Read Northern Rengma Naga SHICÜSI 12 Bible Online

SHICÜSI 12 - Northern Rengma Naga bible

SHICÜSI 12

¹Mosa na Kush nyi nza kesü keya ghena Miriam nu Aaron manyi ma then.

²Manyi khi, “Apvüwa na Mosa ketan ccüneng kwe? Ma ishinyi la nccüneng kwe?” Apvüwa na manyi tsüti kekhi tsü zaya.

³(Mosa na keccaketssü nyi kesü, ayyi nyi tsüdi miwi ccatssüki.)

⁴Apvüwa na zuli Mosa, Aaron, nu Miriam wi kiza, “Hi no kecheng ya hi ketenpen Nithsüjjen wi gho thsü mvuben.” Mathu na ciwi wa,

⁵nu Apvüwa na akulukeshü cü wina dugho Nithsüjjen kedulen wi nganya nu ci chi, “Aaron! Miriam!” Manyi na atuwi shhu,

⁶nu Apvüwa na khi, “Khili hi mangwa khiten khe kinalo! Khathansha wi atusenjüh-kechüthu na nthu ja wi ben khe kemanthi wina hi ketanla hi pi mathu ccüca nu aman wina mathu ccüneng den.

⁷ Hi imaghawa Mosa keccüneng tsü tsüti nyele; hi ma pi Israel nyithu tsüdi miwi kediwa sa thsü.

⁸Hi ghang ti nu methasi ma keccüneng khe ajühkhi kivvü nsa; ma ighayen lela mudha. Nshinyi khatila nmessila ajüh khipi imaghawa Mosa shunya mehai nu?”

⁹Apvüwa na manyi miwi aghepvü nu bvüa,

¹⁰nu akulukeshü na Nithsüjjen teshia. Miriam gwo wi agükedsakenaa wan pong nu miki pi aghola ti sa. Aaron na Miriam ghang chi nan ma gwoben kekhuma pong kebenla muya,

¹¹nu ma Mosa wi khi, “Kediwa, ishinyi kejüphon kesami ha ghena ketizen nsa thsü lalo.

¹²Ma ya agwosajjü pahan keshü kepvügha ti nsa thsü lalo.”

¹³Tsalina Mosa na Apvüwa wi khie, “Oh, Anyiza, ma sapi mehai cülo.”

¹⁴Apvüwa luneng, “Keujüla ma ba na ma mmi meshuki cü lethu ma ghanan tagü anyan kekinyen tsü pvü kesa, tsalina ghanan tagü ma pi kemnanpen na ameiwa khenten nu tsaseng wi ccüna ma ssi gholo.”

¹⁵Miriam pi ghanan tagü kemnanpen na ameiwa khenten nu ma npi ssi kegho chu anyithu na apen nketsen.

¹⁶Tsaseng wi mathu na Hazeroth teshi nu wa Paran ghansha wi kemnanpen sa.