Read Northern Rengma Naga AMOS 5 Bible Online

AMOS 5 - Northern Rengma Naga bible

AMOS 5

¹Israel nyithu, hi keshükhwi pi nthu saki keben ha kinalo:

²Israel pvünyimethawa na khulidha, khiela nshagha nengdha! Ma teshi pi ayyi wi chidha, nu thola ma npieki.

³Kemisintsa Apvüwa na khiben, “Israel wi anyunuti kesü na süpahi hazar kesü kesun shichi; isala meza kesütan na kheneng gho; anyunuti kepa wi kesü na meza kesü kesun shichi, isala tagha ketan ghoneng.”

⁴Apvüwa na Israel nyithu wi khiben, “Hi wi ghalo, isathu nthu na hang yaben.

⁵Bersheba wi kinyile nwala. Bethel wi hi bha nwala, Bethel na mangla nkenye saaben. Gilgal wi nwala, ma nyithu na kushiyyi wi wa thsüa le sadha.”

⁶Apvüwa wi walo, isathu nthu na hang yaben. Keujüla nthu na tsüti nsa lethu, ma Israel nyithu miwi anni ti mecang dughoaden. anni na Bethel nyithu mecang ben, nu thola tsü patenenya nben.

⁷Nthu meshensadha, nthu na ketsatanwa tsü tonpheghe nu anyi mathu kemeshon kebenthu tsü mechu yaden!

⁸ Apvüwa na ghotsithu sachi, Plead nu Orion ghotsithu. Ma kejang sapi ghanan kewegü sa thsüden, nu aghanan pi aghaja sa thsüden. Ma atssükedone wi atssü cichi, nu tsüthu pi ayyi miwi keshusha chiden. Ma nyan na Apvüwa.

⁹Ma keyasa sengho mathu khweti kezhüthu kekhang miwi chiden.

¹⁰Nthu na anyi thowa na nkemeshonwa tsü nni nu ajüh- kekaghatenpen wi atsentsawa khi khe tsü nanmeghüden.

¹¹Nthu na ketha-uthu pasha nu mathu su teng yaden. Tsalina nthu na alonjjen kemehai sa kethengthu witsü hang nben nyelela nthu na sheng ketheng kemeshentsse lli kemehai ntsathu witsü kisengtssü jjü nben.

¹²Hi nthu na qhethiketen kesamithu tsü nu nthu kesazzi khaju satheng khe chüben. Nthu na anyi kemehaithu meten-mesha, alaa khuya, nu ajühkekaghatenpen wi ketha-uthu kemeshon mukeya tsü khenden.

¹³Tsalina matsü nkemehai hati kesa wi ceen keben tsüna kemetsa kekuli le!

¹⁴Nkemehaiwa nyela kemeshonwa kekuli tsüpi nthu kemtsü sa yalo, isathu nthu na hang yaben. Isalethu Apvüwa Anyiza Kekhang ntsawa, nthu na ma tsüti kesale khi keten ti ntsakhiwa ma nthu ssiden.

¹⁵Nkemehaiwa tsü nanmeghü, nu kemeshonwa tsü ghaliya, nu ajüh kekaghatenpen wi atsentsawa ya ben thsülo. Apvüwa na mizzatenti hawa nyithu khili kecu hang kebenthu nantizenchila mechü le.

¹⁶Tsalina Apvüwa Anyiza Kekhang ntsawa na khiben, “Ciwi ahathakina kiqai nu kekohon na anyunutiwa lentonti wi ben den. Allikecathu lela ciya nu melli pi anongü thsü kebenthu gweghe keshü ghena anongü ben.

¹⁷Kemeshentsse lli tsüdi wi kiqai na benden. Hathu ha tsüdila saaden kepaghenanye hi nthu meten cüle ghoden.” Apvüwa na khidha.

¹⁸Nthu Apvüwa tsathangwa tsü nmvu ketenthu ghena khatila qhethiketen saaben nu! Tsü tsathangwa tsüna nthu ghena kemehai mangwa saya ben nu? Nthu ghena atsathangwa tsüna kewegü nyela kejang saaben.

¹⁹Tsüna anyi kesü na ssensitemi kesü tubvü wala aduweng kesü metukeya ti saaben. Nyelela anyi kesü na ajjen wi gho ma kwen pi ajjen-keshon miwi chang chi nu amaghang mcü keya ti le!

²⁰Apvüwa tsathangwa tsüna kejang khe kewegü sengho nben; tsüna kewegü mangla nmila jangketsü kesa tsathang kesü saaben.

²¹ Apvüwa na khiben, “Hi nthu keccüna khothu tsü nanmvu nben; hi tsüthu ghang benya nden!

²²Nthu na khathansha wi mecang pi kekinyi nu asu pi kekinyi sennu hi wi gho khe hi tsüthu ya nben; hi nthu na asahang kekunonthu sengho hi kekinyi tsü ya nben.

²³Nthu kemagha khwithu tsü nsala yilo; hi nthu harp kekhou tsü nkina mvu.

²⁴Tsüti kesawa nye, ajühtsentsa ya akuzatssü ti nu ketsatan na aghakutssü na khiela qha nketen ti lle wa thsülo.

²⁵ “Israel nyithu, hi amapi jügha ayyikeshü wi nthu ssishu keten jüwi hi nthu wi ahhanshakesa nu kekinyi khukechithu tsü nkhie.

²⁶Isala nthu na khili nthu kadimiwa cenpvü Sakkuth, nu nthu ghotsi cenpvü Kaiwan tsikezhüthu tsü kinyi keten ghena nthu na atsikezhüthu tsü pvüden,

²⁷hi nthu ssinu Damaska na kawa ayyi kesü wi kushinyi sa kewa witsü,” Apvüwa na khiben, ma nyan na Anyiza Kekhang ntsawa.