Read Northern Rengma Naga SHICÜSI 22 Bible Online

SHICÜSI 22 - Northern Rengma Naga bible

SHICÜSI 22

¹Israel nyithu na apen ketsen sen wa Moab yyiketijü Jordan na nishuwa Jerikho kaghape wi kemnanpen saya.

²Moab kadimiwa Zippor tsa Balak na Israel nyithu na Amor nyithu miwi khati kulichi, nu mathu na anyi khaju khe zakeya wi,

³ma nu ma nyithu tsüdi qhethiketen sa.

⁴Moab nyithu na Midia nyi ccülikesathu wi khi, “Anyitenti hawa ha na ikhang kevü wi keben pala tsüdila wan yasa tendha, tsüna amesü süpon na amou wi aghang kedsa tsü makesü.” Tsalina kadimiwa Balak na

⁵ nyilothu kesun pi Amaw yyi wi Eufrat Ghaku kete Pethor wi Beor tsa Balaam ci chi thsü. Mathu na Balak wi ajüh ha sen nu ma wi gho: “Hi no ya mizzatenti kesü maben Ejipt wina ssi shhugho keben chüya thsü mvuben; anyi tsüthu na apen tsüdila bvüzighe ben nu ithu yyi nkaya keten ti wadha.

⁶Mathu na ikhang miwi jiki, tsalina no nchala gho ighena mathu kishencülo. Isalethu ikhang na mathu chaya nu ithu yyi wi mathu jügüshiya mehai. No sawegü pi anyithu miwi chithu mathu na mehaiyaben, nu no kishencüthu mathu na kishen-keshi pvüyaden kesa hi chüben.”

⁷Tsalina Moab nyi nu Midia nyi ccülikesathu na kishenkecü kutimen sen nu Balaam wi wa, nu Balak jüh tsüpi ma kiza.

⁸Balaam na mathu wi kiza, “Shita hewi ben lalo, Apvüwa na mangwale hi kizaden khe hi dhitsü wi pi nthu kizaben.” Tsalina Moab nyi ccülikesathu na Balaam gweghe ben wa.

⁹Anyiza na Balaam wi gho nu ma keü, “No gweghe kebenthu ha anyi khati kesathu nu?”

¹⁰Ma luneng, “Moab kadimiwa Balak na mathu kesun pi hi kiza thsüla

¹¹Ejipt wina anyithu shhugho mathu yyi pong yadha le. Ma hi yala ma ghena tsüthu kishencü thsü mvuben, isanu ma tsüthu ssikesali nu tsüthu jügüshi mvuben le.”

¹²Anyiza na Balaam wi khi, “Anyi hathu gweghe nwala, nu kishen-keshi pi Israel nyithu miwi nchi lalo, kepaghenanye mathu na hi kesawegü pvüden.”

¹³Ghanenwa wi Balaam na Balak nyilothu wi wa nu khi, “Nthu na ajjen wi wha nenglo; Apvüwa na hi ya nthu gweghe nwa thsü mvuben.”

¹⁴Tsalina mathu na Balak wi wha neng, nu Balaam na mathu gweghe ngho mvule kesa khipi ma kiza.

¹⁵Balak na hatuwa miwi ccülikesathu kemechan nu jikayi kesun chi.

¹⁶Mathu na Balaam wi wa nu Balak jüh hapi ma kiza, “No nchala hewi ghole kesa mangla no kekhenkeghe nsa lalo!

¹⁷Hi nkutimen sa ntsa cüden, nu no mangwa khie khe sacü ben na. No nchala gho ighena anyi hathu ha kishencülo.”

¹⁸Isala Balaam na luneng, “Balak na ma kadipen wi keben suna nu rükatssü tsüdi pi hi cü lela, hi ajjügi kizza ntsa wi lela Apvüwa Anyiza jühkhukechi tsü nkinala sa meyacha.

¹⁹Isala nthu nchala kepathu kesa ti shita hewi ben lalo; isanu Apvüwa na pala pahan hi kekiza benla nmi khe chüya na.”

