Read Northern Rengma Naga SHICÜSI 4 Bible Online

SHICÜSI 4 - Northern Rengma Naga bible

SHICÜSI 4

¹Apvüwa na Mosa kiza

²nu Levi nyi Kohath gei wina gikezighe nu atheghithu kenie wina nyanzhüghu thsü,

³nu npvüza amapi changha na wa deni jüwi Apvüwa ketenpen Nithsüjjen wi kekuli kesa qo nyi nyan tsüdi zhü ya thsüa.

⁴Mathu kekuli tsüna kemetha tsanqaithu kenoncca.

⁵Apvüwa na kecükegwe hathu pi Mosa cü. Kemnanpen pheghe keten tsüwi Aaron nu ma tsathu na Nithsüjjen wi du nu Cenkethenjüh Khitson tuwi keshonthsü tsü khusha pi Akhitson tsü meju yaben.

⁶Mathu na asahyu kemeju kemehai pi ma miwi chiya, athsü atsena kesü pi ma miwi shizighe, nu ma kepie chan pi shon chiya.

⁷Mathu na amesa pi Apvüwa kekinyi ghena athsü atsena pi miz miwi shiya nu akhu, hankedemvu kechi khu, kekinyi khu, nu kisengtssü pi kekinyi ghena afüthu pi ma miwi chiya. Amesa na keshüthangla miz miwi benben.

⁸Mathu na athsü kenmie kesü pi tsüthu miwi chi, asahyu kemeju kemehai kesü pi ma miwi chiya, nu ma kepie chan pi shon chiya.

⁹Mathu na athsü atsena kesü pi ahula kedonpen, ahula, ma khukhi, ma khala khu, nu oliv deli kechi khu tsüdi meju yaben.

¹⁰Mathu na asahyu kemeju kemehai pi tsü nu ma tsanqaithu meju pi kepie ji miwi chiaben.

¹¹Tsaseng wi mathu na athsü atsena pi suna pi sa ketheng kekinyipen miwi tsü shizighe, asahyu kemeju kemehai pi tsü mejuya, nu ma kepie chan pi ghechi yaben.

¹²Tsaseng wi mathu na Kemetha Pen wi kesenji ahyikhu tsüdi khuya nu athsü atsena pi tsüthu mejuya, asahyu kemeju kemehai kesü pi tsü miwi chiya, nu tsüthu pi kepie ji miwi chiyaben.

¹³Mathu na kekinyipen miwi kemecang khala khupi nu athsü nmiepheü kesü pi tsü miwi shizighe yaben.

¹⁴Mathu na kekinyipen kekuli wi kesen tsanqai tsüdi pi chiyaben: anni khu, akhu magi keben, ametsi ketsuwa, nu akwen kemetsikhu. Tsaseng wi mathu asahyu kemeju kemehai pi tsü miwi chiya nu kepie chan pi ghechi yaben.

¹⁵Kemnanpen pheghe keten tsüwi Aaron nu ma tsathu na kemetha tsanqaithu tsüdi mejuya ccüla Kohath gei wi anyithu na ghola tsü pie yaben. Kohath gei wi anyithu na kemetha tsanqaithu tsü pa yishü, isalethu mathu na shüaben. Khathansha wi Nithsüjjenwa tsü papheghe khe hathu ha Kohath nyithu dulu.

¹⁶Keqhaikediwa Aaron tsa Eleazar dulu na Nithsüjjen maben nu ahula deli, hankedemvu, asu pi kekinyi, kenyenji deli, nu Nithsüjjen wi satemetha pi Apvüwa wi chi kesathu tsüdi ghena.

¹⁷Apvüwa na Mosa nu Aaron manyi kiza,

¹⁸“Kohath gei nyithu yala ciwi ngho thsüla,

¹⁹kemetha tsanqaithu kete wi gho nu mathu pathi thsü nsala. Hati kesa khenle kesalina Aaron nu ma tsathu na wala kekuli pi mathu tsüdi cü nu kesüsü mangwa nsathu yishü khe kizalo.

²⁰Isala Kohath nyithu na Nithsüjjen wi du nu keqhaikedithu na kemetha tsanqaithu tsü ketssen le kiden keben mu[1] lethu mathu na shüaben.”

²¹Apvüwa na Mosa kiza

²²nu Levi nyi wi Gershon gei wina gikezighe nu atheghithu kenie wina nyanzhüghu thsü,

²³nu npvüza amapi changha na wa deni jüwi Apvüwa ketenpen Nithsüjjen wi kekuli kesa qo nyi nyan tsüdi zhüya thsüa.

²⁴Atsanqai hathu kepvü hana mathu dulu:

²⁵Nithsüjjen, ma nonwa keshon, ma miewa keshon, asahyu kemehai pi ma miwi kemeju, kedulen wi keshonthsü,

²⁶Nithsüjjen nu kekinyipen khemi-jonqhe wi keshonthsü nu ali, khemi-jonqhe wi kedulen keshonthsü, nu atsanqai hathu kesa wi kesen-jithu tsüdila. Mathu na hathu wi nsenthu keyishü kekuli tsüdi saben.

²⁷Mosa nu Aaron manyi na wala Aaron nu ma tsathu na kekuli pi Gershon nyithu nondi kechi tsü tsüdila sala nsa khe ghang ben.

²⁸Nithsüjjen wi kekuli hathu hana Gershon gei nyithu dulu: keqhaikediwa Aaron tsa Ithamar kekhu wi mathu na kekuli ha saben.

²⁹Apvüwa na Mosa kiza nu Levi nyi wi Merari gei wina gikezighe nu atheghithu kenie wina nyanzhüghu thsü,

³⁰nu npvüza amapi changha na wa deni jüwi Apvüwa ketenpen Nithsüjjen wi kekuli kesa qo nyi nyan tsüdi zhüya thsüa.

³¹Atsanqai hathu kepvü hana mathu dulu: Ajjen- chan, ameghethu, donbvü, zenza, kecetenji,

³²nu Nithsüjjen khemi-jonqhe shonkevüli ghena ali pi tsü kepieki ji sa keten tsanqai tsüdi. Meshu kesüsü atsanqai kesüsü pvüben.

³³Nithsüjjen wi mathu kekuli hathu hana Merari gei nyithu dulu: keqhaikediwa Aaron tsa Ithamar kekhu wi mathu na atsanqai tsüthu tsü pvüben.

³⁴Apvüwa na ahza khukechi kenie wina Mosa, Aaron, nu azitenti ccülikesathu na Levi nyi agei kecheng Kohath, Gershon, nu Merari nyithu nyanzhüghuya. Mathu na atheghithu kenie wina npvüza tsüdi amapi changha na wa deni jüwi Apvüwa ketenpen Nithsüjjen wi kekuli kesa qo nyi nyanzhüghu na hati: [Agei] — [Anyi] Kohath — 2,750 Gershon — 2,630 Merari — 3,200 Maben — 8,580

⁴⁹Apvüwa na Mosa kekiza ti anyi kesüsü nyan tsüdi zhüya, nu Apvüwa na ahza khuchi pi Mosa kecü ti anyi kesüsü ma kekulile kepvükepie lela akhhiwa tsüpi gishü chi.