Read Northern Rengma Naga AMOS 9 Bible Online

AMOS 9 - Northern Rengma Naga bible

AMOS 9

¹Hi Apvüwa na kekinyipen wi ngan keben mu. Ma ajühkhuchi: “Kekinyijjen kedon shonithu tsü daghan whengchi nu ma giketegü tsüdi kuliaben. Tsüthu whengkhhi chi nu tsüthu ya anyithu li miwi qanca thsülo. Hi aghi wi anyi kepathu tsü pathiaben . Thola bvüya nben; kesütanla shhuya nben.

²Mathu na mathu len chhü sennu keshü yyi wi du lela, hi mathu ghan yaden. Mathu na tangwi ki lela, hi mathu zansha yaden.

³Keujüla mathu na Karmel Yikha shoni miwi kuthi wa lela, hi mathu bhanu mathu ghan yaden. Keujüla mathu na atssükedone cakhu wi hi kuthi wa lela, hi atssükedone wi ghassübvü kiza nu mathu nküya thsüaden .

⁴Keujüla mathu ghinyithu na mathu ssinu atssüzüthu sa bvü lela, hi mathu pi shü thsülo ahza khuchiaben . Hi mathu nkiqala mathu yasa cüle kidenyadha.”

⁵Kemisintsa Apvüwa Kekhangwa na ayyiwa tsü kidhenchi, nu ameghükuju; ciwi hang kebenthu tsüdi anongü. Ayyi mabenla Nil Ghaku ti shagha nu qancaden.

⁶Apvüwa na atssan wi ma jjen sa, nu ma ayyi miwi atssan pi vüchi. Ma atssükedone wi atssü ci chi, nu tsü keshusha pi ayyi miwi chi. Ma nyan na Apvüwa!

⁷Apvüwa na khiben, “Israel nyithu, hi nthu kemeshen ju Sudan nyithu meshen den. Hi Ejipt wina nthu ssinu keshhugho ti Kreta wina Filistin nyithu ssinu shhugho, nu Kir wina Siriya nyithu ssinu shhugho.

⁸Hi kemisi ntsawa Apvüwa, hi Israel kadiyyi kesamiwa ha hieben, nu hi ayyi miwi tsü yasa den. Isala hi Jakob shicübvüghathu maben yasa nben.

⁹“Hi ajühkhuchi nu asu pi awhenie wi kekisie ti Israel nyithu zankeju cüden. Hi mizzatentithu jawi mathu zankeju nu ma men nkemithu tsüdila khupiaden.

¹⁰Hi inyithu jawi kesami nyithu na ‘Anyiza na paketena mangla pi ithu tetsaki gho thsü nben le,’ khi ketenthu tsüdila aghi wi pathi thsüaden .”

¹¹Apvüwa na khiben, “Hi David kadiyyiwa, ajjen kesü na qanca pi yasa kesawa ti kesa tsü sanengya keten tsathang kesü na gho tendha. Hi ma wikeshonthu sapfü nu tsü saneng yaden. Hi tsü saneng pi kheni ti saaden.

¹²Tsalina Israel nyithu na Edom yyi wi mangwa teshi theng nu mizzatentithu kuti tsüwi iji kesathu tsüdila nkayaden.” Ha saya thsü ketenwa Apvüwa na khiben.

¹³Apvüwa na khiben, “Atsathangthu na gho tendha, asu na wwiya kemehai miwi mbhiki shigüben, nu kemeshentsse bi na kisengtssü saya kemehai miwi mbhiki shigüben. Ayikhathu miwi kisengtssü keminnun na jücaben, nu yyishiphon thu wi tsüna lle waben.

¹⁴Hi inyithu ssi neng gho mathu yyiwa wi chiaben . Mathu na mathu nyunuti keyasathu tsü sapfü nu ciwi hangden. Mathu kemeshentsse lli cah nu kisengtssü jüden. Mathu na asankuthu sa nu mangwa pi yangchi nu shigü shagha khe tsü dsaben.

¹⁵Hi inyithu pi hi ayyi pi mathu kecü wi tsü sheng chi nu mathu pfüshi neng nbendha. Apvüwa nthu Nyiza na khidha.”