Read Northern Rengma Naga SHICÜSI 35 Bible Online

SHICÜSI 35 - Northern Rengma Naga bible

SHICÜSI 35

¹Jerikho wina Jordan khhaka hewa Moab deshentijü wi Apvüwa na Mosa wi khi,

²“Israel nyithu na mathu shei mukeya witsü anyunuti pahan nu tsüthu kevü wi amou pi Levi nyithu cü nu hang thsülo kizalo.

³Anyunuti hathu hana Levi nyithu ji saden, nu mathu na ciwi hangben. Amou yyi tsüna mesüsi nu asahang kepathu ghena.

⁴Amou yyi tsüna nyunuti khweti na ameiwa kevü tsüdi wi 450 meter saben.

⁵Isanu anyunuti pi ma non sa nu ma kevü tsüdi wi ayyi ketikesie na 900 meter saben.

⁶Nthu na kuthikeya anyunuti tugho pi Levi nyithu cülo nu anyi kesü na nyu pathimi lethu wa ciwi ben thsülo. Tsümiwi anyunuti jügha nu keni pi

⁷amou yyi tsüdi saghu 48 pi mathu cülo.

⁸Amizza kesüsü wi Levi nyi nyunutithu khaju saden khe ayyi ketikizza kenie wina saben.”

⁹ Apvüwa na Mosa kiza

¹⁰nu Israel nyithu wi khi thsü, “Nthu na khathansha Jordan Ghaku pvüdhi nu Kanaan yyi wi duya khe,

¹¹nthu na kuthikeya nyunutithu kessiya nu anyi kesü na nyu pathimi lethu wa ciwi ben thsüle kesalina.

¹²Ciwi ma pathi kesawa theghi na ajukhiya le ketenthu tuwi yazishu benyaben. Anyi kesü nyu kepathi ghena anyithu tuwi ajüh nkaghakhila pi nshü thsüla.

¹³Anyunutithu tugho kessiyalo,

¹⁴Kecheng na Jordan na nishuwa nu kecheng na Kanaan yyi wi.

¹⁵Hathu ha Israel nyithu nu asangthu matsü keu ketan nyelela anuphan ghena mathu ja wi hangwa kesathu ghena kuthikeya nyunutithu saden. Anyi kesüle kesü lela nyu pathimi kesawa na bvü wa tsüthu kesü wi benya mehai.

¹⁶“Isala, keujüla anyi kesü amighe, alon, nyelela achan pi nyu pathi lethu ma nyu kepathi ghena sazzidha nu ma pi shü thsüaben.

¹⁹Keshüwa theghi ma ghatsan ntsawa tsüna nyu kepathiwa pi keshü thsü tsüna ma khhi. Ma kusi anyi tsüwa muya khe ma pathiaben.

²⁰Keujüla anyi kesü na nyu nanmeghü nu ma deshen pi khuli nyelela pala pi ma kecen,

²¹nyelela ma kwen pi ma shun nu shü lethu, ma nyu kepathi ghena sazzidha nu ma pi shü thsüaben. Keshüwa theghi ma ghatsan ntsawa tsüna nyu kepathiwa pi keshü thsü tsüna ma khhi. Ma kusi anyi tsüwa muya khe ma pathiaben.”

²²Isala keujüla anyi kesü na nyu n-nanmeghü nu aghandu nkenye wi ma deshen pi khuli nyelela pala pi ma kecen nu shü.

²³Nyelela keujüla anyi kesü na n-ghang la alon pi dhenchi nu ma aghandu sale nkeben ma ghinyi nkenyewa tsü kecenthia.

²⁴Ha jjügi ghena azitenti na shü kesawa theghi ajukhiyale kebenwa nyelela nyu kepathiwa sheikepi wina ajühkaghakhi ben.

²⁵Azitenti na keshüwa theghi kwen wina anyi nyu pathi kesawa tsü khushiya nu ssineng wa ma bvüwa kesa kuthikeya nyunuti wi chiaben. Tsü tsüwi Keqhaikedi ntsawa sa kebenwa na npi keshü chu ma ciwi hangwa nsathu yishü.

²⁶Keujüla anyi nyu pathi kesawa na bvü wa kuthikeya nyunuti tsü teshi nu bvüa,

²⁷nu keshüwa theghi na ma muya nu ma pathi lethu, ajukekhi kekuli ha nyu kepathi nye.

²⁸Anyi nyu kepathiwa na Keqhaikedi ntsawa npi keshü chu kuthikeya nyunutiwa tsü nteshila ciwi hang, isala tsaseng wi ccüna ma ajjen wi kheneng ghoaben.

²⁹Ayen hathu ha nthu nu nthu shicüthu na kahe wi hang lela nieben.

³⁰“Anyi nyu kepathiwa kesazzi mukeya tsüna chüza keni nyelela tsümiwi jiki ccüla ma pi shü thsüben; chüza kesütan tsüna nyu kepathiwa nmeshensa qo.

³¹Anyi kepathiwa pi shü thsüaben. Ma apisa pi tsü dhi nu bvüya nben.

³²Keujüla anyi kesü na kuthikeya nyunuti wi bvü lethu, ma ya Keqhaikedi ntsawa npi keshü wi ajjen wi ghoneng thsüle kesa ma ya kedhikejü pi ncü thsüla.

³³Keujüla nthu na ha sadha lethu, nthu na nthu hang keben ayyiwa tsü nakhiaben. Anyi kepathi ghena ayyiwa tsü nakhiaben, nu nyu kepathiwa tsüpi shü thsü nkesa tsü ciwi mangla sapi keccüna sa nu nyu kepathi nyi kahang yyi tsü samethakeya nmi.

³⁴Nthu na hang kebenwa yyi tsü n-nakhi lalo, kepaghenanye hi Apvüwa nu hi Israel nyithu ja wi hangben.”