Read Northern Rengma Naga AMOS 1 Bible Online

AMOS 1 - Northern Rengma Naga bible

AMOS 1

¹ Hathu hana Amos, Tekoa nyuti wi anenikehiewa jühthu. Ameghükuju npi kesa tuwi amapi keni wi Uzziya na Judah kadimiwa sa, nu Jehoash tsa Jeroboam na Israel kadimiwa sa keben wi Anyiza na Israel nyithu ghena pala hathu tsüdi pi Amos ccüca.

² Amos na khi, “Apvüwa na Zion Yikha wina ghamo; Jerusalem wina ma hhai sa chiben. Amouthu na jü wadha, nu Karmel Yikha wi aghang na wengwengdha.”

³ Apvüwa na khiben,, “Damaska nyithu na samila sami neng sa, nu ha ghena hi mathu meten cü metsiden. Mathu na ayen nkechü kedaggü pi Gilead nyithu miwi chi.

⁴Tsalina hi anni kesun pi Kadimi Hazael na kadijjen sa ketheng miwi chi nu hi Kadimi Benhadad khweti kezhüthu tsü mecang shaden.

⁵Hi Damaska nyunutiwa khweti jenkathu kihhesha pi nu Aven yyiketijü wi kahangthu nu Betheten wi kekhang kesenwa khuaden. Siriya nyithu pi atssüzüthu ti ssisen nu Kir yyi wi bvüaden .”

⁶ Apvüwa na khiben, “Gaza nyithu na samila sami neng sa, nu ha ghena hi mathu meten cü metsiden. Mathu na mizzatenti kesü maben pi atssüzüthu ti pi Edom nyithu wi jeü chia.

⁷Tsalina hi anni kesun pi Gaza nyunutiwa khweti miwi chi nu ma khweti kezhüthu tsü mecang thsüaden .

⁸Hi Ashdod nu Ashkelon nyunuti keni wi kekhang kesenthu khuaden. Hi Ekron nyunutiwa tsü meten cü, nu Filistin nyi kebenthu tsüdi shü thsüaden .”

⁹ Apvüwa na khiben, “Tur nyithu na samila sami neng sa, tsalina hi ha ghena mathu meten cüden. Mathu na mizzatenti kesü maben ssi sennu Edom yyi wi kushinyi sa bvüa, nu mathu na apvüshang kesa keponghu cenkeya tsü n-niela.

¹⁰Tsalina hi anni kesun pi Tur nyunutiwa khwetithu nu ma khweti kezhüthu tsü mecang thsüaden .”

¹¹ Apvüwa na khiben, “Edom nyithu na samila sami neng sa, tsalina hi ha ghena mathu meten cü metsiden. Mathu na mathu cünyuwa [1] Israel nyithu kekajügü, nu mathu nantizen nchila. Mathu lebenketsu na asakhen nmi, nu mathu na tsü ya gha wa thsü nsa.

¹²Tsalina hi anni kesun pi Teman nyunutiwa miwi chi nu Bozra khweti kezhüthu tsü mecang thsüaden .”

¹³ Apvüwa na khiben “Ammon nyithu na samila sami neng sa, tsalina hi ha ghena mathu meten cü metsiden. Mathu na mathu yyi dikayi yale aghikesa wi Gilead wi nza atsa-npvü ketenthu pvü hanqhe.

¹⁴Tsalina hi anni kesun pi Rabbah nyunutiwa khwetithu miwi chi nu ma khweti kezhüthu tsü mecang thsüaden . Tsaseng wi aghikesa ghanan jishaden, nu kesalikesa tsüna caghamo nkemehai ti saaben.

¹⁵Mathu kadimiwa nu ma kekhu wi kedithu na kushinyithu sa bvüaden .”