Read Northern Rengma Naga SHICÜSI 13 Bible Online

SHICÜSI 13 - Northern Rengma Naga bible

SHICÜSI 13

¹Apvüwa na Mosa kiza,

²“Amizza taghakeni ja wi ccülikesa kesüsü kessiya nu mathu kesun pi wahhaithu sala hi Kanaan yyi pi Israel nyithu cü kebenwa tsü hhainan wa thsülo.”

³Mosa na jühkina nu ma Paran ghansha wina ccülikesa hathu kesunshi chi: [Amizza] — [Aliwa] Reuben — Zakkur tsa Shammuya Simeon — Hori tsa Shafat Judah — Jefunne tsa Kaleb Issakhar — Josef tsa Igal Efraim — Nun tsa Hoshea Benjamin — Rafu tsa Palti Zebulun — Sodi tsa Gaddiel Manasseh — Susi tsa Gaddi Dan — Gemalli tsa Ammiel Asher — Mikhael tsa Sethur Naftali — Vofsi tsa Nahbi Gad — Makhi tsa Geuel

¹⁶Mosa na wahhai hathu kesun pi ayyi hhainan wathsü. Ma Nun tsa Hoshea nyan tsü kemili pi Joshua sa.

¹⁷Mosa na mathu kesunshi kechi wi hati mathu wi khi, “Aghawa wina wa nu sasen Kanaan yyi acülawa cü, nu tsaseng yyishiphon diyyiwa wi tsü walo.

¹⁸Ayyi tsüna khati kesa, anyi khaju na ciwi hangben nu mathu na khangla nkhang;

¹⁹ayyi tsüna mehaila nmehai nu anyithu na anyunuti khweti kebenla nkemi wi hangben;

²⁰ayyi tsüna kecca kemehaila achan keben yyi khe chüyalo. Nu ciwi kedsau pahan pvü gho metsilo.” (Tsüna kemeshentsse bi kenyün tsüwi sadha.)

²¹Tsalina anyithu na aghawa wi wa nu Zin ghansha cülawa na wa Rehob kewalen Hamath Pass kete aghawa kecu ayyi tsü hhainan.

²²Mathu na atuwa ayyi acülawa wa, nu kücanyi Anakim shicü, Ahiman, Sheshai, nu Talmai geithu na hang keben Hebron wi tsü gho. (Hebron sa keya tsü na Ejipt wi Zoan tuwi amapi tagü.)

²³Mathu na Eshkol yyiketijü wi gho nu ciwi mathu na kemeshentsse bi capon kesü paya nu tsüna kiyan ntsa kesalina meshu keni na kepie chan pi tsü pie. Mathu na ahhibvü nu khhaghabvü la pahan sengho.

²⁴(Apen tsüpi Eshkol [3] yyiketijü le khi kepaghenanye Israel nyithu na ciwi kemeshentsse bi capon paya.)

²⁵Ghanan jügha ayyi tsü hhainan kesa seng wi wahhaithu na kheneng

²⁶Paran ghansha wi Kadesh wi Mosa, Aaron, nu Israel nyitenti wi ghoa. Mathu na mukeyathu pi anyithu kiza nu mathu na kedsau pvü kegho lela pi ccüca.

²⁷Mathu na Mosa kiza, “Ikhang na ayyi tsü hhainantha sa nu mukeya tsüna ayyi kecca kemehai; nu ha ikhang ciwi kedsau pahan pvü kegho le.

²⁸Isala ciwi kahang anyithu na khangzü ntsa nu mathu nyunutithu na di ntsa nu mehaitsü khwetivü theng le. Tsümiwi ikhang na anyi kücanyi shicüthu la mule.

²⁹Amalek nyithu na ayyi cülawa; Hitti, Jebus, nu Amor nyithu na yyishiphon diyyi; nu Kanaan nyithu na Mediterranean Tssükedone kete wi Jordan Ghaku niela hangben.”

³⁰Kaleb na anyithu Mosa wi leben nkaghajüh khikeben tsü cüsha pi ceen sa nu khi, “Ithu khili wa ayyi tsü nkaya na, ithu na mathu miwi khang nu tsü nkaya mehaile.”

³¹Isala anyi Kaleb gweghe kewathu na khi, “Nyele, ithu na mathu chaya nben, anyi ciwi kahangthu na ithu miwi khangzüki le.”

³²Tsalina mathu na mathu hhainan kewa yyi cüki tsü milikemesa khipi Israel nyithu kiza. Mathu na khi, “Ayyi tsüna anyi ciwi kahangthu ghena nsen qola saben. Ikhang kemu anyi tsüdila tisie ntsawa,

³³ nu ciwi anyi kücanyi Anak shicüthu la mule. Ithu na mathu tuwi aqaponthu ti kizzakiki, nu mathu na ithu ghang pi tsüti sabenla metsi.”