Read Northern Rengma Naga SHICÜSI 7 Bible Online

SHICÜSI 7 - Northern Rengma Naga bible

SHICÜSI 7

¹Mosa na Apvüwa ketenpen Nithsüjjen sa cenkeya tsathang wi Nithsüjjen nu tsü tsanqai tsüdi, kekinyipen nu tsü tsanqai tsüdila ma adeli pi nyen nu satemetha chia.

²Tsaseng Israel meza wi agei gei wi ccülikesathu nyanzhüghu wi accülikesathu na

³mathu kekinyi sen nu Apvüwa wi gho; gari tugho nu amesü süpon taghakeni, gari kesü na accülikesa kenini ghena nu amesü süpon kesü na accülikesa kesü ghena. Mathu na tsüpi kecü seng wi

⁴Apvüwa na Mosa kiza,

⁵“Aju hathu ha khuya nu pi Nithsüjjen kesa ghena senlo; Levi nyithu mathu kekuli kenie wina pi mathu cülo.”

⁶Tsalina Mosa na gari nu amesü süponthu tsüpi Levi nyithu cüa.

⁷Ma gari keni nu amesü süpon mejü pi Gershon nyithu cü,

⁸nu gari mejü nu amesü süpon tazen pi Merari nyithu cüa. Mathu kekuli tsüdila Aaron tsawa Ithamar lenketsütson kenie wina sa.

⁹Isala Mosa na gari nu amesü süponthu pi Kohath nyithu ncü, kepaghenanye mathu na kemetha tsanqaithu tsü noncca nu adepfü wina tsüthu pie den.

¹⁰Accülikesathu na kekinyipen satemetha le kesalina ajuthu la sengho. Mathu na kekinyipen wi mathu ju khuchile kidenkeya wi,

¹¹Apvüwa na Mosa wi kiza, “Mathu wi ghanan taghakeni jüwi ghanan kaghapen accülikesathu meshu kesüsü ya ma ju sengholo kizalo.”

¹²Mathu na hati kesenie la mathu juthu tsü khuchi: [Aghanan] — [Amizza] — [Aliwa] atuwa — Judah — Amminadab tsa Nahshon keniwa — Issakhar — Zuar tsa Nethanel kechengwa — Zebulun — Helon tsa Eliab mejüwa — Reuben — Shedeur tsa Elizur mangawa — Simeon — Zurishaddai tsa Shelumiel tughowa — Gad — Deuel tsa Eliasaf tagüwa — Efraim — Ammihud tsa Elishama tazenwa — Manasseh — Pedahzur tsa Gamaliel tuguwa — Benjamin — Gideoni tsa Abidan taghawa — Dan — Ammishaddai tsa Ahiezer taghakhenwa — Asher — Okhran tsa Pagiel taghakeniwa — Naftali — Enan tsa Ahira Meshu kesüsü aju hathu sengho: rükatssükhu kesü kekiyan na 1.5 kilogram nu rükatssü kwen kemetsi khu kesü kekiyan na 800 gram, tsü tsüwi apisa men kenie wina, asu pi kekinyi ghena awheng pi adeli saghu pi manyi qho pongya; sunakhu kesü kekiyan na 110 gram, hankedemvu pi pongya; mecang pi kekinyi ghena amesü zza süpon kesü, aneni süpon kesü, khaghaneni zza amapi kesü ji(...)

⁸⁴Accülikesathu taghakeni na kekinyipen satekemetha ghena aju sen kegho saghula hathu: — rükatssükhu taghakeni nu rükatssü kwenkemetsikhu taghakeni kekiyan na saghula 27.6 kilogram, — hankedemvu pi pong ketheng sunakhu taghakeni kekiyan na 1.32 kilogram, — amesü süpon taghakeni, khaghaneni süpon taghakeni, nu khaghaneni zza amapi kesü ji taghakeni, asu pi kekinyi ghena tsüthu saghula mecang pi kekinyi ji, — aneni süpon taghakeni pi kesami ghena kekinyi, — amesü süpon nkwe nu mejü, khaghaneni süpon achentugho, aneni achentugho, khaghaneni zza amapi kesü ji achentugho, kecca ghena kekinyi.

⁸⁹Khathansha wi Mosa na Nithsüjjen wi du Apvüwa ccüneng khe ma Cenkethenjüh Khitson miwi Cherubim gisha keni jüwi Apvüwa na ma ccüneng keben zaya.