Read Northern Rengma Naga JOEL 3 Bible Online

JOEL 3 - Northern Rengma Naga bible

JOEL 3

¹Apvüwa na khiben, “Tsü tsüwi hi Judah nu Jerusalem sa neng pi mehai kayi neng ya thsüaden .

²Hi mizzatenti tsüdi saghuya, nu mathu ssigho Ajühkekaghaten Yyiketijü wi chiaben . Ciwi hi mathu na inyithu miwi sakechi tsüdi ghena mathu jühkaghatenden. Mathu na Israel nyithu jügüzighe pi asang diyyi wi chi nu iyyi Israel tsü gishü zighe.

³Mathu na akezen wwi nu thowa na atssüzüthu tsü keya-u khe südhe. Mathu na pvüza nu ghalathu pi nssümaghathu sala jeü pi keqheza menkedsa nu kisengtssü men dhi.

⁴ “Nthu na imiwi mangwa saale ben nu, Tur, Sidon, nu Filistia? Nthu na pala pahan ghena pi hi dhineng le saben kwe? Keujüla nthu na tsüti saben lethu hi wan pi nthu cü neng shaben!

⁵Nthu na iji rükatssü nu suna khuya nu hi keben-keyeng pvü wa nthu kekinyijjen wi chia.

⁶Nthu na Judah nu Jerusalem nyithu tsü mathu diyyi wina ssisen kelensie wi wa nu mathu pi Grik nyithu wi jeüya.

⁷Khili hi nthu na mathu pi jeüchi kesa pen wina mathu ssi ghoaden. Hi nthu na mathu miwi mangwa satheng khe pi nthu miwi sa chiden.

⁸Hi nthu tsathu nu nthu ngathu pi Judah nyithu wi jeüchi thsüaden; mathu na tsüthu pi kelensie Sabea nyithu wi jeüchi thsüaden . Hi Apvüwa, hi khidha.”

⁹“Kechüthsüjüh hapi mizzatentithu jawi khichilo: ‘Aghikesa ghena kidenya; nthu ghikekhangthu cichi; nthu süpahithu tsüdi saghuya, nu alentsen walo!

¹⁰ Nthu mkhuthu pi njünnuthu cü, nu annuzathu pi apiethu cü yalo. Nkekhang ntsawa lela nyu ssikesali nsathu yishü.

¹¹Kaghaji nu gholo, ketekevü wi mizzatentithu tsüdila, nu ayyiketijü wi saghu yalo.’ ” O Apvüwa, tsüthu ssikesali thsüle kesalina nsüpahizi kesunsha chilo!

¹²“Mizzatentithu kiden meyathu yishü, nu Ajühkekaghaten Yyiketijü wi nghothu yishü. Hi Apvüwa, ciwi donki nu ketekevü wi mizzatentithu tsüdi jühkaghaten den.

¹³ Mathu na gheshighena ntsa; allikewwi tsüwi asu ti mathu wwiya; kisengtssü kemisügü pen wi kemeshentsse bithu nyeggücha pi kisengtssü na npi llepongca kewa chu nyeggü keten tsüti mathu nyeggücha cülo.”

¹⁴Anyi hazar hazar na Ajühkekaghaten Yyiketijü wi ben. Apvüwa tsathangwa tsüna wan ciwi ghoaben .

¹⁵Aghani nu asha na jang, nu ghotsithu na nwegüla.

¹⁶ Apvüwa na Zion Yikha wina ghamo; ma hhai na Jerusalem wina shhugho ben; atssan nu ayyi na kedheggü. Isala ma ma nyithu khwe yaden.

¹⁷“Tsaseng wi Israel, no hi Apvüwa n-Nyiza le kesa chüyaben. Hi iyikha Zion kemetha miwi hangden. Jerusalem na anyunuti kemetha kesü saaden; asangthu na khiela tsü nka nengya nbendha.

¹⁸Tsü tsüwi ayikhathu miwi kemeshentsse lli na pong benden, nu yyishiphon tsüdi wi amesüsi muben; ciwi Judah tsüdi ghena atssü sha ntsa benden. Akuza kesü Apvüwa Kekinyijjen wina lle shhughoaben, nu tsüna Akakia Yyiketijü ten benden.

¹⁹‘Egipt na ayyikeshü kesü ceng ben, nu Edom na yasa ketheng sa, kepaghenanye manyi na Judah yyi ssikesali, nu manyi kesami nkemithu pathia.

²⁰Hi nyu mathu pathi kesathu jukhi yaden; hi kesazzithu tsü heisha nten. Isala Judah nu Jerusalem wi tsü anuphan anyi na hangden, nu hi Apvüwa, Zion Yikha miwi hangden.’ ”