Read Northern Rengma Naga AMOS 3 Bible Online

AMOS 3 - Northern Rengma Naga bible

AMOS 3

¹Israel nyithu, Apvüwa na Ejipt wina ssi keshhugho mizzatentiwa mabenla ma nthu ghena ketsijüh khikechi ha kina yalo:

²“Ayyi wi mizzatentithu tsüdi jawi hi nthu ketan chü nu noncca ghole. Tsüwa tsüna nthu na sami pi qhethiketen sa, nu tsüwa ghena hi nthu meten ncüthu yishüdha.”

³Anyi meshu keni na npi wi nkemetulila gweghe kijünyi waya ten kwe?

⁴Ssensitemi kesü na ma pala ghan meya lela ayinong wi ghamo ten kwe? Ssensitemi zza kesü na pala pahan ghan meya lela ma ku wi magha benten kwe?

⁵Abhitsü wi ma ghei pi nchila ciwi awa kesü yaya ten kwe? Abhitsü kesü na pala kesü tsü pakhen nchila pakhen ten kwe?

⁶Anyunuti kesü wi aghi tutuwa khouchi lethu anyithu na nmessila benya ten kwe? Apvüwa na kesun nkechi ketizenkesa na anyunuti kesü wi gho ten kwe?

⁷Kemisintsa Apvüwa na khiela ma kemeshen pi ma maghathu, atusenjüh-kechüthu nccücala mangla sa nten.

⁸Ssensitemi kesü na ghamochi lethu thowa na nmessila benya mehai nu? Khathansha wi Kemisintsa Apvüwa na ajühkhi khe thowa na ma ketsijüh pi nthangchi laya mehai nu?

⁹Pila Ejipt nu Ashdod kadijjenthu wi kahangthu wi kizalo: “Samaria vükeben yyishiphon thu wi saghuya nu ciwi kivvükepe nu kesazzi kekulithu sa keben tsü ghangchilo.”

¹⁰Apvüwa na khiben, “Anyi hathu na kesazzi nu yasayala wina khukeya pi mathu kadijjenthu pong yaden. Mathu na khatinu atsentsa saten khe tsü lela nchü.

¹¹Tsalina ghinyi kesü na gho mathu yyi vüya, mathu khweti yasa, nu mathu keben pen kemehaithu pasha piaben .”

¹²Apvüwa na khiben, “Anenikehie kesü na ssensitemi kesü ghankea khaghaneniwa tsü ccü kenitan nyelela ma khuna kesütan mukeya tsüti, Samaria nyithu khili awe men kedhu kemehai miwi jen ketenthu tsü kezeng-u ketan na hang yaben.

¹³Kemisi ntsa Apvüwa, Kekhang ntsawa na khiben, ‘Khili kinaya, nu Jakob shicübvüghathu kitsan chilo.

¹⁴Hi Israel nyithu mathu kesami ghena mathu meten kecü ghanan wi hi Bethel wi kekinyipenthu yasa cüden. Kekinyipen ccügwen tsüdi pashü pi nu ayyi wi qanca ben.

¹⁵Hi pathsü jjen nu mazu jjenthu tsüdila yasa cüden. Ajjen asayha pi matsi sa kethengthu na ccü pi yasa; ajjen ketithu tsüdila yasa ben.’ ”