²⁰Tsü ghaja Anyiza na Balaam wi gho nu khi, “Anyi hathu na no ssiyale gho benthu no kidenya nu mathu gweghe walo, isala hi mangwale no kiza khe tsü ketan salo.”

²¹Tsalina ghanenwa wi Balaam ma gada miwi kiya nu Moab nyi ccülikesathu gweghe wa.

²²Balaam na wa keten wi Anyiza na aghepvü, nu Balaam na ma gada miwi na ma magha keni gweghe wa keten Apvüwa nyilo na gho alen wi ngan nu ma len khenya.

²³Gada tsüna tangnyilowa na njünnu sen nu ngan keben kemu wi alen teshi theng nu khapeghe sen alli wiwa wa. Balaam na gada tsü kihhe nu ssisen alen wi gho neng.

²⁴Tang nyilowa na kheneng wa kemeshentsse lli keni jü alonshi ghapeli qho keben alen kemaghan wi nganya.

²⁵Gada na tangnyilowa tsü kemu wi ma alonshi tsü tetsaki wha nu Balaam ccü pvüwha tsü nyeggü tenya. Balaam na kheneng gada tsü kihhe.

²⁶Tangnyilowa na kheneng wa atuwi apen maghanka nu ghapeli qho ghüpvüya nkesa pen wi nganya.

²⁷Khilitsü gada na tangnyilowa muya nan ayyi wi donki wa. Balaam na aghepvü ntsa nu ma khhatssü pi gada kihhe wa.

²⁸Tsaseng wi Apvüwa na ajühkhiya kemehai kekhang pi gada cü nu tsüna Balaam wi khi, “Hi ntuwi mangwa sazzi theng nu? No mang khili ha kecheng tughuwa hi kihhe bendha nu?”

²⁹Balaam na khineng, “Kepaghenanye no hi pi keponsa saben! Hi njünnu kesü ben lethu pi no süthi cü kesa nan.”

³⁰Gada na luneng, “Hi no gada, no kahang chu ma miwi donki ketenwa tsü nye kwe? Hi hatuwi kutitanla ntuwi hati satenla nu?” Balaam na khineng, “Nyele, hati sa nten.”

³¹Tsaseng wi Apvüwa na Balaam ya tangnyilowa na njünnu sen nu ngan keben tsü muya thsü; nu Balaam na ayyi wi nkhwendua.

³²Tangnyilowa na khi, “No mangkesa na hati kecheng tughuwa n-gada kihhe bendha nu? No ha nkewa-u wi wa keten ghena hi nlen khenle ghoben.

³³Isala n-gada na hi muya theng nu kecheng tughu kheneng bvüle. Tsüti nsa lethu hi no pathi nu n-gada ya bvü thsüa kesale.”

³⁴Balaam na luneng, “Hi samidha le. No alen wi ngan nu hi matang keben tsü hi nchü; isala hi ha ghena ntuwi sazziben lethu hi khili ajjen wi whaneng tendha.”

³⁵Isala tangnyilowa na khi, “Anyi hathu gweghe walo; isani hi mangwa khilo no kiza khe tsü ketan khilo.” Tsalina Balaam na mathu gweghe wa.

³⁶Balak na Balaam gho tendhale kesa zakeya wi ma wa Moab kemeggü Arnon Ghaku ghüsa nyunuti kesü Ar wi ma metu.

³⁷Balak na Balaam wi khi, “No khati kesa na hi no ci chi tegü wi nghola nu? No hi nkutimen kejon sacü nbenle meshen kwe?”

³⁸Balaam na luneng, “Hi ngho kwe? Hi khili ghodhale. Isala hi mangwa khiya kemehai kekhang ben nu? Anyiza na hi khilo kekiza ketan khiya mehai.”

³⁹Tsalina Balaam na Balak gweghe Huzoth nyunuti wi wa,

⁴⁰Ciwi Balak na amesüsi nu khaghaneni pathi nu asa pahan pi Balaam nu ma gweghe keten ccülikesathu cü.

⁴¹Ghanenwa wi Balak na Balaam ssinu Bamoth Baal wi wa, Balaam na apen ciwi ben nu Israel nyithu pahan muya.