Read Northern Rengma Naga SHICÜSI 23 Bible Online

SHICÜSI 23 - Northern Rengma Naga bible

SHICÜSI 23

¹Ma Balak wi kiza, “Ighena kekinyipen tagü salo, nu amesü süpon tagü nu khaghaneni süpon tagü sen gholo.”

²Balak na ma salo kekiza ti sa, nu Balaam manyi na amesü süpon nu khaghaneni süpon kesüsü pi kekinyipen kesüsü wi ahhansha sa.

³Tsaseng wi Balaam na Balak wi khi, “No mecang pi kekinyi kete wi ha ngan benlalo, hi wa Apvüwa na hi metu tenla nye khe ghang nan na. Ma mangwa pi hi ccüca khe hi pi no kizaben.” Tsalina ma ketan ayikha shoni wi ki

⁴nu ciwi Anyiza na ma metu. Balaam na ma wi khi, “Hi kekinyipen tagü sa nu amesü süpon nu khaghaneni süpon kesüsü pi tsü miwi kekinyi sadhale.”

⁵Apvüwa na Balaam mangwa khilo khe kiza nu ma kesun neng pi Balak wi wa ajüh pi ma kiza thsü.

⁶Tsalina ma wa neng nan Balak na Moab nyi ccülikesathu tsüdi gweghe ma mecang pi kekinyi kete wi ngan benla.

⁷Balaam na atusenjüh ha khishi chi: “Moab kadimiwa Balak na Siriya, nu nishu yikhathu wina hi ssigho. Ma khi, ‘Gho nu ighena kishencü pi Israel nyithu miwi chilo.’ ”

⁸Anyiza na kishencü nkethengwa tsü hi khati nu tsü kishencüya mehai nu? Nyelela Apvüwa na dedi thsülo nkhi lethu, hi khati nu tsü dedi thsülo khiya nu?

⁹Hi alonshi kemisi miwi ben nu mathu muya mehai; Hi yyishiphon miwi ben nu mathu ghang ben. Mathu na mizzatenti kesü mathu ketan hangben; Mathu na mizzatenti kepathu miwi kesawegü pvüle kesa mathu na chüben.

¹⁰“Israel shicübvüghathu na ayyinikhu ti — mathu na sha mtsü nu si meyakhi. Hi ya Anyiza nyi kesü ti nu itsathang sakhenwa sa thsülo; Hi ya ketsatan nyi ti nu cca shü thsülo.”

¹¹Balak na Balaam wi khi, “No ituwi khati sadha nu? No ighinyithu kishencü thsüle hi no ssi ghole, isala no sawegü pi mathu cüdha.”

¹²Ma luneng, “Hi Apvüwa na khilo kesa ketan khiya mehai le.”

¹³Tsaseng wi Balak na Balaam wi khi, “No hi gweghe apen kepa wi gholo, no ciwi na Israel nyithu pahan ketan muya mehai. No ciwi ighena mathu kishencülo.”

¹⁴Ma ssinu Zofim yyi wi Pisga Yikha shoni wi ki. Ciwi la ma kekinyipen tagü sa nu amesü süpon nu khaghaneni süpon kesüsü pi tsüthu miwi ahhansha sa.

¹⁵Balaam na Balak wi khi, “Hewi no mecang pi kekinyi sakeben kete wi ngan benlalo, hi wa ka wi Anyiza metu ten na.”

¹⁶Apvüwa na Balaam na mangwa khilo khe kiza nu ma kesun neng pi Balak wi wa ajüh pi ma kiza thsü.

¹⁷Tsalina ma wa neng nan Balak na Moab nyi ccülikesathu gweghe ma mecang pi kekinyi sa keben kete wi ngan benla. Balak na Apvüwa na mangwale khi khe keü chi,

¹⁸nu Balaam na atusenjüh ha khishi chi: “Zippor tsa Balak, gho nu hi mangwale khiten khe kina chilo.”

¹⁹Anyiza na anyi ti milimesa nten; Ma anyi ti ma kemeshen kemili nten. Ma mangwa khishidha khe ma tsü saden; Ma mangwa khi khe tsü saden.

²⁰Sawegü pi cülo kesa hi kecükegwe chi theng; nu Anyiza na sawegü pi cüthu hi tsü cü neng keya nmi.

²¹Hi Israel nyi tucüki muben, acenpvü nkemi nu agükeccü na ma miwi gho nben. Apvüwa mathu Nyiza na mathu ssiden; Mathu na ma mathu kadimiwale kesa pi thangchi.

²²Anyiza na Ejipt wina mathu ssi shhugho; Ma hadasi süpon kezü ti nu mathu ghena nyu ssi saden.

²³Ciwi chokechü nu kedema kekhang pi Israel mizzatenti matangkeya mangla nmi. Khilitsü anyithu na Israel cüki khiden, “Anyiza na khati sadha khe ghang chilo!”

²⁴“Israel mizzatenti na ssensitemi kekhang ntsa ti le: Tsa pala ghan nu mezüdhi-menzüghe, nu ghan ketheng jjüwa tsü npi jjükeya chu ceen ben nten.”

²⁵Balak na Balaam wi khi, “No kishencü pi Israel nyithu miwi kechi hhaghe ben, isala sawegü pi mathu miwi nchi lalo!”

²⁶Balaam na luneng, “Apvüwa na hi kekiza tsüdila sabenle kesa hi no nkiza kwe?”

²⁷Balak na khi, “Hi gweghe ghalo, hi no ssinu apen kepa wi waden. Anyiza na ciwi no ighena mathu kishencü thsü mvu benla mehai.”

²⁸Tsalina ma Balaam ssinu Peor Yikha shoni wi ki nu ciwi na ayyi- keshü tsü ghang chi.

²⁹Balaam na ma wi khi, “Hewi ighena kekinyipen tagü sa nu amesü süpon tagü nu khaghaneni süpon tagü sen gholo.”

³⁰Balak na ma salo kekiza ti sa, nu amesü süpon nu khaghaneni süpon kesüsü pi kekinyipen kesüsü miwi ahhansha sa.