Read Northern Rengma Naga SHICÜSI 24 Bible Online

SHICÜSI 24 - Northern Rengma Naga bible

SHICÜSI 24

¹Balaam na khilitsü Apvüwa na ma sawegü pi Israel nyithu cü thsü mvu keben chüyadha, tsalina ma hatuwi kesa ti azensu tsü n-ghang la. Ma ayyikeshü kepeghewa tsü ghang chi,

²nu Israel nyithu na amizza amizza sala kemnanpen sa keben muya. Anyiza ghamu na ma miwi gho nu

³ma atusenjüh ha khishi chi: “Beor tsawa Balaam jüh, anyi mehaitsü mushitha kesawa jühthu,”

⁴Ma Anyiza na mangwale khiben khe zaya mehai. Hi qancadu lela inyonkü nu amansa keben wi, Anyiza wi kemanthi kesü muya.

⁵Israel nithsüjjenthu na atsimehai ntsawa,

⁶Palm chanton na keseniela saghu keben ti kesa, nyelela ghaku kesü ghüsa wi asankuthu tile, Apvüwa na sheng ketheng aloe chanton ti kesa, nyelela atssü kete wi Sedar chanton tile.

⁷Mathu na atsankegho kejon pvüyaben, nu tsüthu cü pi atssü na ten kemehai sa keben lli wi sheng chiyaben. Mathu kadimi na Agag miwi dikiben, nu ma kadikesa na tisiekayi ntsa saben.

⁸Anyiza na Ejipt wina mathu ssi shhugho; Ma hadasi süpon kezü ti nu mathu ghena nyu ssisaden. Mathu na mathu ghinyithu meji, mathu gü nyeggücha, mathu lakusü yasa pia.

⁹“Mizzatentiwa tsüna ssensitemi kekhang ti kesa; ma jenkeben wi thola leben-jjan nu ma pa mechü meya, thowa na sawegü pi Israel cü khe kesawegü pvüyaben, nu thowa na kishencü pi Israel cü khe kishen-keshi pvüyaben.”

¹⁰Balak na ma ghepvü pi ma kwen misügüya nu Balaam wi khi, “Ighinyithu kishencülo nu hi no ci chi, isala no khili ha kecheng tughu sawegü pi mathu cüdha,

¹¹khili ajjen wi whalo! Hi nkutimen sacüle khishidha, isala Apvüwa na no ya nkutimen nmu thsüladha.”

¹²Balaam na khineng, “Hi no nyilothu kesun pi hi wi kechithu kizadha,

¹³no kadipen wi keben suna nu rükatssü tsüdi pi hi cü lela hi mangla hi kemeshen sa nu Apvüwa na khukechi tsü nkinala sa meya cha. Apvüwa na hi mangwa khilo khe tsü ketan khiben.”

¹⁴Balaam na Balak wi khi, “Hi khili inyithu wi whaneng tendha, isala hi npi kebvü wi haseng wi Israel nyithu na n-nyithu miwi mangwa sachi ben khe pi no kitsan chiben.”

¹⁵Isanu ma atusenjüh ha khishi chi: “Beor tsawa Balaam jüh, anyi mehaitsü mushitha kesawa jühthu,”

¹⁶Anyiza na mangwale khiben khe zaya mehai, nu Kemisintsa wina kegho kechüwa tsü yayaden. hi qancadu lela inyonkü nu amansa keben, Anyiza wi kemanthi kesü muya.

¹⁷Hi tucüki wi ghang chi, nu Israel mizzatenti muben. Mizzatenti tsüwa wi kadimi kesü na ghotsi kewegü ti shhugho ben. Israel wina ghotsi keti comet ti shhugho ben. Ma Moab ccülikesathu pacha ben, nu Seth nyithu tsüdi pasha ben.

¹⁸Ma Edom wi ma ghinyithu miwi khangya, nu mathu yyi nka pi ma ji sayaben, Israel nyi na khangki benden.

¹⁹“Israel mizzatenti na mathu cüden, nu asakhen wi hang kebenthu la yasa shaben.”

²⁰Tsaseng wi Balaam na kemanthi wina Amalek nyithu muya nu ma atusenjüh ha khishi chi: “Amalek na mizzatenti tsüdi ja wi kekhang ntsawa, isala asakhen wi tsüna anuphanla dediaben.”

²¹Ma kemanthi wina Ken nyithu muya nu ma atusenjüh ha khishi chi: “No hang keben pen witsü keyazi nmi, n-ghacen na alonshi kemisi miwi keben ti.”

²²“Isala no Ken nyithu yasa shaben, Assiriya na no ghan sen wa atssüzü sa thsü kesa wi.”

²³Balaam na atusenjüh ha khishi chi: “Aghawa anyi saghu kebenthu ha thothu nu?”

²⁴“Kenkathu na Sipra wina atssü miwi ghoben; mathu na Assiriya nu Eber miwi khangya ben, isala mathu la anuphanla dediaben.”

²⁵Tsaseng wi Balaam na kidenya nu ajjen wi whaneng, nu Balak la ma len wi wa.