Read Northern Rengma Naga SHICÜSI 15 Bible Online

SHICÜSI 15 - Northern Rengma Naga bible

SHICÜSI 15

¹Apvüwa na pi Mosa kiza,

²Israel nyithu na wa ma ayyi pi mathu cüle keben wi tsü ayen hathu ha nie thsüle kesalina.

³Amesü süpon, khaghaneni süpon, khaghaneni nyelela aneni pi Apvüwa cüya mehai, tsüna mecang pi kekinyi, jühkhukechi kesacen hhansha kesa, kenen wina kekinyi, nyelela nthu na keccüna kho kesa wi lela; Apvüwa na atsse pi kekinyi han ha nen den.

⁴Anyi thowa na khaghaneni nyelela aneni mecang pi Apvüwa wi kekinyi sa khe ma awheng kilogram kesü pi oliv deli liter kesü kesaghu tsüpi asahang gweghe sengho kisengtssü liter kesü saghuya nu pi asu pi kekinyi saaben.

⁶Khaghaneni süpon khuchi lethu awheng kilogram keni pi oliv deli kesü nu pahan saghu pi asu pi kekinyi saaben,

⁷kisengtssü liter kesü nu pahan la pi saghu ben. Apvüwa na ahhansha kesa hathu han ha nenden.

⁸Khathansha wi amesü süpon kesü pi Apvüwa wi mecang pi kekinyi, jühkhukechi kesacen hhansha kesa, nyelela kecca ghena kekinyi sa khe

⁹asu pi kekinyi wi awheng kilogram kecheng pi oliv deli liter keni saghu,

¹⁰pi kisengtssü liter keni saghu khuchiben. Apvüwa na ahhansha kesa han ha nenden.

¹¹Hati pi amesü süpon, khaghaneni süpon, khaghaneni nyelela aneni gweghe khuchiben.

¹²Khathansha wi asahang kesü miwi khuchi khe atsanqai tsü kegweghethu la meceqe jikayi saben.

¹³Israel nyi ahvu tsüdila atsse pi kekinyi kesa wi ha saben, Apvüwa na ma han ha nenden.

¹⁴Nu keujüla asang na nthu ja wi matsü keu ketan sale anuphan ghena lela hang kebenwa ma atsse pi kekinyi Apvüwa na ma han nen keten ha sa lethu, ma ayen ha makesü nieben.

¹⁵Kepaghenanye matsü ghaketen tsüdi ghena ayen makesü nthu miwi nu asang nthu ja wi hang kebenthu miwi la benden. Apvüwa tuwi tsü nthu nu mathu la makesütan;

¹⁶nthu miwi ayen nu kekuliyen tsü mathu ghena la makesü.

¹⁷Apvüwa na pi Mosa kecü,

¹⁸Israel nyithu na wa ma ayyi pi mathu cüle keben wi tsü ayen hathu ha nie thsüle kesalina.

¹⁹Ciwi kedsakejjü muya lethu tsü dsaben, nu pahan khuthi pi aju kemehai ntsa sapi Apvüwa cüben.

²⁰Nthu na asu ketheü pi amesa gü lethu, amesa kegü be atuwa tsüpi aju kemehai ntsa sapi Apvüwa cüben. Hawa ha nthu na asu kaghaceng wi mukeya atuwa pi aju kemehai ntsa kesa tsü makesü sa chiben.

²¹Kepaghenanye matsü ghaketen tsüdi ghena nthu na amesa kegü wi aju kemehai ha sapi Apvüwa cüben.

²²Isala keujüla anyi pahan na aghandu nsala Apvüwa na pi Mosa kecü ayen hathu pahan n-niela.

²³Nu keujüla ashiseng wi anyitentithu na Apvüwa pi Mosa wina kekiza tsüdi sa meyala lethu,

²⁴azitentithu na nkechü ghena sazzi lethu, mathu na mecang pi kekinyi wi Apvüwa na ma han nen keten ghena amesü süpon kesü khuchi, asu pi kekinyi nu kisengtssü pi kekinyi mehaitsü saben. Tsümiwi mathu na aneni süpon kesü pi kesami ghena kekinyi saben.

²⁵Keqhaikediwa na azitenti ghena sakemetha keccüna saben, nu mathu kesami teshi cüaben, kepaghenanye kesazzi tsüna aghandu nye nu mathu kesami ghena kekinyi sengho atsse pi kekinyi sapi Apvüwa cüdha.

²⁶Israel zitenti maben nu asang mathu ja wi hang kebenthu kesami teshi pi cüaben, kepaghenanye anyi kesüsü tsüdila kesazzi wi bendha.

²⁷ Keujüla anyi kesü aghandu nsala sazzi lethu, ma aneni zza ghala amapi kesü ji kesü pi kesami ghena kekinyi sa chiben.

²⁸Keqhaikediwa na kekinyipen wi satekemetha keccüna sa nu anyi tsü ma kesami wina satemetha nu ma kesami teshi pi cüaben.

²⁹Israel nyi ahvu sale asang mathu ja wi hang kebenthu sa lela thowa na aghandu nyela sazzi khe tsüdi tuwi ayenthu makesütan saben.

³⁰Isala ahvu sale asang sa lela thowa na aghandu sami khe ma Apvüwa kethen wina sazzidha, nu ma pi shü thsüaben,

³¹kepaghenanye ma aghandu Apvüwa na kekhi tsü meya mvula nu ma yenkhukechi pakhhidha. Ma keshü tsüna ma ketanla ma khhi.

³²Israel nyithu na aghansha wi keten tsüwi anyi kesü na Sabbath ghanan wi achan gha keben muya.

³³Ma ssinu Mosa, Aaron, nu azitenti maben tuwi wa,

³⁴nu pi theng, kepaghenanye ma pi khati saten khe chüti nsa.

³⁵Tsaseng wi Apvüwa na Mosa kiza, “Anyi tsüpi shü thsülo; kemnanpen na ameiwa wi azitenti mabenla alon pi ma kecenthilo.”

³⁶Tsalina Apvüwa na kekhi ti azitenti na ma ssi shhula kemnanpen na ameiwa wi alon pi ma kecenthia.

³⁷Apvüwa na Mosa kiza

³⁸nu pi Israel nyithu wi khithsü, “Nthu thsümeni katen wi anan atsena pi ma latan kemisüthu sayalo. Nthu na matsü ghaketen tsüdi wi ha saben.

³⁹Nthu na athsüladanthu tsü ghang kechi kaghapen iyenkhukechi tsüdi meshenya nu tsüthu nieben; isalethu nthu na hi wina kheneng wa nthu kenen nu kenmvuwa tsü sa nben.

⁴⁰Athsüladanthu tsüna nthu sapi iyenkhukechi tsüdi nie nu nthu iji ketan sa thsüben.

⁴¹Hi Apvüwa nthu Nyiza; hi nthu Nyiza sale kesalina Ejipt wina nthu ssi shhugho le. Hi Apvüwa.”