Read Northern Rengma Naga SHICÜSI 6 Bible Online

SHICÜSI 6 - Northern Rengma Naga bible

SHICÜSI 6

¹Apvüwa na Mosa kiza

²nu kecükegwe hathu pi Israel nyithu cü thsü. Npvüza le nza kesüle kesü lela Nazirit nyi kesü sale kishen nu ma ketanla ma kahang kepa sapi Apvüwa wi chi lethu,

³ ma kisengtssü kekhang nu azü jjü nben. Ma kemeshentsse pi kesa tssü katsüha le nyelela ma bi kahangle keqen sa lela dsajjü nben.

⁴Ma Nazirit nyi sa keben chu kemeshentsse ton wina bün keya ma non, ma kwen lela dsa nben.

⁵Ma Nazirit nyi sale kekishen wi keben chu, ma lissen nyelela ma pang kenye cah nben. Ma kishen nu kahang kepa sapi Apvüwa cü ketheng kekhu wi bendha, nu ma lissen nu ma pang kenye ncahla shigü ben thsüben.

⁶Ma lissen tsüna ma kahang kepa sapi Apvüwa kecü zensu, tsalina ma keshü kamang kete wi wa nu ma ketanla ma nakhi nben, tsüna ma ba, ma jja, ma cünyuwa, nu ma tssüggüwa keshü sa lela.

⁸Ma Nazirit nyi sa keben chu ma satemetha pi Apvüwa wi chidha.

⁹Keujüla ma nyu kete wi keben anyi pahan na zuli shü nu ma Nazirit nyi lissen kemetha tsü nakhi lethu, ma ghanan tagü benla nu ma lissen nu ma pang kenye cahben; isalethu ma keccüna wi metha shaben.

¹⁰Tazen ghanan wi ma nkhetsü nyelela duktur keni sen nu Apvüwa ketenpen Nithsüjjen kedulen wi keqhaikediwa wi ghoben.

¹¹Keqhaikediwa na tsü kesü pi kesami ghena kekinyi nu kepawa pi mecang pi kekinyi sa nu ma keshü kamang kete wi kewa ghena ma satekemetha keccüna tsü sa chiben. Tsü ghanan wi anyi tsüna ma lissen satemetha neng chiben,

¹²nu ma Nazirit nyi kesa matsü la satemetha neng pi Apvüwa cüben. Kheni wakesa matsü tsü nsidha, kepaghenanye ma lissen kemethawa tsü nakhi kesalina. Kedhineng kekinyi ghena ma khaghaneni zza amapi kesü ji kesü sen ghoben.

¹³ Khathansha wi Nazirit nyi kesü ma kekishen matsü tsü cen khe ma keccüna kesü saben. Ma Nithsüjjen kedulen wi wa

¹⁴nu asahang nyu ghojünkeya mangla nkemi kecheng pi Apvüwa cüben: khaghaneni zza amapi kesü ji asüpon kesü mecang pi kekinyi, khaghaneni zza amapi kesü ji aghala kesü pi kesami ghena kekinyi, nu aneni süpon kesü pi kecca ghena kekinyi ghena.

¹⁵Ma amesa azimi nkechi ashijü kesü la khuchiben: awheng pi oliv deli kesaghu amesa shamulu kegü, nu adeli pi kenyen ghapasi, nu tsümiwi asu nu kisengtssü pi kekinyi saben.

¹⁶Keqhaikediwa na ha tsüdi pi Apvüwa cü nu kesami ghena kekinyi nu mecang pi kekinyi sa chiben.

¹⁷Ma aneni süpon tsüpi ahhansha sa nu pi Apvüwa wi kecca ghena kekinyi sa chi, nu amesa ashijü kesü tsü la saghu khupi cüben; ma asu nu kisengtssü pi kekinyi tsü la sa chiben.

¹⁸Nazirit nyiwa na Nithsüjjen kedulen wi ma li whi nu assen tsüpi kecca ghena kekinyi mecang keben anni miwi tsü chiaben.

¹⁹Tsaseng wi aneni süpon hah tsüpi wenya lethu, keqhaikediwa na tsü khuya nu pi ashijü wi amesa shamulu kesü nu ghapasi kesü saghu pi Nazirit nyiwa kwen wi chiaben.

²⁰Tsashi keqhaikediwa na tsüthu pi aju kemehai ntsa sapi Apvüwa cüben; ayenwa wina aneni süpon nnukhu-kisü nu ma ccü tsüna keqhaikediwa ji, tsüthu tsüna keqhaikediwa ghena khukechi kemetha. Tsaseng wi ccüna Nazirit nyiwa na kisengtssü jjüya mehai.

²¹Hathu ha Nazirit nyi ghena ayenthu; isala Nazirit nyi kesü ma kekishen wina nkhuchithu keyishü miwi kekinyi sale ajühkhuchithu ma jühkhukechi nieti nu sacen nchithu yishü.

²²Apvüwa na Mosa kiza

²³nu sawegü pi Israel nyithu kecü wi ajüh hathu ha senlo Aaron nu ma tsathu kiza thsü:

²⁴Apvüwa na sawegü pi nthu cü nu nthu noncca keyawa salo;

²⁵Apvüwa ya nthu nantizen nu nthu tuwi ccatssü keyawa sa;

²⁶Apvüwa na nthu ghang pi ma leben ghashu, nu kecca pi nthu kecüwa salo;

²⁷Apvüwa na khi, “Mathu inyan wina sawegü pi Israel nyithu cü lethu, hi sawegü pi mathu cüben.”