Read Northern Rengma Naga SHICÜSI 32 Bible Online

SHICÜSI 32 - Northern Rengma Naga bible

SHICÜSI 32

¹Reuben nu Gad mizzathu na asahang kejonla ben. Mathu na Jazer nu Gilead yyi tsüna mesüsi ghena mehaitsü keben mukeya wi,

²mathu na Mosa, Eleazar, nu azitenti ccülikesathu wi wa nu khi,

³“Apvüwa na Israel nyithu kiqa pi nkaya thsü kesa ayegu hawa ha — Ataroth nyutithu, Dibon, Jazer, Nimra, Heshbon, Eleale, Sibma, Nebo, nu Beon — ha asahangthu ghena ayyi kemehai, nu ikhang na asahang kejon ben.

⁵Nchala ayyi hapi ikhang cü nu ikhang ji saya thsülo, nu ikhang ya Jordan Ghaku pvüdhi nwa thsüla nu hewi benwa thsülo.”

⁶Mosa na luneng, “No Israel nyi kepathu na aghi wa lethu nthu na hewi benwa mvu ben kwe?

⁷Nthu na khati nu Israel nyithu na Jordan pvüdhi sen nu Apvüwa na ayyi pi mathu cü ketheng witsü dule kesa khiteshüya mehai nu?

⁸ Hi Kadesh Barnea wina nthu bathu kesun pi ayyi hhainan kewa thsü tsü la tsü makesü sale.

⁹Mathu na Eshkol yyiketijü kecu wi wa ayyi tsü mu nu kheneng gho, isala mathu na Apvüwa na ayyi pi mathu cü ketheng witsü dule kesa anyithu khiteshü.

¹⁰ Apvüwa na tsü ghanan ma ghepvü nu kishen:

¹¹‘Mathu na ijühkeya wi nbenla kesalina anyi Ejipt wina keshhugho kahang amapi nkwe nu tsümiwi keqhaiki kesüla hi ayyi pi Abraham, Isak, nu Jakob, cüle khishi ketheng witsü dukeya nmi kesa hi kishenben.’

¹²Hawa ha Keniz nyiwa Jefunne tsa Kaleb nu Nun tsawa Joshua manyi ketan khe tsüdila saghuben; manyi na Apvüwa jühkeya wi ben.

¹³Apvüwa na anyithu miwi aghepvü nu ma nkenen sa kesa bvüye tsü npi keshükhi chu mathu sapi amapi jügha aghansha wi kegoedeja wa thsüa.

¹⁴Nthu na khili nthu bathu pen wi bendha, kesami nyi bvüye ketheü kesü na Apvüwa ghekepvü sengho Israel nyithu miwi chi nengle bendha.

¹⁵Keujüla no Reuben nu Gad nyithu na ma n-nie mvula hhaghe lethu, ma kheneng aghansha wi anyi hathu tsüdi teshiaben, nu mathu na shü lethu tsüna nthu ghena le.”

¹⁶Mathu na Mosa tetsaki wha nu khi, “Ikhang ya atuwa sa alon pi khaghaneni ghapeng sa nu ikhang tsangathu ghena anyunuti khweti saya thsülo.

¹⁷Tsaseng wi ccüna ikhang na Israel nyithu gweghe aghi wi wale kidenya na, nu mathu pi ayyi ciwi benya thsü nu nkapi mathu ji npi sakeya chu ikhang na atuwa sa nyu ssikesali ben. Tsü tsüwi ikhang tsangathu ya anyunuti khweti sa ketheng wi ayyi he nyithu tuwi yazishu hangya thsülo.

¹⁸Israel nyi kepathu tsüdila ayyi nkapi mathu keben npi sakeya chu ikhang na ikhang jjen wi kheneng gho nbenle.

¹⁹Ikhang na Jordan khhakawa mathu ja wi keben-keyeng mangla ya nben, kepaghenanye ikhang na Jordan nishuwa hewi ikhang shei muyadha.”

