Read Northern Rengma Naga SHICÜSI 31 Bible Online

SHICÜSI 31 - Northern Rengma Naga bible

SHICÜSI 31

²“Midia nyithu na Israel nyithu miwi kuli kechi ghena kemeten pi mathu cülo. No tsüti kesa seng wi no shüaben.”

³Tsalina Mosa na anyithu wi kiza, “Aghikesa ghena kiden-kesha yalo, isanu nthu na Midia nyithu ssikesali nu mathu na Apvüwa miwi kuli kechi ghena kemeten pi mathu cüden.

⁴Israel nyi mizza kesüsü wi anyi hazar kesüsü kesun pi aghi wi chilo.”

⁵Tsalina amizza kesüsü wi anyi hazar kesüsü kessiya, saghu anyi hazar taghakeni na aghi ghena kidenya.

⁶Mosa na keqhaikediwa Eleazar tsa Fineha, kemetha tsanqaithu nu zensu khukechi ghena tutuwathu kenonccawa yala mathu benchüwa sa kesun pi aghi wi chi.

⁷Apvüwa na Mosa kekiza ti mathu na Midia nyithu ssikesali nu anyi tsüdi pathia.

⁸Midia nyi kadimithu manga saghu: Evi, Rekem, Zur, Hur, nu Reba. Mathu na Beor tsa Balaam la pathia.

⁹Israel nyithu na Midia nyi nzathu nu ghanyithu ghanya, mathu mesüsi nu sahangthu kuya, mathu keben-keyeng tsüdila yasa,

¹⁰nu mathu nyunutithu nu kemnanpenthu tsüdila mecang chia.

¹¹Mathu na atsanqai peghekeya tsüdi pi atssüzüthu nu asahangthu saghula khuya,

¹²nu tsüthu khusen Mosa, Eleazar, nu Israel nyi zitenti na Jerikho wina Jordan yyi khhakawa Moab deshentijü wi kemnanpen sa keben wi tsü gho.

¹³Mosa, Eleazar, nu azitenti ccülikesathu tsüdila kemnanpen wina shhula süpahizi metu.

¹⁴Mosa na aghi wi kheneng keghothu hazar, nu meza miwi benchüthu miwi ma aghepvü.

¹⁵Ma mathu keü, “Nthu mangkesa na nzathu tsüdi pi hang thsü ben nu?

¹⁶ Nzathu na Balaam kecükegwe nie nu Peor wi anyithu ssi wa Apvüwa wi jühtsentsa nsa thsüla kesa tsü chüyalo. Tsüghena adhagha sengho Apvüwa nyithu miwi chile.

¹⁷Tsalina khili npvüza nu nza tsüdi nyu ssimehai kesathu tsüdila pathilo.

¹⁸Isala nza pvünyimetha kebenthu tsüdi pi nthu ghena theng yalo.

¹⁹Nthu na nyu pathi nyelela keshü kamang kidhen kesathu tsüdila ghanan tagü kemnanpen na ameiwa benlalo. Kecheng nu tagü ghanan wi nthu na nthu nu nthu na ghankeya nzathu tsü satemethalo.

²⁰Nthu thsümeni la tsüdi nu tsanqaitsana katsü ha lela asahyu, aneni ssen nyelela achan pi kesa tsüdila sametha nsathu yishü.”

²¹Keqhaikediwa Eleazar na anyi aghi wi kheneng keghothu wi khi, “Apvüwa na Ajen hathu ha pi Mosa cü theng.

²²Pala mecangya nketen suna, rükatssü, lezza, amighe, tin, nyelela shisha, hathu tsüdi pila anni wi sametha shaben. Pala kepa wi tsüdila satemetha le kesalina sakemetha tssü pi bhu shaben.

²³

²⁴Tagü ghanan wi nthu thsümeni ghasü; tsaseng wi ccüna nthu na keccüna wi metha nu kemnanpen wi duya mehai.”

²⁵Apvüwa na Mosa wi khi,

²⁶“No, Eleazar, nu azitenti ccülikesathu gweghe atsanqai nyu ji shukeya pila atssüzüthu nu asahangthu saghu ssiyalo.

²⁷Tsüthu pi gishü keni meceqe saya, gishü kesü na süpahithu ji nu kepawa na azitenti ji.

²⁸Süpahithu shei wi atssüzüthu, mesüsi, gada, khaghaneni, nu anenithu tsü Apvüwa ghena khajana meza manga wi kesü pi thengya.

²⁹Tsüthu pi aju kemehai ntsa sapi Apvüwa kecü sala pi keqhaikediwa Eleazar cülo.

³⁰Anyi kepathu shei wi atssüzüthu, mesüsi, gada, khaghaneni, nu anenithu tsü deni wi kesüsü pi thengya. Tsüthu tsüdi pi Apvüwa Nithsüjjen noncca keten Levi nyithu cülo.”

³¹Mosa nu Eleazar manyi na Apvüwa kekhi ti sa.

³²Süpahithu na nyu ji shuya nu pahan pi mathu ji sakeya miwi hathu ha ben: 675,000 khaghaneni nu anenithu, 72,000 mesüsi, 61,000 gada, nu 32,000 pvünyimethathu.

³³

³⁴

³⁵

³⁶Süpahithu ji gishü pahan 337,500 khaghaneni nu anenithu, ciwi 675 tsüna Apvüwa ghena khajana; 36,000 mesüsi, na süpahithu ghena, ciwi 72 tsüna Apvüwa ghena khajana; 30,500 gadathu na süpahithu ghena, ciwi 61 tsüna Apvüwa ghena khajana; nu 16,000 pvünyimethathu na süpahithu ghena, ciwi 32 tsüna Apvüwa ghena khajana.

³⁷

³⁸

³⁹

⁴⁰

⁴¹Tsalina Mosa na Apvüwa na kekhi ti khajana pi aju kemehai ntsa sapi Apvüwa kecü tsüpi Eleazar cüa.

⁴²Azitenti ji la süpahithu ji tsü makesü: 337,500 khaghaneni nu anenithu, 36,000 mesüsi, 30,500 gadathu, nu 16,000 pvünyimethathu.

⁴³

⁴⁴

⁴⁵

⁴⁶

⁴⁷Apvüwa na kekhi ti Mosa na hawi atssüzüthu nu asahangthu deni wi kesüsü khuya nu pi Apvüwa Nithsüjjen noncca keten Levi nyithu cüa.

⁴⁸Tsaseng wi süpahi benchüthu na Mosa wi wa,

⁴⁹nu khi, “Kediwa, ikhang na süpahithu si nandha, nu mathu kesütanla ncen nsale.

⁵⁰Tsalina ikhang na khukeya suna ghethu, akhwe, akhwesa, kwenzzakeqhan, khuna thighi, nu ayanthu tsüdila sen ghoben. Apvüwa na ikhang khweya thsüle kesalina, ikhang kahang ghena hathu pi ma cüben.”

⁵¹Mosa nu Eleazar manyi na suna pi kesa aghethu tsüdila khuya.

⁵²Benchüthu na khukechi saghula kuwhu kilogram meza keni-u sa.

⁵³Anyi benchü nkenyethu na mathu nyu ji shukeya tsüpi thengya.

⁵⁴Tsalina Mosa nu Eleazar manyi Apvüwa na Israel nyi khweya thsüle kesalina suna tsü khusen Nithsüjjen wi wa.