Read Northern Rengma Naga SHICÜSI 25 Bible Online

SHICÜSI 25 - Northern Rengma Naga bible

SHICÜSI 25

¹Israel nyithu na Akakia yyiketijü wi kemnanpen sa keben wi npvüzathu na Moab nyi nzathu ciwi kebenthu ssimehai wa.

²Nza hathu na Moab nyi cenpvü kekinyi hhansha kesa kemishu wi mathu ci chi. Israel nyithu na Peor wi Baal cenpvü kekinyi tsse tsü dsa.

³Tsalina Apvüwa na mathu miwi aghepvü

⁴nu Mosa wi khi, “Israel ccülikesathu tsüdi ssiya nu ijüh kenie wina mathu pi aghanan tsü wi pathilo, isathu hi anyithu miwi aghepvü nbendha.”

⁵Mosa na kedithu wi khi, “Nthu kesüsü nthu mizza wi anyi thothu na Peor wi Baal tsü kinyi wa khe tsüdi pathilo.”

⁶Mathu na Apvüwa ketenpen Nithsüjjen kedulen wi kicennali keben wi Israel nyi kesü na azitenti nu Mosa kemu wina Midia nyi nza kesü ssinu ma nithsüjjen wi dua.

⁷Aaron keqhaikediwa tsa Eleazar tsawa Fineha na tsü kemu wi ma shagha nu azitenti tsü teshi nu bvüa. Ma wa apie kesü khuya,

⁸nu anyi tsüwa nu nzawa manyi niedu nithsüjjen wina apie pi manyi qho mejenthighu. Hatinu adhagha na Israel yasa kebenwa tsü khen,

⁹isala tsüghena anyi hazar nkwe nu mejü shüa.

¹⁰Apvüwa na Mosa wi khi,

¹¹“Fineha kekuli ghena hi Israel nyi miwi aghe-npvü ladha. Ma hi ketan khe acenpvü kepa wi kekinyi tsü ghang pvü ben nkeya ghena hi aghepvü nu mathu n-yasa ladha.

¹²Tsalina hi ma ssinu matsü ghaketen wi tsüdi ghena Cenkethenjüh kesü sa tenle kizalo.

¹³Ma nu ma shicübvüghathu na anuphan ghena keqhaikedithu sa thsüdha, kepaghenanye ma hi matang ketenthu ghena kekheneng me yala nu anyithu kesami ghena teshi kecü sengho.”

¹⁴Israel nyi kesü pi Midia nyi nzawa gweghe pathi kesawa nyan tsüna Salu tsawa Zimri, Simeon mizza wi atheghi kesü wi aliwa.

¹⁵Nzawa nyan na Kozbi. Ma ba Zur na Midia nyi geithu ja wi akhang kesü wi aliwa.

¹⁶Apvüwa na Mosa kiza,

¹⁷“Midia nyithu ssikesali nu mathu pathilo,

¹⁸kepaghenanye mathu Peor wi nthu kemechu wi nkemehai kesa, nu Peor wi adhagha kesa tsüwi pathi kesawa Kozbi tsü ghena.”