²⁰Mosa na khineng, “Nthu na khi keben ti ntsakhiwa lethu, hewi Apvüwa tuwi na jühkekina ghena nthu na aghi wi wale kiden yalo.

²¹Nthu aghikesa nyi tsüdi Apvüwa tuwi na Jordan pvüdhi wa nu Apvüwa na ithu ghinyithu miwi npi khangkeya chu mathu ssikesali,

²²nu ayyi nkaya shaben. Tsaseng wina nthu na kheneng ghoya mehai, kepaghenanye nthu na Apvüwa nu nthu Israel nyithu tuwi kesau sadha. Isalethu Apvüwa na Jordan nishuwa ayyi ha nthu jidha le saben.

²³Isala keujüla nthu na kekhishi tsü nsala lethu, hi nthu kitsan ben, nthu na Apvüwa tuwi sami shaben. Tsüghena nsazzi lalo; nthu kesami men kemeten pi nthu cüben.

²⁴Tsalina nthu nyunuti saya, nu khaghaneni ghapeng sayalo, nu nthu khishi ketheng tsü salo.”

²⁵Gad nu Reuben nyithu na khi, “Kediwa, no kekhi ti ikhang na tsü saden.

²⁶Ikhang wubvü nu tsangathu, mesüsi nu khaghanenithu pi Gilead nyunutithu wi chi thengla shaben.

²⁷Isala ikhang tsüdila Apvüwa jühkina nu aghi wi wale kiden yadha. No kekhi ti ikhang na Jordan pvüdhi wa nyu ssisa den.”

²⁸ Tsalina Mosa na ahza hathu pi Eleazar, Joshua, nu Israel nyi ccülikesathu cü:

²⁹“Keujüla Gad nu Reuben nyithu na Jordan pvüdhi wa Apvüwa jühkina wina aghisale kidenya, nu nthu na mathu kekiqa sen nu ayyi nkaya lethu, Gilead yyiwa tsüpi mathu ji saya thsülo.

³⁰Isala keujüla mathu na Jordan pvüdhi sen nu nthu gweghe aghi wi nwa lethu, mathu la nthu ti Kanaan yyi wi mathu ji keben muyaben.”

³¹Gad nu Reuben nyithu na khi, “Kediwa, Apvüwa na kekhi ti ikhang na tsü saben.

³²Apvüwa jüh kenie wina ikhang na Kanaan pvüdhi du nu aghi wi waden, isanu ikhang na he Jordan nishuwa ikhang keben benyaden.”

³³Tsalina Mosa na Amor nyi kadimi Sihon nu Bashan nyi kadimi Og yyi tsüdi pi anyunutithu nu mathu kevü diyyi saghula pi Gad nu Reuben mizzathu nu Manasseh mizza gishü pahanthu cüa.

³⁴Gad mizza na anyunuti hathu khweti sapfü: Dibon, Ataroth, Aroer,

³⁵Atroth, Shofan, Jazer, Jogbeha,

³⁶Beth Nimra, nu Beth Haran.

³⁷Reuben mizza na anyuti hathu sapfü: Heshbon, Eleale, Kiriathaim,

³⁸Nebo, Baal Meon, (ha nyan kemili), nu Sibma. Mathu na anyuti kesathu nyan tsü ketheü cia.

³⁹Manasseh tsa Makhir gei na Gilead yyi kenka wi Amor nyithu jügüshi pi nu ciwi benya.

⁴⁰Tsalina Mosa na Gilead tsüpi Makhir gei cü nu mathu na ciwi hang wa.

⁴¹Manasseh mizza wi Jair na anyu pahan ssikesali nu ghanya nu tsüthu nyan pi “Jair Nyuthu” cia.

⁴²Noba na Kenath nu ma nyuthu ssikesali nu ghanya nu tsü ci kemili pi ma nyan wina Noba sa.