achentha, nu asu tsüdila yasadha.

¹²Kemeshentsse lli nu khhaghabvü tonthu na jü wadha; kedsau tonthu tsüdila ma ghei na dsa nu shüdha. Anyithu na anonkeghe nmidha.

¹³Aleshithsü mphi nu qailo, nthu keqhaikedithu, kekinyipen wi kekuli sa ketenthu, Kekinyijjen wi wa nu ghaja thangthang anongülo! Ciwi asu nyelela kisengtssü mangla pi nthu Nyiza kekinyi nmidha.

¹⁴Kezi kesü saale kesa ahza khuchi; anyithu cipi saghu yalo! Judah wi accülikesathu nu anyithu tsüdi cighu pi Apvüwa nthu Nyiza Kekinyijjen wi chi nu ma wi khielo!

¹⁵ Apvüwa tsathangwa tsüna tetsakidha, Kekhang ntsawa na keyasa sengho keten tsathangwa tsü. Tsü tsathang tsüna qhethiketen khatila sengho ten nu!

¹⁶Ithu su yasa keben wi ithu na hhaketu sa ghang ben. Ciwi ithu Nyiza Kekinyijjen wi anonkeghe nmidha.

¹⁷Cencü-macü na ayyi keqha wi shü. Ciwi asu pi thengkeya na nmi, tsalina asabe kaghacangthu na yasa bendha.

¹⁸Amesüsithu na ketizen sa nu khou wadha, kepaghenanye ciwi mathu ghena amou nmidha; khaghanenithu la ketizen saben.

¹⁹Hi qai nu no wi khieben le, Apvüwa, kepaghenanye amou nu achantonthu na jü wadha, anni na tsüthu mecang kesa ti sadha.

²⁰Aghangsathu lela no wi magha bendha, kepaghenanye akuzathu na qendha.